Mattêuse 4 - Labrador Inuttitut Heritage Bible

Kristûsib nerritailinninganik ôktorliktauninganiglo. Ajoᴋertuinine pigiarpâ Galilêame. Ilinniartiminik ᴋaiᴋojivok. Kanimajunik pijungnaititsivok.

¹ Tagva Anernerub Jêsuse aitipâ inuᴋangitomut, ôktortaukovlugo Sâtanasemut.

² Uvlunalo 40 ine unnuanalo 40 ine nerringiname, kâlerpok.

³ Oktortublo Sâtanasib tikipâ oᴋautivlugolo: Gûdib ernerikpatit, ujarᴋat ukkua oᴋautikit, ᴋakᴋôjaulerᴋovlugit.

⁴ Kiovâlo oᴋarlune: Aglaksimavok: ᴋakᴋôjatuinak inûb inôtigingilâ; Gûdible oᴋausingit tamaita, ᴋaninganit anijut, (inôtigivait).

⁵ Tagva Sâtanasib aularutivâ iglogasaksoarnut ivsornaitunut, âlâllo katimaviksûb nuvugusinganut,

⁶ Oᴋautivlugolo: Gûdib ernerikpatit, katagit; aglaksimangmat: Pivlutit Engeline perᴋojomârpait, erᴋisimiartaukovlutit saputijauvlutillo, itikatit aporᴋonagit ujarᴋamut.

⁷ Tagva Jêsusib Oᴋautivâ: Taimâktauk aglaksimagivok: Gûdingnik Nalegarnik ôktortuksaungilatit.

⁸ Ama Sâtanasib aularutivâ ᴋakᴋaksoarmut kingiktoksoarmut, silaksûblo ataniovingit ânanauningillo ᴋemergojautipait tâpsomunga.

⁹ Oᴋautivlugolo: Makkoa tamaita ilingnut tunijomavakka, pâmaktervigijomagumga, tuksiarvigivlungalo.

¹⁰ Jêsusib tagva oᴋautivâ: Sâtanase, uvamnit aularit, aglaksimangmat: Gûdingnut Nâlegarnut tuksiartuksauvotit kissianullo kivgartortuksauvotit.

¹¹ Sâtanasib tagva ᴋemakpâ; ahâglo, Engelit tikipât kivgartorlugolo.

¹² Jêsusible Johannese parngnanairsimavingmut pititaujok tussaramiuk, Galilêamut aivok.

¹³ Iglugasaillo Nazaretemik atilit ᴋemakpait, Kapernaumullo tesseksûb sinânêtomut pivok, Zabuloniblo Naftaliblo erᴋângne, tagvanêlerdlunalo.

¹⁴ Nalautaijub Jesaiasib oᴋausingit nalautserᴋovlugit, oᴋarmat:

¹⁵ Zabuloniblo Naftaliblo nunâgik, tesseksoarmut sangmijuk, Jordanib akiane, Galilêalo nalojoktalik,

¹⁶ Inuit târmiut, ᴋaumajoksoak takovât, toᴋublo tachalininganêtunut ᴋaumajok nuimavok.

¹⁷ Naliutomit tamattomangat Jêsuse ajoᴋertuilerpok, oᴋarlunalo: ᴋaᴋialeritse, nâlegauvik ᴋilangmêtok ᴋanitomut tikisimangmat.

¹⁸ Jêsusele Galilêab tesseksoangata sinâne pisukame, angutik nukarêk takovak, Sîmon, Pêtrusemik atipsâlik, nukangalo Andrêase, nulutjamingnik ningititsijuk imânut mingeriarniarteogamik.

¹⁹ Tâpkungnungalo Oᴋarpok: Maliktinga; inungnik aulasarteotitsomavaptik.

²⁰ Tuavilutik nulutjatik ᴋemakpait, maliklugolo.

²¹ Tagvangallo sivumualerame, assîgik nukarêk takogivak, Jâkôbuse, Zebedêusib erininga, nukâlo Johannese, umiamêtuk, atâtatik Zebedêuse illagilugo, nulutjamingnik killaijaivlutik; ᴋaiᴋovaglo.

²² Tuavilutigle umiak atâtatiglo ᴋemakpakit, maliklugolo.

²³ Jêsusiblo nuna Galilêa ilûnât ingergavigivâ, katimavinginalo ajoᴋertuivok, oᴋautsillo tussarnertut nâlegauvingmik oᴋâlatigivait, ᴋanimajullo atsuiliungitullo inungnêtut âᴋikpait.

²⁴ Tussaumajaugivoktauk nuname Sîriame ilûnâne. ᴋanimajullo sunatuinait, atsuiliungitut kappiasuktullo, Sâtanasilillo, ilisimailingajullo, tumângajullo, ilûnaita tâpsomunga âpait; ilûnaitalo tâpsoma âᴋikpait.

²⁵ Inugasaᴋsuit malikpât Galilêamit, iglugasaksoarnillo tallimaujortunit, Jerûsalemillo, Judêamillo, Jordanib akianillo.