Mattêuse 3 - Labrador Inuttitut Heritage Bible

Johannesib ajoᴋertuininganik baptitsininganiglo. Jêsusib baptitauninga Johannesemut.

¹ Taipsomane Johannese baptiterijok tikipok, ajoᴋertuilerlune inuᴋangitome Judêamêtome.

² Oᴋarlunalo: ᴋaᴋialeritse, nâlegauvik ᴋilangmêtok ᴋanitomut tikisimangmat.

³ Taimnauvorle nalautaijub Jesaiasaib oᴋautigilauktanga, oᴋarame: Ajoᴋertuijub nippinganik inuᴋangitomêtoᴋarpok: Nâlekab apᴋotiksanga âᴋiksorsiuk, apᴋosiningillo naggotisigik.

⁴ Tâmnale Johannese, annorâlik nergjutsûb Kamêlib merᴋunginik tapseruteᴋarlarmelo amivinermik; piglertaujârtulle igupsaujârtullo orᴋsungit nerᴋigivait.

⁵ Tagva Jerûsalemiut nalipsarpât, Jûdêamiullo, Jordanib erᴋânêtullo ilûnatik,

⁶ Baptitaujomavlutik tâpsomunga Jordaneme kôngme, idluinitiglo kigligiksautigivlugit.

⁷ Farisêerillo Saduzêerillo unuktut tikitine baptitsivingminut takogamigit, oᴋautivait: Kuglugiangojârtose ilipse, kia ᴋemâᴋovâse ningautsemit pijomârtomît?

⁸ Attêle, sakᴋêgitse paunganik nalonaijaijunik ᴋaᴋialernipsingnik!

⁹ Issumaniarase, ilupsigut oᴋaromavluse: Abraha atâtagivavut. Oᴋautivapse: ujarᴋanit makkonangat Gûdib Abraha ᴋitorngititsungnarpâ.

¹⁰ Ullimaut napârtub mimernanganêlerêrpok. Tamanna pivlugo napârtut naliat ajungitunik paungaᴋangitok kipijaunairpok, egitauvlunalo ikomamut.

¹¹ Uvanga imermut baptipapse nutâmik issumaᴋarᴋovluse; kingunipkulle tikituksak pitsartunersauvok uvamnit; nalopᴋotivungalo, tâpsoma itigagutinginik tigumiarnermik; tâpsoma baptitsomârpâse Anernermut ajunginermut ikomamullo.

¹² Tâpsoma ipsortûtine tigumiarpâ; ᴋematulivingme natinga sanneromârpâ, ᴋakᴋôjaksatsiallo ᴋematulivingminut katitsomârpait; piungitulle ôtsomârpait ikomamut ᴋamisuitomut.

¹³ Taipsomane Jêsuse Galilêamit Jordanemut Johannesemut pivok, baptitaujomavlune tâpsomunga.

¹⁴ Johannesible ᴋipilukpâ oᴋarlunalo: Baptitaujariaᴋaralloarpunga ilingnut; igville tikiparmâ?

¹⁵ Jêsusible kiovâ oᴋautivlugolo: Mâna taimailerle; taimâk idluarnernik tamainik nâmaksititsijuksauvoguk. Johannesib perᴋovâ tagva.

¹⁶ Jêsuse baptitaugame, tuavidlune kôngmit ᴋakᴋivok; ahâglo, ᴋilak ᴋolâne angmalerpok. Johannesiblo Gûdib Anerninga takovâ, tingmiatut taubetut akᴋartok, Jêsusemullo pijok.

¹⁷ Ahâglo, nippe ᴋilangmit oᴋarpok: Tagva ernera nagliktara, tâmna ᴋuviagijara.