Mattêuse 28 - Labrador Inuttitut Heritage Bible

Kristûsib makininganik. Oᴋâlaninginiglo kingorlerpânik.

¹ Wogiblo uvlungita sivorlerpângane uvlârarsukut Marîa Magdalêna, Marîalo tâpsoma assia, iluvermut pivuk takojartorlugo.

² Ahâglo, nuna sajukpilâdlarpok. Nâlekab Engelingata ᴋilangmit akᴋarlune ujaraksoak iluviub pânganit aksaᴋârtitsartormago, ingidlunalo ᴋânganut.

³ Tâpsoma tautua ᴋaumalaktun-ipok, annorângalo aputitut ᴋaᴋortigivok.

⁴ Udsertortulle erᴋsinermut ᴋoaksâdlalerput, toᴋungajutitunilivlutik.

⁵ Engelele arnângnut oᴋarpok: Erᴋsiniaratik, nalungilaptik, Jêsuse Nazarêmiok ᴋeneraptikko.

⁶ Tamânêngilak, makisimavok, sorlo oᴋalaurame. ᴋaileritik, Nâlekab inigilauktanga takojartortikko.

⁷ Ilinniartingillo toᴋungajunit makisimajomik tuavilutik oᴋautijartortikik. Ahâglo sivôrlerilârpase, Galilêamut, tâvane takolârpase, Ahâk, oᴋauterᴋauvaptik.

⁸ Iluvermillo anisâlerpuk, erᴋsivlutik ᴋuviasuvaksoadlarlutiglo; aᴋpangerpuglo, tamattominga ilinniartingit oᴋautijartorlugit.

⁹ Ilinniartinginullo tamattominga oᴋariartortillugik, ahâk, Jêsusib pâkpak, oᴋaudlugiglo: Salutitauleritik! Tâpkoalo tikipâk, itigangillo aktorpait, pâmakterlutiglo sânganut.

¹⁰ Tagva Jêsusib oᴋautivak: Erᴋsiniaratik; mattominga ᴋatangutikka oᴋautijartortiᴋik, Galilêamut aiᴋolugit; tâvane takolârpânga.

¹¹ Ainiartilugigle, ahâk, udsertortut ilangit iglugasaksoarnut tikiput ilusiolauktullo tamaita oᴋautigivait ajoᴋertuijoksoarnut.

¹² Tâpkoalo angajoᴋât illagivlugit ᴋaggimiolerput, tunijivlutiglo sorsuktuksanut kênaujavaksoarnik,

¹³ Oᴋarlutiglo: Oᴋaritse: Ilinniartingita tigligiartorpât unnuane, siniktiluta.

¹⁴ Atanerusiublo tussaumalerpago, nâmaksititsomavavut, pitlartaukonase tâpsomunga.

¹⁵ Tâpkoalo kênaujat tiguvait, piniarlutiglo ajoᴋertortaunemiktut. Tamannalo Jûdit unipkauserivakpât uvlome tikidlugo.

¹⁶ Ilinniartulle 11 it Galilêamut aivut ᴋakᴋamut, aiᴋojauvingmingnut Jêsusemut.

¹⁷ Takogamitsuglo, sânganut pâmakterput; ilangille ᴋolarput.

¹⁸ Jêsusible tikipait oᴋautivlugit oᴋarlunalo: Tunitjiviovunga pitsartunernik tamainik ᴋilangmelo nunamelo.

¹⁹ Tamanna pivlugo aileritse, inuᴋatigêksuillo tamaita ajoᴋertorsigik, baptilugillo Atâtab, Ernerublo, Anernerublo ajunginerub atinganut;

²⁰ Ajoᴋertorsigiglo malerᴋovlugit tamainik perᴋojamnik ilipsingnut, Ahâglo, uvlut tamaita najutsainarniarpapse, silaksûb naggatânut.