Mattêuse 27 - Labrador Inuttitut Heritage Bible

Kristûsib pititauninganik Pilâtusemut. Judasib ingminik inuarninganik. Jêsusib kiglisiniartauninganik Pilâtusemut Herôdesemullo. Toᴋotaksaunerartauninganik. Kikiaktortauninganik iluvertauninganiglo.

¹ ᴋaulermalle ajoᴋertuijoksuit inuillo angajoᴋângit ᴋaggimiolerput Jêsuse pivlugo toᴋotsomavlugo.

² ᴋelaksorlugolo aularutivât, atanerusermullo Pontiuse Pilâtusemut unertujutigivât.

³ Jûdasib pititingata tamanna takogamiuk, toᴋomut perᴋungmatsuk: ᴋaᴋialerpok, kênaujallo ipkoa 30 it utertipait ajoᴋertuijoksoarnut angajoᴋânullo.

⁴ Oᴋarlunalo: Idluitulilaukpunga, auk pasijaksaungitok pitinapko.

⁵ Oᴋarput: Tamanna pingilavut, igvit pivat. Kênaujallo ipkoa Gûdib iglunganut egipait, aularporlo ᴋimitsartorlune.

⁶ Ajoᴋertuijoksuille kênaujat tiguvait, oᴋarlutiglo: Idluangilak, ukkua ilivlugit Gûdib iklervinganut, aungmik akkeᴋalaungmatta.

⁷ Kaggimiolerpulle, machaliortublo perorsêvinganik pisivut kênaujanut tâpkonunga, tujormitjat iluverviksanganik.

⁸ Tamanna pivlugo perorsêvik tâmna taijauvok perorsêvingmik auktalingmik, uvlome tikidlugo.

⁹ Tagva nalautaijub Jeremîasib oᴋausingit nalautsivut, oᴋarmat: Kênaujat 30 it tigulaukpait, pisiangojub akkinga, Israêlib ᴋitornganginit pisiarilauktangata;

¹⁰ Akkiliutigivlugillo machaliortub perorsêvinganut, sorlo Nâlekab oᴋarᴋongmanga.

¹¹ Jêsusele atanerusiub sângane nangerpok. Atanerusiublo aperivâ oᴋautivlugolo: Jûdit atanerivâtît? Jêsusible kiovâ: Oᴋartotit.

¹² Ajoᴋertuijoksuillo angajoᴋâllo pasidlarmatsuk, kiungilak sumiglônet.

¹³ Tagva Pilâtusib oᴋautivâ: Tussangilatît, angijomik pasidlarmatît?

¹⁴ Kiungilâle oᴋautsemut atautsemullônêt, ataneruserlotauk tataminiadlarpok.

¹⁵ Aularviksiorangatale, atanerusek iluseᴋarpok, parngnanairsimavingmêtut ilangat, inuit pijomajangat, aularᴋolugo.

¹⁶ Taipsomanele assinginit uivêluartomik parngnanairsimavingmêtoᴋarpok, Barrabasemik atilingmik.

¹⁷ Katimangmattalo, Pilâtusib oᴋautivait: Kina uvamnut aulartitaukovisiûk? Barrabaselônêt Jêsuselônêt. Kristûsemik taijak?

¹⁸ Nalunginamigit, idluigosungnermut tagvunga pitilaungmatsuk.

¹⁹ Kiglisiniarviublo iksivautangane iksivalertilugo, nuliangata oᴋautjaujartorᴋovâ: Idluartok una allaruk; unnuak sinnaktomavlunga tâmna pivlugo angijomik ikpigilaukpunga.

²⁰ Ajoᴋertuijoksuille angajoᴋâllo tiliorpait, Barrabasemik ᴋenungârᴋovlugit, Jêsusele Toᴋotauᴋovlugo.

²¹ Tagva atanerusiub kiovlunalo oᴋautivait: ukkua maggûk neliangnik aulartitserᴋovisingâ? Oᴋarput: Barrabasemik.

²² Pilâtusib oᴋautivait: ᴋanok Jêsuse pijaksarivigô, Kristûsemik taijâk? Ilûnatik oᴋarput: Kikiaktortaule saningajolingmut.

²³ Ataneruserle oᴋarpok: Sumîgle idluitulilauᴋâ? Niplialualerpulle oᴋarlutiglo: Kikiaktortaule!

²⁴ Pilâtusele takogame sulinginerminik, uivêlivalliatuinarmattale, imermik tigusivok, agganalo ubvarpait inuit takoane, oᴋarlunalo: Pasijaksaungilanga idluartub tâpsoma aunganut; ilipse pijase.

²⁵ Tagva inugasaksuit ilûnatik kiovât oᴋarlutiglo: Aunga uvaptingnut pilerle ᴋitorngaptingnullo.

²⁶ Barrabase tagva aulartipâ tâpkonunga; Jêsusele aklunânut isaᴋajauᴋovâ, unertujutigilâllo, kikiaktortaukovlugo.

²⁷ Tagva atanerusiub sorsuktuksangita Jêsuse âpât iglomut kiglisiniarvingmut, sorsuktuksallo ilûnaita tagvunga atautsemut ᴋaiᴋovait.

²⁸ Annorairtipâllo, uliksoarmiglo aupaluktamik kapitipât.

²⁹ Niaᴋôtiksamiglo nuvutsiariktunik kakilautilingmik pergaivut, niaᴋoanullo ilivlugo, suvlulingmiglo ajaupiserpât aggangitigut talerpingitigut, sêrᴋortorvigivlugolo mitautigivât oᴋarlutiglo: Salutitaulerit, Jûdit ataningat!

³⁰ Ketserarpâllo, ajaupiarlo suvlulik tiguvât, tâpsomungalo niaᴋoa annaulerpât.

³¹ Mitautigijarêramitsuglo, uliksoak tâpsomangat pêrpât, annorânginik nangmininginik atitidlugo, aularutivâllo, kikiaktorniardlugo.

³² Anileramiglo, inuk naipipât Zirênemiok, Sîmonemik atilik; tâmna aksorôtivât, kikiaktortauviksanganik erᴋsuktidlugo.

³³ Tagvungalo, Golgatamik (imaipok: naiᴋovinertalingmik) atilingmut, tikinamik,

³⁴ Kasilinartomik, sungarmik akusimajomik, imertinasuarpât; tamannalo ôᴋamauk, imeromangilâ.

³⁵ Kikiaktorêramitsugle, annorângit avikpait, imerautigivlugillo; aglait nalautsilerᴋovlugit, oᴋautaumajut nalautaijomut: Annorâkka ingmingnut avikpait, uliksoaralo imerautigivât.

³⁶ Tagvanalo iksivalerdlutik udsertorpât.

³⁷ Niaᴋungatalo ᴋolânut toᴋungata pitjutânik aglaksimajomik nipititsivut, imaitunik: Tâmna Jêsuseovok, Jûdit ataningat.

³⁸ Illagivlugolo inuartuk kikiaktorpakit, aipanga talerpiata tungânut, aipâle saumiata tungânut.

³⁹ Tagvûnale arvertartut mitautigivât ileᴋetamârlutiglo.

⁴⁰ Oᴋarlutiglo: Gûdib iglunganik asseroijotit, ama sanavlugo uvlune pingasune, ilingnik piulidlarit! Gûdib ernerikpatit, saningajolingmit akᴋarit!

⁴¹ Taimâktauk ajoᴋertuijoksuit, aglangniglo ilisimajut, angajoᴋâllo mitautigivât, oᴋarlutiglo:

⁴² Assiminik ikajulaukpok, ingminigle ikajorungnangilak. Israêlitit atanerikpatsuk, saningajolingmit mâna akᴋarle, tagva okperijomavavut.

⁴³ Gûde tatigingmago, tâpsoma piuliliuk mâna, ᴋuviagiguniuk. Oᴋalaungmat: Gûdib Ernerivânga.

⁴⁴ Inuartuktauk kikiaktortaumaᴋatîᴋita taimâk mitautigivâk.

⁴⁵ Stundillo 6 inganit nuname ilûnâne tâᴋtoksôlerpok, stundit 9 ingat tikidlugo.

⁴⁶ Stundillo 9 ingane Jêsuse nipperᴋortovlune oᴋarpok: Eli, Eli lama asabtani! Imaipok: Gûdiga, Gûdiga, sôk ᴋemakpingâ?

⁴⁷ Ilangitale, tagvane nangertut, tamanna tussaramitsuk, oᴋarput: Elîase ᴋaiᴋovâ.

⁴⁸ Erinesuklunalo taipkoa ilangat aᴋpangerpok, niperᴋumiglo tigusivok; ᴋasilinartomullo misuklugo, ajaupiamut kapomitarpâ, imertilâllo.

⁴⁹ Assingille oᴋarput: ovatsiaro, takunârta, Elîasib piulijartormangâgo!

⁵⁰ Jêsusele ama nipperᴋortovlune pivok, anernangerdlunalo.

⁵¹ Ahâglo, tagva katimaviksûb upkoᴋsoanga alikpok maggolivlune, pikangat ununga tikidlune.

⁵² Nunalo sajukpilâdlarpok, ᴋairtullo ᴋopludlarput, iluvîllo angmarterput, unuktullo siniktut (toᴋungajut) timingit makiput.

⁵³ Iluvernillo anivut (Jêsusib) makiningata kingorngagut, iglugasaksoarnullo ivjornaitunut pivut, sakᴋerlutiglo unuktunut.

⁵⁴ Sorsuktuksalle angajoᴋângata ilangitalo, Jêsusemik udjertortut, nuna sajukpilâdlartok takogamitsuk, tatamnartullo assingit, kakilângadlalerput, oᴋarlutiglo: Âhamarik, Gûdib tâmna Ernerivâ!

⁵⁵ Tagvanalo Arnaᴋarivok unuktunik, Jêsusemik maliksimajunik Galilêamit, kivgartulauktunik tâpsominga, alivasiktomit takunârtunik.

⁵⁶ Tâpkoa ilangat tagva Marîa Magdalena, Marîalo, Jâkob Josesiblo anânangak, Zebedeûsiblo ernîkita anânangak.

⁵⁷ Unnulermalle angut akluitok tikipok Arimatîamit, Jôsefemik atilik; tâmnatauk Jêsusib ilinniartigivâ.

⁵⁸ Tâpsoma Pilâtusemut aivlune, Jêsusib timinganik tuksiarvigivâ. Tagva Pilâtusib tunijauᴋovâ tâpsomunga.

⁵⁹ Jôsefiblo Jêsusib timinga tiguvâ, uvineruksajamik sutjôngitomik imuserdlugo.

⁶⁰ Iluverᴋotiminullo nutâmut ilivâ, ᴋairtomut sanajauᴋolauktaminut; ujaraksoarmiglo aksaᴋârtitsilune iluviub pânganut, aularpok.

⁶¹ Marîale Magdalêna, Marîalo tâpsoma assia tagvanêtuk, iluvek sângavlugo iksivavuk.

⁶² Uvluble opalungaijarviub tugliane ajoᴋertuijoksuit Farisêerillo ilûnatik Pilâtusemut tikiput,

⁶³ Oᴋarlutiglo: Atanek, erᴋaivogut, uivêtok imna oᴋalaungmat sulle inôvlune: Uvluk pingajuangne makilârpunga.

⁶⁴ Tamanna pivlugo iluvinga udjertortaukoleruk, uvluk pingajuak tikidlugo, ilinniartiminut tigliktaukonago, oᴋarᴋonagillo inungnut toᴋungajunit makisimajomik; uivêriklernek kingorlerpâk ajornersauᴋonago sivorlermit.

⁶⁵ Pilâtusib oᴋautivait: Udjertortuksaᴋarpose tagva; ainiaritse, issumapsingnik udjertortauᴋolersiuk.

⁶⁶ Ailerput, iluverlo udjertortauᴋovât udjertortunut, ujaraᴋsoarlo nalunaikuserdlugo.