Mattêuse 26 - Labrador Inuttitut Heritage Bible

Jêsusib mingoartauninganik Betâniame. Ilijininganik Komunionimik. Tuksiarninganik Getsêmaneme. Pijauninganik. Toᴋotaksaunerartauninganik. Misiarutigijauninganik Pêtrusemut.

¹ Jêsusiblo oᴋautsine tamakkoa nâgamigit, ilinniartine oᴋautivait.

² Nalungilase, uvluk maggûk nâkpanik aularviksiorviolârmat; Inûblo Erninga pititaulârmat, kikiaktortauᴋovlugo ᴋejungmut saningajolingmut.

³ Taipsomane ajoᴋertuijoksuit, aglangniglo ilisimajut, inuillo angajoᴋângit katilerput, ajoᴋertuijoksûb Kaifasemik atiliub igloᴋsoanganut.

⁴ Kaggimiovlutiglo, ᴋanok Jêsuse pingitsertorlutik tigulugo toᴋodlugolo.

⁵ Oᴋarpulle: Aularviksiorvingme pinago, inuit pikablâdlarᴋonagit.

⁶ Jêsusele Betaniamêtilugo, Sîmonib kalaᴋadlalauktub iglungane;

⁷ Arnak tâpsomunga tikipok, publaujatsialijarlune pivianartovaksoarmik imalingmik, niaᴋoanullo kovivâ, nerrimârvingme iksivatilugo.

⁸ Ilinniartingita tamanna takogamitsuk, idluaringilât oᴋarlutiglo: Tâmna sôk kovijauvâ?

⁹ Mingoarut tâmna pisiangonajalaurune, akkeᴋarajarpok unuktunik, aklujunut tunijaksanik.

¹⁰ Jêsusib tamanna tussaramiuk, oᴋautivait: Arnak una sôk kiksartipisiûk? Ajungitomik pivânga.

¹¹ Aklujunik illaᴋatsainarpose; uvangale najortigitsainangilapsinga.

¹² Mingoarut tâmna timimnut kovigamiuk, piniarutigivâ iluvertauniksara pivlugo.

¹³ Âhamarik oᴋaupapse: Nane oᴋautsit tussarnertut ukkua oᴋautigijaukpatta silaksoarme ilûnâne, oᴋartoᴋarniarivok tâpsoma piniarninganik uvamnut, erᴋaumajaujutiksanganik.

¹⁴ Tagva 12 it ilangat, Judasemik Iskâriotemik atilik, aivok ajoᴋertuijoksoarnut,

¹⁵ Oᴋarlunalo: Sumîk tunitjivigijomavisingâ? Ilipsingnut pititsomavara. Kênaujaniglo 30 nik tunitjivigijomavlugo oᴋarput.

¹⁶ Tamattomangat pitjutiksarsiorpok pititsomavlugo.

¹⁷ Pudjusauteᴋangitunigle ᴋakᴋôjaᴋtorviub uvlungita sivorlingane ilinniartut Jêsuse tikipât, oᴋautilâllo: Nane âᴋiksoijartorᴋovitigût (saugârsungmik) aularviksiorutiksamik nerriniartarnîk?

¹⁸ Oᴋautivait: Iglugasaksoarnut aileritse, angut tagvanetok oᴋautisiuk: Ajoᴋertuijub oᴋautjauᴋovâtit: Piviksara naliutingmat, aularviksioromavunga ilingne ilinniartikka illagivlugit.

¹⁹ Ilinniartingillo piniarput perᴋojaunermiktut Jêsusemut, saugârsuglo aularviksiorutiksak âᴋiksorpât.

²⁰ Unnulermallo 12 it illagivlugit nerrimârvingmut ingipok.

²¹ Nerrivlutiglo oᴋarpok: Âhamarik, oᴋaupapse, illapse pitilârpânga.

²² Angijomiglo kiksalerput aperivâllo neleᴋârdlutik: Nâlegak, uvangauniarpîk?

²³ Kiovait, oᴋarlunalo: Aggangminut pôgutamut misukseᴋatima pitilârpânga.

²⁴ Inûb Erninga ainiaralloarpok, sorlo tâpsominga aglaksimajoᴋarmat; inugle tâmna kappianamêk, Inûb Erninganik pititsiniartok! Inungmut tâpsomunga idluarnersaunajarpok, erniangongikune.

²⁵ Tagva Judasib, pititiginiartangata, aperivâ oᴋarlunalo: Rabbi, uvangauniarpîk? Oᴋautivâ: Oᴋartotit!

²⁶ Nerrivlutigle, Jêsusib ᴋakᴋôjaᴋ tiguvâ, ᴋujalivlunalo avgorpâ, ilinniartiminullo tunivâ, oᴋarlunalo: Tigulugo nerrisiuk, tagva timiga.

²⁷ Ermgusiarsuk tigugivâ, ᴋujalivlunalo tunivâ tâpkununga oᴋarlunalo: Ilûnase tagvangat imeritse;

²⁸ Tagva auga, Testamentitâb (aunga), kovijauniartok unuktut pivlugit, ajornerit issumagijaujungnairutiksanginut.

²⁹ Oᴋaupapse: Mattoma kingorngagut imerniarungnairpunga ôminga napârtub vaineliksab iptinganik, uvlok tâmna naliuterᴋârtinago, nutâmik imileromârupko illagivluse Atâtama nâlegauviane.

³⁰ Tuksiarutsillo nertordlerutiksat nâgamigit, anivut ᴋakᴋamut orᴋsuᴋtalingmut.

³¹ Tagva Jêsusib oᴋautivait: Unnuame tamattomane tamapse sinaungajutigilârpapsinga. Aglaksimangmat: Mianersijok unatadlarniarpara, saukallo siamartidlarniarput.

³² Makikumale (toᴋungajunit), sivunapsingne Galilêamut aijomavunga.

³³ Pêtrusible kiovâ, oᴋautivlugolo: Ilûnamatsiatik sinaungajutigigalloarpatit, uvanga sinaungajuteᴋarniatsangilanga.

³⁴ Jêsusib oᴋautivâ: Âhamarik, oᴋaupagit; Unnuarme tamattomane, angutaunek niplerᴋârtinago misiarutigilârparma pingasuertorlutit.

³⁵ Pêtrusib oᴋautivâ: Toᴋoᴋatigijaksarigupkillônêt, misiarutigijomangilagit. Taimâktauk ilinniartut ilûnatik oᴋarivut.

³⁶ Tagva Jêsuse ilinniartine illagivlugit perorsêvingmut avaluliorsimajomut tikipok, Getsêmanemik atilingmut, ilinniartinalo oᴋautivait; Tamaunga ingititse, taikunga tuksiariartortilunga.

³⁷ Pêtruselo Zebedêusiblo ernîgik illagivait, kiksalerlunalo kappiaktoadlalerpok.

³⁸ Tagva Jêsusib oᴋautivait: Tarniga kiksarpok toᴋo tikidlugo; tagvanêtitse pigârᴋatigilunga.

³⁹ ᴋanitomullo aivok, pâmakterlunalo tuksiarpok, oᴋarlunalo: Atâtak, ajornangipat, ermgusiarsuk una pêrle uvamnit; pijomajaraungitorle, pijomajat pile.

⁴⁰ Ilinniartullo siniktut tikipait, Pêtruselo oᴋautivâ: Stundemik atautsemik pigârᴋatigijungnangilapsingâ?

⁴¹ Pigârluselo tuksiaritse, ôktortaulungnermut perᴋonase. Anernek pijomagalloarpok, uvinigle sangêpok.

⁴² Aipanganik ama tuksiariartorpok, oᴋarlunalo: Atâtak, ajornarpat, ermgusiârsuk pêrlugo uvamnit, imingikupko, tagva pijomajat pile.

⁴³ Amalo siniktut tikinivait, ijingillo uerngarnermut oᴋumaiput.

⁴⁴ Tagvungalo ᴋemakpait, pingajuangniglo ama tuksiariartorpok, oᴋautsit taipkoatsainait atorlugit.

⁴⁵ Tagva ilinniartine tikipait oᴋautivlugillo: Mâna sinikluselo merngoerseromavisê? Ahâk, stunde naliusimavok, Inûb Erningata pititaulervinga idluitulijut agganginut.

⁴⁶ Makititse, aularta; ahâk, tamânêpok uvamnik pititsijok.

⁴⁷ Sullelo taimâk oᴋartilugo ahâk, Jûdase 12 it ilangat tikilerpok, inugasaksuit illagivlugit, saviksoalijarlutik ajaupialijarlarmiglo, ajoᴋertuijoksoarnit inuillo angajoᴋânginit pijut.

⁴⁸ Pititsiniartublo nalunaikutaksamik (ilitarsijutiksanganik) oᴋautilaukpait, oᴋarlunalo: Kunilârtara, taimnauvok; tigusiuk!

⁴⁹ Tagvainarlo Jêsuse aivigivâ, oᴋarlunalo: Rabbi, salutitaulerit! Kuniklâlo.

⁵⁰ Jêsusible oᴋautivâ; Ilannâra, sôk tamaungarᴋêt? Tagva tikipât, Jêsuselo aktorpât aggangmingnut, tigulugolo.

⁵¹ Ahâglo, illagijangita ilangata aggane issakpait, saviksoane amuvlugo, ajoᴋertuijoksûblo kivganga ilimavlugo, siutâ nakappâ.

⁵² Tagva Jêsusib oᴋautivâ: Saviksuit kênailitanganut pôleruk; saviksoarmik atortok, saviksoarmut nungutaksaungmat.

⁵³ Issumavîllônêt, Atâtaga tuksiarvigijungnanginapko, uvamnut tiliklerᴋovlugo Engelinik Legioninit 12 nit ununersanîk?

⁵⁴ Aglaille ᴋanok nalautsinajarᴋât? Taimaituksauvok.

⁵⁵ Stundeme tapsomane Jêsusib inugasaksuit oᴋautivait: Sorlo inuartomut anivose, saviksoalijarluse ajaupialijarluselo, tigujomavlunga. Uvlut tamaita iksivaᴋatigilauralloarpapse, ajoᴋertuivlungalo katimaviksoarme, tigulaungilapsingalo.

⁵⁶ Tamakkoale ilûnatik taimailivut, nalautaijut aglangit nalautserᴋovlugit. Tâva ilinniartingita ilûnatik ᴋemakpât, ᴋemâvlutiglo.

⁵⁷ Jesusemigle tigusijut ajoᴋertuijoksoarmut Kaifasemut âpât, aglangnik ilisimajut angajoᴋâllo tagvane katimangmatta.

⁵⁸ Pêtrusible alivasiklune malikpâ ajoᴋertuijoksûb iglunganut; iterlunalo, kivgat sanianut ingipok, takunâromavlune ᴋanok iliortauniarmangât.

⁵⁹ Ajoᴋertuijoksuille angajoᴋâllo ᴋaggimiojullo ilûnatik saglutiksarsiorput Jêsuse pivlugo, toᴋotsomavlugo.

⁶⁰ Nagvângilalle. Unuktullo pasiklertut sakᴋeralloarmatta, sulinginivut. Kingorliovlutik maggûk saglovlutik pasiklertuk sakᴋerpuk.

⁶¹ Oᴋarlutiglo: Una oᴋalaukpok: Gûdib iglunga asserortitsungnartara, uvlunalo pingasune ama sanavlugo.

⁶² Tagva ajoᴋertuijoksûb nikovidlunalo oᴋautivâ: Kiungilatît tamakkonunga, ukkua passiklerninginût?

⁶³ Jêsusele niplingilak. Ajoᴋertuijoksûblo kiovlugolo oᴋautivâ: Gûdib ômajub kênangata sângane aperivagit, oᴋautitigut Kristûseomangârpit, Gûdib Erninga.

⁶⁴ Jêsusib oᴋautivâ: Nelâgut oᴋarpotit. Oᴋautivapsele, mânamit Inûb Erninga takojomârpase iksivajoᴋ pitsartunerub talerpiata tungâne, ᴋilaublo nuvujangitigut akᴋartok.

⁶⁵ Tagva ajoᴋertuijoksûb annorâne alikpait, oᴋarlunalo: Gûde oᴋarnerlûtigivâ; kigligiutjuteᴋariaᴋarungnairpogut! Ahâk, mâna Gûdemik oᴋarnerlujininga tussarpase.

⁶⁶ ᴋanok issumavisê? Kiovut oᴋarlutiglo: Toᴋotaksauvok.

⁶⁷ Tagva kênanga ᴋetserarpât, tigluklugolo. Ilangitale kênangagut tiglukpât,

⁶⁸ Oᴋarlutiglo: Nalautalertigut, Kristûse, tigluktit kinauvâ?

⁶⁹ Pêtrusele avalut illuane iksivavok. Kivgallo arnat ilangata tikipâ oᴋarlunalo: Igvittauk Jêsuse Galilêamiok illagilaukpat.

⁷⁰ Misiarporle ilûnatik tussartilugit, oᴋarlunalo: Oᴋautsitit nalovakka.

⁷¹ Upkuakulle aningmat, assiata (arnab) takogivâ, tagvanêtullo oᴋautivait: Tâpsoma Jêsuse Nazarêmiok illagilaurivâ.

⁷² Misiarivorlo ama, Gûde taivlugo oᴋauserluklune: Inuk tâmna ilitaringilara.

⁷³ Kingornganegalâk tagvane nangertut tikiput, Pêtrusemullo oᴋarput: Ahamarik, igvittauk tâpkua illagivâtit; oᴋautsivît nalunailingmatit.

⁷⁴ Tagva ingminik oᴋarnerlulerdlune Gûdelo taivlugo oᴋarpok: Inuk tâmna ilitaringilara; tagvainarlo angutauneᴋ niplerpok.

⁷⁵ Tagva Pêtrusib Jêsusib oᴋausingit erᴋarpait, oᴋautilaungmago: Angutaunek niplerᴋârtinago, misiarutigilârparma pingasuertorlutit. Anivok tagva ᴋeavlunalo kiksadlarlune.