Mattêuse 25 - Labrador Inuttitut Heritage Bible

Adsiujungnik uigasungnik tallimaujortunik, Talentiniglo pimaklerutaukojaujunik. Erᴋartuiviksoarmik kingorlerpâmik.

¹ Tamanna naliutikpat, Gûdib nâlegauvia uigasuktitut tallimaujortutitut itsomârpok, ᴋollermingnik tigusijutitut, anijutitullo, uiksak pagrearlugo.

² Tâpkoale tallimat silaitut, tallimallo silatujut.

³ Silaitut ᴋollitik neksarpait, orᴋsuksamingnigle neksaratik.

⁴ Silatojulle illulerᴋutimingne orᴋsumiglo, ᴋollermingniglo neksarput.

⁵ Uiksarle muludlarmat, ilûnatik uerngalerput sinisilutiglo.

⁶ Unnuarle ᴋeterarmat, nippersoakalerpok: Ahâk, uiksak ᴋaivok; anititse, pagreariartorlugo!

⁷ Tagva uigasuit taipkoa ilûnatik makiput, ᴋollitik âᴋiklugit.

⁸ Silaitulle oᴋarput silatojunut: Orᴋsupsingnit tunitjivigitigut; ᴋollivut ᴋamilermatta.

⁹ Tagva silatujut kiovlutik oᴋautivait; Aukagle; amigarᴋonago uvaptingnullo ilipsingnullo. Niuvertunulle pisiniariartoritse nangminiksapsingnik.

¹⁰ Pisiniariartortilugillo, uiksak tikipok: opalungairsimajullo iterᴋatigivât nerrimâᴋatiginiardlugo; upkuarlo parngnanairtauvoᴋ tâva.

¹¹ Kingorngatigut uigasuit aipangit tikinivut, oᴋarlutiglo: Nâlegak, Nâlegak upkuêrutitigut.

¹² Tâpsomale kiovait oᴋarlunalo: Âhamarik, oᴋaupapse, ilitaringilapse.

¹³ Tamanna pivlugo pigâritse; uvlorlônêt stundelônêt nalogapsigik, Inûb Erningata tikitsomârvinga.

¹⁴ (Imaitsomârpok:) Sorlo angutitut, nuname assianut aularomajotut, kivgaminik ᴋaiᴋojijotut, perᴋutiminiglo pimaklerᴋojijotut tâpᴋonunga.

¹⁵ Ilangallo tunitjivigivâ talentinik (kênaujanik) tallimanik, aipâ maggûngnik, pingajuak atautsemik atunit pijungnartanganik, tunitjivigivait; aularsârporlo.

¹⁶ Tagva tallimanik talentinik pijub, niorvgotigijartoramigit, assinginik talentinik tallimanik illavait.

¹⁷ Taimâktauk talentingnik maggûngnik pijub, assîgingniktauk maggûngnik illagivak.

¹⁸ Atautsemigle pijub nuna itersalijartorpâ, atanerijame kênaujanga ijerdlugo.

¹⁹ Mululauᴋârdlune akunit kivgat ukkua ataningat tikipok, kiglisiniarlugillo.

²⁰ Tagva sakᴋerpok, talentinik tallimanik pijok, assinginik talentinik tallimanik neksarlune, oᴋarlunalo; Atanek, talentinik tallimanik tunitjivigilauramga; ahâk, tagga assinginik talentinik tallimanik illavakka.

²¹ Tagva ataningata oᴋautivâ; Nâmagivagit, issumagiktotit nertornartotillo kivgak, ikitunik nertornardlutit atulauravit; pimajingortitsomavagit unuktunik: Nâlekavît ᴋuvianarninganut iterit!

²² Sakᴋerivoktauk talentingnik maggûngnik pijok, oᴋarlunalo: Atanek, talentîngnik maggûngnik tunitjivigilauramga; ahâk tagga, assîgingnik maggûngnik illavakka.

²³ Ataningata oᴋautivâ; Nâmagivagit, issumagiktotit nertornartotillo kivgak, ikitunik nertornardlutit atulauravit; pimajingortitsomavagit unuktunik: Nâlekavît ᴋuvianarninganut iterit!

²⁴ Sakᴋerivoktauk talentemik atautsemik pijok, oᴋarlunalo: Atanek, ilitarigapkit, sivôranartotit angutausertotit; sabvijartotit karngasulaungitarnik, katersijotillo ililaungitarnik.

²⁵ Sivôragamalo, talentit nunamut ijeriartulauktara; ahâk tagga, pît piuk!

²⁶ Ataningatale kiovâ, oᴋautivlugolo: Ajortotit erᴋeasuktotillo kivgak! Ilitarigamga, sabvijartunga karngasulaungitamnik, katersijungalo ililaungitamnik;

²⁷ Tamanna pivlugo kênaujaᴋotimnik tunitjijuksaulaukpotit kênaujanik tauksêjunut, tikikumalo, perᴋutiga tigunajalauktara illaᴋartilugo.

²⁸ Tamanna pivlugo talentemik aᴋsârsiuk, tunilugolo talentinik tallimaujortunik pilingmut.

²⁹ Peᴋartok tunitjivioniarmat, peᴋaluarᴋovlugo; peᴋangitorle aᴋsârtauniarpok pinganik.

³⁰ Kivgarlo piungitok egisiuk tâᴋtoᴋsoarmut ungardlerpâmut: tagvane ᴋeavaksoadlarneᴋaromârpok aglerulârneᴋaromârlunalo.

³¹ Inûble Erninga ânanaunermine tikikune, Engelit ajungitut tamaita illagilugit, iksivajomârpok iksivautamine ânanaunersoalingme.

³² Inuᴋatigêllo ilûnamatsiatik katititaujomârput sânganut. Avitsomârpaillo, sorlo mianersijub saugaᴋotine avingmagit tuktungajunit.

³³ Okpertullo talerpingme tungânut pititsomârpait, okpingitulle saumingme tungânut.

³⁴ Tagva Nâlekab talerpingme tungânêtut oᴋautijomârpait: ᴋaititse, Atâtama nagliktangit, nâlegauvik kingormgutilersiuk, ilipsingnut pijarêrsimajok silaksûb pigiarninganit.

³⁵ Kâktilunga nerritilaurapsinga. Imeruktilunga imertilaurapsinga. Tujormitilunga iterᴋolaurapsinga.

³⁶ Annorairsimatilunga annorârtilaurapsinga. Kanimatilunga takojartulaurapsinga. Parngnanairsimavingmêtilunga pullâlaurapsinga.

³⁷ Tagva idluartut kioniarpât oᴋarlutiglo; Nâlegak, ᴋanga kâktilutit takolaukpitigît, nerritilaukpitigîllo? Imeruktilutillônêt, imertilaukpitigîllo?

³⁸ ᴋangalo tujormitilutit takolaukpitigît, iterᴋolaukpitigîllo? Annorairsimatilutillônêt, annorârtilaukpitigîllo?

³⁹ ᴋangalo takolaukpitigît ᴋanimatilutit, parngnanairsimavingmêtilutillônêt, pullâlaukpitigîllo?

⁴⁰ Nâlekablo kioniarpait oᴋautivlugillo: Âhamarik oᴋaupapse: Ukkua ᴋatangutima mikinerojut ilangat sumik pitinapsiuk, tamattominga uvanga pilaukpapsinga.

⁴¹ Saumingmêtunullo oᴋarniarivok; Idluitoâlôjose, uvamnit aularitse, ikomamut ᴋamitsuitomut pijarêrsimajomut Sâtanasemut Engelinginullo.

⁴² Kâktilunga nerritilaunginapsinga. Imeruktilunga imertilaunginapsinga.

⁴³ Tujormitilunga iterᴋolaunginapsinga. Annorairsimatilunga annorârtilaunginapsinga. ᴋanimatilungalo parngnanairsimavingmêtilunga pullâlaunginapsinga.

⁴⁴ Taipkoatauk kioniarivât oᴋarlutiglo: Nâlegak, ᴋanga takolaukpitigît, kâktilutit, imeruktilutillônêt, tujormitilutillônêt, annorairsimatilutillônêt, ᴋanimatilutillônêt, parngnanairsimavingmêtilutillônêt, kivgartulaungipitigîllo?

⁴⁵ Tagva kioniarivait oᴋarlunalo: Âhamarik oᴋaupapse: Ukkua mikinerojut ilangat sumik pitinginapsiuk, tamattominga uvanga pilaunginivapsinga.

⁴⁶ Tâva taipkua ânianartoksoarmut nungusuitomut pijomârput; idluartulle inônermut nâksaungitomut.