Mattêuse 24 - Labrador Inuttitut Heritage Bible

Katimaviksub serᴋomitaujomârningata sivorngagut oᴋautauninganik. Nâlekab tikitsomârninganik.

¹ Jêsuselo katimaviksoarmit aningmat, ilinniartingita tikipât, katimaviksûb senamatsiarninganik ᴋemergotiniardlugo.

² Jêsusible oᴋautivait: Tamakkoa tamaita takogalloarpisigîk? Âhamarik, oᴋaupapse: Ujarᴋat ukkua serᴋomitaujomârput, ᴋallerêktoᴋarungnairlutik.

³ ᴋakᴋamelo orᴋsoᴋtalingme iksivalermat, ilinniartingita kissimiovlutik tikipât oᴋarlutik: Oᴋautitigut: ᴋanga pijuksat tamakkoa pijomârᴋât? Sunalo nalunaikutaksaujomârᴋâ tikiviksarnut, silaksûblo naggatiksanganût?

⁴ Jêsusible kiovlune oᴋautivait: Kamatitse uivêrijauᴋonase.

⁵ Unuktut tikitsomârmatta attera atterivlugo, oᴋarlutik: Kristûseovunga; unuktullo tammartiniarpait.

⁶ Tussaromârposele unatartunik, unatartullo unipkautauninginik; kamatitse erᴋsiniaraselo. Taimaitokartuksaungmat sivorngagut; silaksûble naggatiksanga naliutingilak sulle.

⁷ Inuᴋatigêt inuᴋatigênut assimingnut sorᴋsugomârmatta, ataniovingmiullo, ataniovingmiunut assimingnut; kângnartoksoarmiglo ᴋanimaluâlungnartomiglo pijoᴋaromârpok, nunallo sunatuinarme sajukpilugomârput.

⁸ Taimadja kappianartub pigiarninga.

⁹ Taimaipat, kappianartomut pititsomârpâse, toᴋodluselo. Inuᴋatigêllo ilûnatik ômigidlaromârpâse, attera pivlugo.

¹⁰ Inuillo unuktut sinaungajuteᴋaromârput, illatiglo kiggortigivlugit, ingmingnullo ômisûtijomârput.

¹¹ Nalautainerluktullo unuktut sakᴋeromârput, unuktut tammartiniardlugit.

¹² Idluitulinerlo pivalliangmat, inuktut naglingningit niglileromârput.

¹³ Issuanulle soᴋosijuitok, (okperlune) piulijaujomârpok.

¹⁴ Oᴋautsillo tussarnertut nâlegauvingmik oᴋautaujomârput silaksoarme ilûnâne, inuᴋatigêt ilûnatik nalojungnairutiksanganut; tâva silaksûb naggatiksanga naliutijomârpok.

¹⁵ Nungutsiviub maᴋojungnarninga takoniarupsiuk, oᴋautigijaumajok nalautaijomut Daniêlemut, ivjornaitovingmut pingmat (tamakkoninga atuarsijub kamagilerligit):

¹⁶ Taimaipat, Jûdit nunanganêtut ᴋakᴋanut ᴋemâlerlit.

¹⁷ Iglublo ᴋânganêtok akᴋarniarane, sumik iglominit aikleromavlune.

¹⁸ Perorsêvingmêtorlo uterniarane, annorâne pijartorlugit.

¹⁹ Kappianamêgle singaijut amâmaktitsijullo, tamanna naliutikpat.

²⁰ Tuksialeritsele, ᴋemâviksase okiome sabbatemelônêt pilerᴋonago.

²¹ Uvlunele taipkonane kappiasugviksaᴋaromârpok nelleᴋangitomik, silaksûb pigiarninganit tamanna tikidlugo taimaitoᴋalaungilak, kingornganalo taimaitoᴋarnianginivok.

²² Uvlullo taipkoa ikitlijauniangipatta, inuk atauserlônêt piulijaunajangilak; anerimajulle pivlugit uvlut taipkoa ikitlijaujomârput.

²³ Tagva oᴋautjaugupse: Ahâk Kristûse ovanêpoᴋ ikanelônêt, tamanna okperiniarasiuk.

²⁴ Kristûseonerartunik saglojunik nalautainerluktuniglo Sakᴋertoᴋaromârmat, nalunaikutaksoarnik tatamnadlartuniglo piniarlutik tammartitaulerᴋovlugit tammarnartomut anerimajuttauk, ajornangipatta.

²⁵ Ahâk, makkoninga oᴋautilaukpapse sivorngagut.

²⁶ Tamanna pivlugo, oᴋautikpase: Ahâk, inuᴋajuitomêpok, ainiarase; Ahâk, iglomêpok, okperiniarasigik.

²⁷ Sorlo ᴋaumalak aningmat (seᴋerngub) nuivianit, ᴋaumaingmallo nipivianut, taimaitsomârpoktauk Inûb Erningata tikiviksanga.

²⁸ Nane ᴋigdloᴋartome nektoralit kativut.

²⁹ Uvlulle taipkoa kappianartut kingorngatigut seᴋinerlo takᴋerlo ᴋaumajungnairomârpuk, uvloritjallo katagomârput ᴋilangmit, Kilaublo pitsartuningit aulataujomârput.

³⁰ Inûblo Erningata nalunaikutanga tâva takuksaujomârpok ᴋilangme. Kinguvângoᴋatigello nunamêtut ilûnatik ᴋeadlaromârput, Inûblo Erninga takojomarpât ᴋilaub nuvujangitigut akᴋartok, pitsartudlarlune ânanaudlartok.

³¹ Engelinalo tilijomârpait tiptulautilijartut nipperᴋortojunik; anerijangillo katitilugit anorenit sitamanit, ᴋilaub issuanit issuanut.

³² Adsiujomik ilinniaritse napârtok paungatannaᴋarpaktoᴋ pivlugo. Akkerungit ipteᴋalerangata siggilerangatalo, ᴋaujimavose aujajaraklilermat.

³³ Taimâktauk ilipse, makkoa tamaita takogupsigik, ᴋaujimaleritse, ᴋaglilermat.

³⁴ Âhamarik oᴋaupapse: Kinguvângoᴋatigêt ukkua nunguniangilat, makkoa ilûnatik nâmakserᴋârtinagit.

³⁵ ᴋilaglo nunalo nungujomârpuk, oᴋausikkale nungujomângilat.

³⁶ Uvlormigle stundemiglônêt taipsominga ᴋaujimajoᴋangilak; Engelillônêt ᴋilangmêtut ᴋaujimanginivât, Atâtama kissime ᴋaujimavâ.

³⁷ Sorlo Nôa inôtilugo ilaungmat, taimâktauk itsomârivok Inub Erningata tikiviksanga.

³⁸ Sorlo uvlune taipkonane, ulitornivaksûb sivorngagut ilaungmat: nerrivut, imilarmiglo, nulianikpullo, uinikpullo, uvloᴋ tâmna tikidlugo, Nôab itervia umiaksoarmut.

³⁹ Kamagingilâllo, ulitornivaksoak tikerᴋârtinago tamaita nungudlugit: taimaitsomârpoktauk Inûb Erningata tikiviksanga.

⁴⁰ Tamanna naliutikpat, maggûk perorsêvingmêtsomârpuk; aipanga illaliortaujomârpok, aipangalo ᴋemaktaujomârpok.

⁴¹ Arnâk maggûk kaivititseᴋatigêgomârpuk; aipanga illaliortaujomârpok, aipangalo ᴋemaktaujomârpok.

⁴² Taimâk pivlugo pigâritse; Nâlegapse tikiviksangata stundinga nalogapsiuk.

⁴³ Tamannale nalojungnairaksarivase: Iglub inuata ᴋaujimaguniuk tigliktub tigligiartorvia, pigârajarpok, iglominut itertokarᴋonago.

⁴⁴ Tamanna pivlugo ilipsetauk opalungairsimatsainaritse; Inûb Erninga tikitsomârmat stundeme nerriugvigingitapsingne.

⁴⁵ Nelialle nertornartôvlune silatovlunalo kivgauvâ, kivgaᴋotinginut angajoᴋautitaumajok atanerminut, nerᴋiksanginik tunijerᴋovlugo tâpkonunga, naliutijarangât?

⁴⁶ Kivgaᴋ tâmna piloridlarpok, taimailiortok, ataningata tikipago.

⁴⁷ Âhamarik, oᴋaupapse: Pimajingortiniarpâ perᴋutiminik tamainik.

⁴⁸ Kivgakullugle, tâpsoma assia, oᴋarpat: Atanerijara sulle tikiniangilak;

⁴⁹ Kivgauᴋatinalo annaugialerpagit nerrivlunalo imilarmelo talatut illagivlugit,

⁵⁰ Tâva kivgab taipsoma atanerijanga tikiniarpok uvlorme neriugvigingitangane, stundemelo nerriugvigingitangane.

⁵¹ Asserortiniarpâ tagva, akkiviginialâllo takkormôrtut illagivlugit. Tagvane ᴋeavaksoadlarneᴋaromârpok aglerulârneᴋaromârlunalo.