Mattêuse 23 - Labrador Inuttitut Heritage Bible

Farisêerit takkormôrningita sakᴋertititauninginik. Jerusalemiut sillugvioninginik.

¹ Tagva Jêsusib inuillo ilinniartinalo oᴋarvigivait,

² Oᴋarlunalo: Môsesib iksivautangane aglangnik ilisimajut Farisêerillo iksivavut.

³ Taipkoa atorᴋojangit ilipsingnut, tamaita nâleklugillo malingniarsigik; piniarningille malingniarasigik; oᴋaralloartut piniaratiglo.

⁴ Erᴋsugaksanigle oᴋumaitunik erᴋsuktaujungnangitunik ᴋelaksivut, inuillo tuinginut ilivlugit; nangminerle aktoromangilait aggangmut atautsemullônêt.

⁵ Suliaksatigle tamaita pivait, inungnut tautuktaujomavlutik. Erᴋaijutiksaᴋotitik siliksivait, annorâmiglo siningit angijorortilugit.

⁶ Nerrimârvingme katimavingnalo issukliolutik iksivajomavut.

⁷ Niuvervingmelo salutitaujomavut, inungnut taijaujomavlutik Rabbimik (ajoᴋertuijomik).

⁸ Ilipsele taijaujomajuksaungilase Rabbimik: atautsemik ajoᴋertorteᴋarapse Kristûsemik; ilipsele ilûnase ᴋatangutigêkpose.

⁹ Kinamiglo atâtamik taisijuksaungilase nuname: atausek atâtagigapsiuk, ᴋilangmêtok.

¹⁰ Ajoᴋertuijuniglo taijaujomajuksaungilase: atausek ajoᴋertortigigapsiuk Kristûse.

¹¹ Illase anginerijok kivgaksauvok ilipsingnut.

¹² Ingminik angijorortitok, miklilertitauniarmat; ingminiglo miklilertitok, angijorortitauniarpok.

¹³ Kappianamêk ilipse, aglangnik ilisimajut Farisêerillo, takkormôrtose! Nâlegauvik ᴋilangmêtok parngnanairapsiuk, inuit iterᴋonagit! Ilipse itertuksaunase, iteromajulle iterᴋongilase.

¹⁴ Kappianamêk ilipse, aglangnik ilisimajut Farisêerillo, takkormôrtose! Uigarnerit pingit nungunapsigik, takijunik tuksiarutinik tuksiarutsomavlugit oᴋartose! Taimâk pivlugo pitlartaunersaujomârpose.

¹⁵ Kappianamêk ilipse aglangnik ilisimajut Farisêerillo, takkormôrtose. Nunakullo imakullo ingergagapse, illaksarsiorluse Judioᴋatiksapsingnik! illagigupsiuglo, tâᴋtomut ᴋitorngautipase, maggûertorlugo ilipsingnit.

¹⁶ Kappianamêk ilipse, tautungitose tessiornikteojose, oᴋarapse: Gûdib iglunga taiᴋassiutivlugo angertoᴋârpat, tamanna erᴋanangilak; Gûdible iglungata goldinga taivlugo angertok, tâmna pitlaraksauvok,

¹⁷ Silaitose tautungitoselo! Neliak anginersauvâ? Golde, Gûdib iglungalônêt, ivlernartitsijok goldemîk?

¹⁸ Tunerguservik taivlugo angertokarpat, tamanna erᴋanangilak; tunergulle ᴋânganêtok tailugo angertok tâmna pidlaraksauvok.

¹⁹ Silaitose tautungitoselo! Neliak anginersauvâ? Tunergut, tunerguserviglônêt ivlernartitsijok tunergumîk?

²⁰ Tamanna pivlugo, tunerguservik tailugo angertok, tâmna tailugo angerpok, ilûnaitalo ᴋânganêtut illaliudligit.

²¹ Gûdiblo iglunga tailugo angertok, tâmna tailugo angerpok, taᴋamanêtorlo illaliudlugo.

²² ᴋilaglo tailugo angertok, Gûdib iksivautanga tailugo angerpok, iksivajorlo ᴋângane illaliudlugo.

²³ Kappianamêk ilipse, aglangnik ilisimajut Farisêerillo, takkormôrtose! Perortoarsuit tippigiktut tauvluᴋutiksallo tallimaujunginik tunijigapse; perᴋojanêtullo pijariarᴋortonerpângit tunupase, imaitut: idluarnerlo, nâpkiningnerlo, okpernerlo! Makkoa piniaraksarivase, ipkoalo iperarnagit.

²⁴ Tautungitose tessiorniktiojose! Milugiararsuit kamagivase, kamêlinigle êsivose.

²⁵ Kappianamêk ilipse, aglangnik ilisimajut Farisêerillo takkormôrtose! Ermgusiarsuillo pôgutallo silatingitigut ᴋeblariksarapsigik, ilungille tattaput arᴋtainermik nerritunermiglo.

²⁶ Farisêere tautungitotit, ermgusiarsûblo pôgutablo ilûgik salumarsarᴋâᴋik silatîgik ᴋeblaridlarᴋovlugik.

²⁷ Kappianamêk ilipse, aglangnik ilisimajut Farisêerillo, takkormôrtose! Iluvertitut mingoarsimajutitun-inapse; silatingit ânanaujârput, ilungille tattaput toᴋungajut sauninginik mamaitoâlungniglo.

²⁸ Taimainivosetauk! ᴋalinipsigut idluartôjârpose inuit takoane; ilupsigulle takkormôrnermiglo idluiluktomiglo tattapose.

²⁹ Kappianamêk ilipse, aglangnik ilisimajut Farisêerillo takkormôrtose! Nalautaijut iluvingit sanagapsigik, idluartullo iluvingit ânanausigapsigik.

³⁰ Oᴋarluselo: Atâtagilauktavut inôᴋatigilauruptigik, taipkoa illagijomanajalaungilavut nalautaijut aunginik kovisilauktut.

³¹ Taimâk nangminek kigligiutjivose, nalautaijunik toᴋotsijut ᴋitorngaringmase.

³² Attê, ilipsetauk sivorlipse ôktûtigilauktangat tattaniarsiuk.

³³ Kuglugiangojârtose, ᴋuglugiarâlôjârtose, ᴋanok ilivluse erᴋartortaumaneᴋ kappianartolik ᴋemâjomavisiûk?

³⁴ Taimaimat, akâk, tilivakka ilipsingnut nalautaijullo, silatujullo, aglangniglo ilisimajut; taipkoalo ilangit toᴋotsomârpase, ᴋejungmut saningajolingmut kikiaktorlugit, ilangillo katimavipsingne issaᴋadlaromârpase, unangmivlugillo iglugasaksoarnit iglugasaksoarnut.

³⁵ Tikitaukovluse idluartut aunginut ilûnainut, nunamut kovijaujunut, idluartub Abelib aunganit, Zacharîasib, Baraᴋîasib erningata aunga tikidlugo, toᴋolauktapse katimaviub tunerguserviublo akorngangne.

³⁶ Âhamarik, oᴋaupapse, tamakkoa tamaita pivlugit kinguvângoᴋatigêt ukkua akkiniartaujomârput.

³⁷ Jerusalem, Jerusalem, nalautaijunik toᴋotsijotit, ilingnullo tilijanik ujarᴋanut milorniktotit! ᴋitorngatit katititsomaᴋattalauralloarpakka, sorlo arnaungub piarᴋane katitingmagit esarᴋominut; pijomalaungitosele.

³⁸ Ahâk, igluse (katimavise) inuêrutjaujomârpok.

³⁹ Oᴋaupapsele, mattoma kingorngagut takojungnaipapsinga, oᴋarᴋârtinase: Nakoridlartaule Nâlekab atingane tikitok.