Mattêuse 22 - Labrador Inuttitut Heritage Bible

Atanersub erningata nulianilerninganik. Apertsutinik kênaujat nunaliksiutaukojaujut pivlugit. Makitsomârnermik. Perᴋojamik angnerpâmik. Jêsusib kinausinganik.

¹ Jêsusib ama oᴋarvigilerpait adsiujutigut, oᴋarlunalo:

² Gûdib nâlegauvia atanersoatun-ipok, ernerminik nulianerᴋojijotut;

³ Kivganalo tilivait, nuliarêngnialertungnut nerrimârᴋataujuksat ᴋaiᴋojauᴋovlugit; ᴋaijomalungilallo.

⁴ Ama kivgat assingit tiligivait, oᴋarlunalo: Nerrijartortuksat oᴋautsartorsigik: Ahâk, nerrimâraksavut pijarêrpakka, tukuvaᴋotikkalo ᴋoinijut toᴋopakka, ilûnatiglo pijarêrput; ᴋaileritse, nuliarêngnialertuk nerreᴋatigilaulavut.

⁵ Nachogivâlle tamanna, aularlutiglo, ilangat perorsêvingminut, ilangat sulivingminut.

⁶ Ilangitale kivgangit tiguvait, mitautigivlugillo toᴋopait.

⁷ Atanersûb tamanna tussaramiuk, ningaumajadlalerpok, sorsuktuksaᴋutsoanalo aiᴋovait, inuartut taipkoa nungutsartortauᴋovait, iglugasaksoangillo ikidlugit.

⁸ Tagva kivgane oᴋautivait: Nerrimâraksat pijarêrsimagalloarput, ᴋaikojaulauktulle pijuksaulaungilat.

⁹ Tamanna pivlugo apᴋosiniâlungnut aileritse, ilûnaitalo naipiniartase nuliarêngnialertungnut nerreᴋataujartorᴋolersigik.

¹⁰ Kivgallo taipkoa apᴋosiniâlungnut aivut, naipitatiglo ilûnaita katitipait, ajortullo ajungitullo. Nuliarêngnialertuglo iglungak nerrimârᴋatauniartunut nimniolerpok.

¹¹ Atanersûblo ᴋaiᴋojaujut takojartoramigit, inuk takovâ tagvane annorârsimangitok nerrimârᴋataujuksatut.

¹² Oᴋautivâlo: Ilannâk, ᴋanok ovunga iternerᴋêt, annorârsimangitotit nerrimârᴋataujuksatût? Tâmnale niplingilak.

¹³ Tagva atanersûb kivane oᴋautivait: Aggangillo itigangillo ᴋelaᴋsorsigik, egidlugolo tâᴋtoksoarmut ungardlerpâmut, tagvane, ᴋeavaksoadlarneᴋaromârpok aglerulârneᴋaromârlunalo;

¹⁴ ᴋaiᴋojaumajut unudlarmatta, anerimajulle ikiput.

¹⁵ Tagva Farisêerit ᴋaggimiojartolerput, oᴋausinginut ᴋanok pijauveᴋarmangât.

¹⁶ Ilinniartitigle tâpsomunga tilivait, Herôdesiblo kigvangit illautilugit, oᴋarlutiglo: Ajoᴋertuijok, okpernartôjotit ᴋaujimavaptigit, Gûdemullo apᴋotiksamik ajoᴋertuitsiartotit, inuillo sivôragingilatit, tâpkoa kinauningit kamaginginangne.

¹⁷ Tamanna pivlugo oᴋautitigut, ᴋanok issumavêt? Idluarᴋâ, ataniviksoak kênaujanik nunaliksiutaukojaujunik tunitjivigivlugo, idluangilarlônêt?

¹⁸ Jêsusible pingitsertorningit tukkisileramigit, oᴋautivait: Takkormôrtose, sôk ôktorpisingâ?

¹⁹ Takolago kênaujak nunaliksiutauᴋojaujok. Kênaujarlo tâpsomunga sakᴋerpât.

²⁰ Apersorpaillo: Kia adsinga, kialo aglangit ᴋolânê?

²¹ Kiovât: Ataniviksûb. Tagva oᴋautivait. Taimaimat ataniviksoarmut tunisiuk ataniviksûb pinga, Gûdemullo Gûdib pinga.

²² Tamanna tussaramitsuk, tataminiarput, ᴋemaklugolo aularput.

²³ Uvlorme taipsomane Saduzêerit tikipât, makiviksaᴋangitomik oᴋartut; aperivâllo,

²⁴ Oᴋarlutik: Ajoᴋertuijok, Môsese oᴋarpok. Toᴋojoᴋarpat ᴋitorngaᴋangitomik, nukangata (angajugilauktame) nulianga nuliarijaksarivâ, angajune kinguvâksarsivlugo.

²⁵ Uvaptingnele nukarêᴋalaukpoᴋ 7 nik. Angajuklek nulianerᴋâlauktok, toᴋovok; ᴋitornginanalo, nuliane nukaminut ᴋemakpâ.

²⁶ Taimâktauk tuglia, pingajuaglo, 7 ingat tikidlugo.

²⁷ Ilûnatik kingorngatigut Arnak toᴋogivok.

²⁸ Makivingmele, taipkoa 7 it naliata nuliarijomârpaûk? Ilûnatik nuliarilaungmatsuk.

²⁹ Jêsusible kiovait oᴋautivlugillo: Tammarpose, aglait nalogapsigik, Gûdib ajugaᴋanginingalônêt.

³⁰ Toᴋungajunit makitsomârtut nulianingniangilallônêt, uiningniangilallônêt; Gûdible Engelingititun-itsomârput ᴋilangme.

³¹ Toᴋungajunik makitsomârtunik atuarsilaungilasê, Gûdib oᴋautilaungmase, oᴋarame:

³² Abrahâb Gûdigivânga, Isaablo Gûdigivânga, Jâkoblo Gûdigivânga? Toᴋungajulle Gûde Gûdigingilât, inôjulle (kissimik).

³³ Inuille tamanna tussaramitsuk, ajoᴋertûtinga tataminiarivât.

³⁴ Farisêerille tussaramik, Saduzêerit oᴋausiksairutingmagit, atautsemut katilerput.

³⁵ Ilangatalo, aglangnik ilisimajûb ôktorpa, oᴋarlunalo:

³⁶ Ajoᴋertuijok, perᴋojanit tamainit naliat anginerovâ?

³⁷ Jêsusible kiovâ: Gûdingnik Nâlegarnik nagliktuksauvotit ômatingnut tamânut, tarningnullo tamânut, issumangnullo tamainut.

³⁸ Tamanna pijariaᴋarnerojok angnerlo perᴋojak.

³⁹ Aipangale tâpsotunaᴋ-ipok: Inuᴋatingnik iliktut nagliktuksauvotit.

⁴⁰ Perᴋojângnut ukkungnunga maggûngnut perᴋojat ilûnatik lilagêkput, nalautaijullo aglangit.

⁴¹ Farisêerille katimangmatta, Jêsusib aperivait,

⁴² Oᴋarlunalo: ᴋanok issumavisê Kristûse pivlugô? Kia ernerivaûk Kiovât: Dâvidib.

⁴³ Oᴋautivait: Sôk Dâvidib anernermigut Nâlekaminik taivâuk? Oᴋarame:

⁴⁴ Nâlegak Nâlekamnut oᴋalaukpok: Talerpingma tungânut ingitit, ômigijingnik ilijerᴋârtinanga itikavît ikkogganganut.

⁴⁵ Nâlekaminigle Dâvidib taingmago, ᴋanok ernerivaûk?

⁴⁶ Ilûnatiglo kiovlugo sapilerpât, ilûnatiglo uvlub tâpsoma kingorngagut aperivlugo saperivât.