Mattêuse 21 - Labrador Inuttitut Heritage Bible

Kristûse aivok Jerusalemut. Tempelemik ivjornaititsivok. Napârtok paungatannanik paungaᴋarpaktok ôminarnerartauvok. Adsiujok perorsêvilerijunik vainiliksatalingmik.

¹ Jerusalemulle ᴋaglileramik, Betfagemut tikilutik, ᴋakᴋamut orᴋsoᴋtalingmut, Jêsuse maggûngnik ilinniartiminit tiliklerpok,

² Oᴋaudlugiglo: Aileritik iglugasangnut neliptingnêtunut, siuterᴋortojorlo pituksimajok nenilârpatik noggarlo saniane; pitûdjârlugiglo, uvamnut ᴋaitikik.

³ Oᴋarvioniaruptiglo sumik, kiogitik: Nâlekab atoromangmagik; tâva naksartauᴋolârpak iliptingnut.

⁴ Tamakkoale ilûnatik taimailingavut, nalautserᴋovlugit oᴋautigijaumajut nalautaijokut, oᴋarmat:

⁵ Zionib pania oᴋautisiuk: Ahâk, atanît ᴋaivok ilingnut sunaungaidlune, siuterᴋortojome iksivavlune, siuterᴋortojublo nangmarpaktub noggangata ᴋânganêdlune.

⁶ Ilinniartuk ailerpuk, piniarlutiglo perᴋojaunermiktut Jêsusemut.

⁷ Siuterᴋortojorlo noggarlo ᴋaipâkik, annorâtiglo ᴋemerdloanut ilivlugit, ᴋânganullo (Jêsuse) ingitipât.

⁸ Inugasaksuillo annorâtik issivilerpait apᴋotânut, assingitalo napârtut ᴋessertutingit kipivlugit, apᴋotânut katerarpait.

⁹ Inugasaksuille, sivorlîllo maliktingillo, ᴋagudlarlutik oᴋarput: Hosianna, Davidib Erninga! nertortaule, Nâlekab atingane tikitok! Hosianna ᴋotsingnerme!

¹⁰ Jerusalemullo itermat, iglugasaksuit inungit ilûnatik nippalijâdlarput, oᴋarlutiglo: Kina unâ?

¹¹ Inuille oᴋarput: Jêsuse una, nalautaijok Nâzaretemit Galilêamêtomit.

¹² Jêsuselo Gûdib iglunganut katimaviksoarmut (Tempelemut) iterpok, pisiniartullo niuverniartullo katimavingmêtut anitilerpait, kênaujaniglo tauksêjut sângit, tingmitjaniglo taubinik niorvgotilit iksivautangit ochotidlarpait.

¹³ Oᴋautivlugillo: Aglaksimavok, igluga taijaksauvok tuksiarvingmik; ilipsele inuarviotilaukpase.

¹⁴ Katimavingme tautungitullo tussiaktullo tikipât, pijungnaitipaillo.

¹⁵ Ajoᴋertuijoksuille aglangniglo ilisimajut tatamnartitangit takogamigit, sorutsillo katimavingme ᴋagudlartut tussaramigit, oᴋartut: Hosianna, Davidib Erninga! Ningaumajarutigivait tagva,

¹⁶ Oᴋautivlugolo: Tussarpigîlle, ukkua oᴋautigijangît? Jêsusib oᴋautivait? Âhailâ. Atuarsilaungilasê: Sorusiârsuit amâmaktullo ᴋaningitigut nertordlerneᴋ ilingnik âᴋikpat?

¹⁷ Tagva ᴋemakpait, iglugasaksoarnillo anivok ailunalo Bêtâniamut, tagvanêlerdlunalo.

¹⁸ Uvluble aipangane uvlâkut, ama iglugasaksoarnut aigame, kâlerpok;

¹⁹ Napârtomiglo paungatannaᴋarpaktomik apᴋosiniub saniane takkogame, nelipsarpâ; merᴋutuinalik takkogamiuk, oᴋautivâ: Mattoma kingorngane ilingne perortoᴋarniarungnaimarigle paunganik. Napârtorlo paungatannaᴋarpaktok panersârpok tagvainak.

²⁰ Ilinniartingitalo tamanna takogamitsuk, tataminiarlutiglo oᴋarput: Napârtok una paungatannaᴋarpaktok ᴋanok ilingavâ panersâdlartovinêk?

²¹ Jêsusible kiovlunalo oᴋautivait: Âhamarik, oᴋautivapse, okperneᴋarupse, ᴋolaraselo, napârtok paungatannaᴋarpaktok kissiat taimailiutuinarajangilase; ᴋakᴋamulle ômunga oᴋarupse: ᴋangatarit, imarbingmullo katagit, tâva taimailiorniarpok.

²² Kenuarijaselo tamaita tuksiarnipsingne, okperupse, pilârpase tâva.

²³ Katimavingmullo itermat, ajoᴋertuitilugo, ajoᴋertuijoksuit inuillo angajoᴋângita tikipât oᴋautivlugolo: Kimut perᴋojauvêt taimailiorlutît? Kialônêt pitsartunermik mattominga tunitjivigivâtît?

²⁴ Jêsusible kovlune oᴋautivait: Aperijomavapsetauk oᴋautsemut atautsemut; mattominga oᴋautigupsinga, oᴋautijomagivapse, kimit pitsartuneᴋarnimnik taimailiorlunga.

²⁵ Johannesib baptijutinga nakit pivâ? ᴋilangmillônêt, inungnillônêt? Tagva issumertuivut ingmingne oᴋarlutiglo: ᴋilangmit pijok oᴋautigiguptigo, oᴋautiniarpâtigut: Sôᴋ okperilaungipisiûk?

²⁶ Inungnille pijok oᴋautigiguptigo, inuit erᴋsigijariaᴋarpavut; inuit ilûnatik Johannese nalautaijônasugingmatsuk.

²⁷ Jêsuselo kiovât, oᴋarlutik: Nakit pingmangât nalovavut. Tagva oᴋautivait: Taimaimat oᴋautijomangilapsetauk kimit pitsartuneᴋarnimnik taimailiorlunga.

²⁸ Kanorle issumavisê? Anguteᴋalaukpok maggûngnik ernelingmik, sivorlermullo tikipok, oᴋautivlugo: Ernîk, uvlome sanajartulaurit perorsêvimnut vaineliksatalingmut.

²⁹ Tâpsomale kiovlune oᴋautivâ: Aijomangilanga. Kingorngagullo ᴋaᴋialerame, ailerpok.

³⁰ Aipânullo tikinivok, taimâktauk oᴋautivlugo! Tâpsomale kiovlune oᴋautivâ: Âhaila, Nâlegak! Ainanalo.

³¹ Tâpkoa maggûk neluakita atâtame perᴋojanga malilaukpaûk? Kiovât: Sivorliub. Jêsusib oᴋautivait: Âhamarik oᴋautivapse: pimaklertit anguniarpaktullo Gûdib nâlegauvinganut iterᴋârnersauniarput ilipsingnit.

³² Johannesib tikilaukpâse ajoᴋertorluselo apᴋotiksamik idluartomik, ilipselo okperingilase; pimaklertille anguniarpaktullo okperivât. Tamanna takolauralloarapsiuk, ᴋaᴋialingilase, kingorngagut tâmna okeringmilugo.

³³ Adsiujomik assianik tussaritse: Angajoᴋaᴋalaukpok perorsêviliortomik, vaineliksanik ilijivlune, avatâlo avaluliudlarlugo; paungallo iptêjartauviksanganik sanalaurivok, nuvuguseᴋsoaliorivorlo; perorsêvilerijunullo pimajauᴋogamiuk, nuname assianut aularpok.

³⁴ Paungalle inilerviat naliutilermat, kivgane tilivait perorsêvilerijunut, paunganginik pilerᴋovlugit.

³⁵ Tagva perorsêvilerijut kivgangit tigudlarlugit, ilangat issaᴋavât, ilangat toᴋopât, ilangat ujarᴋanut millorpât.

³⁶ Ama kivgat assingit tiligivait, ununersat sivorlinginit; tâpkoatauk taimailiorivait.

³⁷ Kingorliotilerdlugo ernine tiligivâ taipkonunga oᴋarlunalo: Ernera ileraginiarpât.

³⁸ Perorsêvilerijulle erninga takogamitsuk, ingmingnut oᴋalerput: Tagga kingormgujijuksak; attê toᴋoniarlavut, kingormgutijaksangillo uvagut pigilerlugit.

³⁹ Tiguvât tâva, perorsêvingmillo pingujarlugo toᴋopât.

⁴⁰ Perorsêviuble inuata, tikikune, perorsêvilerijut ikkoa ᴋanok piniarpagît?

⁴¹ Kiovât: Idluitulijoksuit ukkua toᴋoniarpait, perorsêvinalo perorsêvilerijut assinginut, paunganik ᴋaitsiniartunut, inerviat naliutikpat, pimajauᴋojomârpâ.

⁴² Jêsusib oᴋautivait: Atuarsilaungilasê aglangne: Ujarak, igloliortut nachogijangat, tâmna iglub terreᴋoa ujaraulernerpôk? Tagva Nâlekab piniarninga, tatamnadlarporlo ijiptingnut.

⁴³ Tamanna pivlugo oᴋautivapse: Gûdib nâlegauvia aᴋsârnigaujomârpok ilipsingnit, tunijauvlunalo nalojunut paunganginik ᴋaitsijunut.

⁴⁴ Ujarᴋamullo ômunga kataktok, serᴋominiarpok; katagvigijanele ujarᴋab serᴋaliniarpâ.

⁴⁵ Ajoᴋertuijoksuillo Farisêerillo tâpsoma adsiutitsiningit tussaramigit, malugivât, oᴋautigingmagit.

⁴⁶ Tigunasuaralloarpâllo; inuille erksigivait, nalautaijônasugingmatsuk.