Mattêuse 20 - Labrador Inuttitut Heritage Bible

Adsiujomik stundine sunatuinarne senaᴋojaujunik perorsêvingme vainiliksatalingme. Nalautainermik Kristûsib ânianginik. Zebedêusib ernîkita anânangata ᴋenuninganik. Tautungituk maggûk âᴋiktaunîgik.

¹ Gûdib nâlegauvingata adsigivâ iglub inua, uvlârortok sanajuksarsioriartorlune perorsêvingminut vainiliksatalingmut.

² Sanajuksallo angeᴋatigijarêramigit, kênaujamik atautsemik akkileromavlugit, uvluᴋ nâvlugo sanaᴋovlugit, tilivait perorsêvingminut vainiliksatalingmut.

³ Stundik pingjuangne anigame, assingit takovait niuvervingmêtut suliaksaᴋangitut,

⁴ Oᴋautivlugillo: Ilipsetauk aileritse perorsêvingmut vainiliksatalingmut; nâmaktomik akkileromavapse.

⁵ Aivut tâva. Ama anigivok stundit 6 ingane 9 inganalo, taimailiormivlune.

⁶ Stundille 11 ingane ama anigivok, assingittauk suliaksaᴋangitut tikinivait, oᴋautivlugillo: Sôᴋ uvlok nâvlugo suliaksaᴋarase tagvanêᴋisê?

⁷ Oᴋautivât: Tilijeᴋanginapta. Oᴋautivait: Ilipsetauk aileritse perorsêvingmut vainiliksatalingmut; nâmaktomiglo akkilernairpapse.

⁸ Unnulermalle, perorsêviub vainiliksataliub inuata pimaklertokotine oᴋautivâ: Sanajut ᴋaiᴋolugillo akkilikit, pigialerillo kingorlermit sivorlek tikidlugo.

⁹ Tagva stundit 11 ingane sanaᴋojaujut sakᴋerput, ilûnatiglo adsigênik kênaujanik atautsinik pivut.

¹⁰ Sivorlît tikinamik, ununersanik piniarasugivut; tâpkoatauk ilûnatik adsigênik kênaujanik atautsinik pigivut.

¹¹ Atautsemiglo pigamik, perorsêviub inua oᴋarnerlôtilerpât.

¹² Oᴋarlutiglo; Kingorlît makkoa, stundeme atausênarme sanalauktut, uvaptingnut adsiutipatit, uvlub oᴋumainarninganik kiangoninganiglo tukkisilauralloarapta.

¹³ Kiovaille, ilangallo oᴋautivlugo: Ilannâra, akkilênerlugvigingilagit. Angeᴋatigêlaungilagûk kênaujamik atautsemîk?

¹⁴ Kênaujat piuk, aularlutillo! Kingorlerle tâmna iliktut akkileromavara.

¹⁵ Perᴋutimniglônet issumamnik piniartuksaungilangâ? Katalungavêt pitsiarnera pivlugô?

¹⁶ Taimâk kingorlît sivorliojomârput, sivorlîllo kingorliojomârput. ᴋaiᴋojaujut unudlarmatta, anerimajulle ikidlarput.

¹⁷ Jerusalemullo majorarpok; ingergavlutiglo ilinniartine 12 it ingmigolivlugit ingminut pitipait, oᴋautivlugillo:

¹⁸ Ahâk, Jerusalemut majorarpogut, Inûblo Erninga pititaulârpok ajoᴋertuijoksoarnut, aglangniglo ilisimajunut, taipkoalo toᴋotaksautilârpât.

¹⁹ Nalojunullo pitilârpât; taipkoalo mitautigilârpât, issaᴋavlugolo kikiaktulârpât; uvluglo pingajuangne makilârivok.

²⁰ Taipsomane Zebedêusib ᴋitorngangita anânangata ernîngne illagivlugik tikipâ, pâmaktervigivlugolo sumik tuksiarvigivâ.

²¹ (Jêsusiblo) oᴋautivâ: Sumîk pijomavêt? Oᴋautivâ: Ernîkka ikkua iksivaᴋokik nâlegauvingne, aipâ talerpikpît tungâne, aipangalo saumikpît tungâne.

²² Jêsusible kiovâ oᴋarlunalo: Tuksiararijase nalovase. Ermgusiârsub (imanga) imigaksara imerungnarpitikô baptitauniksaralo baptitauniksarijungnaralloarpitikô? Kiovâk: Âhailâ, ajungikalloarpavuk.

²³ Oᴋautivaglo: Ermgusiârsub (imanga) imigaksara imerniaralloarpatik, baptitauniksamnullo baptitaujuksaugalloarpotik, talerpingmale tungâne, saumingmalônêt tungâne iksivajomârnek, uvamnut perᴋojaksaungilak (ilîptingnut), Atâtamale iksivaᴋojangit, taipkoa iksivajomârput.

²⁴ Ilinniartut 10 it tamanna tussaramitsuk, anûjutigilerpakit nukarêk ukkua.

²⁵ Jêsusible ᴋaiᴋovait ingminut, oᴋautivlugillo: ᴋaujimavose, nunab ataningit ataniotingmatta, atanivîllo pitsartuneᴋarmatta.

²⁶ Ilipsele taimaituksaungitose, anginerojomajorle akunapsingne, kivgaulerle ilipsingnut.

²⁷ Angajoᴋaujomajorlo kivgaulerle ilipsingnut:

²⁸ Sorlo Inûb Erninga tikingimat, kivgartortaujomavlune, kivgartoriartorlunele, inôserminiglo tunijivlune unuktut piulijaujutiksanganik.

²⁹ Jerichomillo aularmatta, inugasaksuit malikpât.

³⁰ Ahâglo, tautungituk maggûk apᴋosinerme iksivavuk; Jêsuselo ᴋângiutiniartok tussaramikko, niplialerpuk oᴋarlutiglo: Nâlegak, Davidib Erninga, nâpkigitiguk!

³¹ Inuille inerterpakit, nippangerᴋovlugik. Niplialualerpugle, oᴋarlutiglo. Nâlegak, Davidib Erninga, nâpkigitiguk!

³² Jêsusele nokᴋalerpok, ᴋaiᴋovlugiglo aperivak: Sumîk uvamnit pijomavitîk?

³³ Kiovâk: Nâlegak, ijivuk uititauᴋovlugik.

³⁴ Jêsusiblo nâpkigilerpak, ijîkikullo aktorpak; tagvainarlo ijîgik tautugungnalerpuk; malikpâglo.