Mattêuse 2 - Labrador Inuttitut Heritage Bible

Ilisimajut tuksiarveᴋariartorninginik Jêsusemik. ᴋemânermik Egiptenemut. Herôdesib inuarᴋojininganik sorrusiârsungnik. Jêsuse Nazaretemêdlune.

¹ Jêsuse erniangongmat Betleheme Jûdêamêtome, Herôdese ataniotilugo, ahâk, ilisimajut unangat (nalojut nunanginit) Jerusalemut pivut, oᴋarlutiglo:

² Erniangoᴋamertok Jûdit ataningat nanêᴋâ? Uvlorianga unane takogaptigo, tuksiarvigijartorpavut.

³ Ataniub Herôdesib tamanna tussaramiuk ᴋoaksârpok, Jerusalemiullo ilûnatik;

⁴ Ajoᴋertuijoksuillo aglangniglo ilisimajut tamaita katerᴋolerpait, kiglisiniaromavlugit, Kristûse nane inûlerniarnerartaungmangât.

⁵ Ipkoa oᴋautivât: Betleheme Jûdêamêtome. Imak aglaksimangmat nalautaijomut:

⁶ Igvit Betlehem nuname Jûdêame, mingnerpângungilatit iglugasangnit assingnit Jûdêamêtunit; ilingnit pijomârmat Nâlegak inuᴋotiminut Israêlib kinguvânginut ataniojuksak.

⁷ Tagva Herôdesib angigutjilune ilisimajut ᴋaiᴋovait, aperiniarlugit uvloriamik ᴋanga takotitomik.

⁸ Betlehemut aiᴋovait oᴋarlunalo: Aileritse, nutarârsuk aperᴋutigijartorlugo; nenigupsiuglo, oᴋautigisinga, uvangatauk tuksiarvigijartoromagivara.

⁹ Atanek tussarêramitsuk, aularput. Ahâk, uvloriak, unane takojatik sivorlerivât; nutarârsûblo iningata ᴋolânut pigame, nokᴋarpok.

¹⁰ Uvloriak takolermigamitsuk, ᴋuviasuvaksoadlarput.

¹¹ Iglomullo iterlutik, nutarârsuglo anânangalo naipipakit, pâmakterlutiglo tuksiarvigivât, perᴋutitiglo sakᴋerpait, pililâllo goldemik, tippitsiariksaumiglo kutsumiglo.

¹² Gûdiblo sinnaktomanikut perᴋovait, Herôdesemut uterᴋonagit. Apᴋotigilauktamiglo assiagut nunamingnut angerarput.

¹³ Aularmattale, ahâk, Nâlekab Engelingata Jôsefe sakᴋervigivâ sinnaktomanikut oᴋarlunalo: Makitit, nutarârsuglo anânangalo ilingnut pikik, nunamullo Egiptenemut ᴋemâlerit, taikanêlutillo, uvamnut oᴋautijauᴋârtinak; Herôdesib nutarârsuk toᴋonasuarmago.

¹⁴ Makiporlo tagva, nutarârsuglo anânangalo ingminut pivak, Egiptenemullo ᴋemâvok,

¹⁵ Tagvanêlerdlunalo, Herôdese toᴋotsiarivlugo, Nâlekab oᴋausingit nalautserᴋovlugit nalautaijokut oᴋauserijangit: Ernera ᴋaiᴋolaukpara Egiptenemit.

¹⁶ Herôdese ᴋaujimalerame ilisimajunut tapagijaugame, ᴋaningajâdlalerpok, nutarârsuillo ilûnaita Betlehemêtut erᴋânêtullo, jârilit maggûngnik, nukardlingillo toᴋotaujartorᴋovait, ilisimajut kiglisivigitsialauramigit (inûlervinganik).

¹⁷ Tagva nalautaijub Jeremîasib oᴋausingit nalautsimalerput, oᴋartub:

¹⁸ Râmame nippe tussartauvok ogguadlarnek, ᴋeadlarnerlo kajumidlartok. Râhelib ᴋitorngane ᴋeagivait: manigortaujomangilak ᴋitorngane pivlugit, itsungnairmatta.

¹⁹ Herôdesele toᴋungmat, ahâk, Nâlekab Engelingata Jôsefe sakᴋervigivâ sinnaktomanikut Egipteneme,

²⁰ Oᴋarlunalo: Makitit, nutarârsuglo anânangalo ilingnut pikik, Israêliblo nunanganut utilerit; toᴋungmatta nutarârsungmik toᴋotsijomalauktut.

²¹ Makiporlo tagva, nutarârsuglo anânangalo naksardlugik, Israêliblo nunanganut pivlune.

²² Tussaumagamiugle Arkelause ataniolertok Jûdêame, atâtane Herôdese innangerdlugo, tâvunga ainermik sivôralerpok. Sinnaktomanikut Gûdemut perᴋojauvlune nunamut Galilêamut ailerpok.

²³ Iglugasangnut Nazaretemik atelingnut pivlune, tamanna nunagilerpâ, nalautaijut oᴋausingit nalautserᴋovlugit, oᴋartut: Nazaremiomik ateᴋaromârpok.