Mattêuse 18 - Labrador Inuttitut Heritage Bible

Kristûsib ajoᴋertuininganik. Adsiujomik kivgamik kênaujanik 10,000 nik akkiliksaᴋartomik.

¹ Taipsomane ilinniartut Jêsusemut pivut, oᴋarlutiglo: Kina anginerovâ nâlegauvingme ᴋilangmêtomê?

² Jêsuselo nutakᴋamik ᴋaiᴋojivok ingminut, akornganullo pitipâ.

³ Oᴋarlunalo: Âhamarik, oᴋautivapse: Uteromangikupse, nutakᴋatitun-ingikupse, nâlegauvingmut ᴋilangmêtomut pijomângilase.

⁴ Ingminik tagva nutakᴋatut ôtunak miklilertok, anginerovok nâlegauvingme ᴋilangmêtome.

⁵ Nutakᴋamik taimaitomik illaliortub atimme illaliorivânga.

⁶ Uvamnulle okpertut ukkuararsuit ilanganik sinaungatitsijomut idluarnersauvok, serᴋalitsiviub ujaraktanganik ᴋongasingagut nivingaiviogune, ipititauvlunalo imarbingmut itinersamut.

⁷ Kappianamêk silaksoarmiut, sinaungatitsinerit pivlugit! Sinaungatitsijoᴋatsainartuksaugalloarpok; kappianamêgle inuk taimna sinaungatitsijok.

⁸ Aggakpîlle itikavîllo sinaungatikpatit, nakakit egidlugillo. Ilingnut ajunginersauvok, tussiaklutit, illakungorlutillônêt inôtsemut iteruvit, igluktut aggaᴋarnernit, itigaᴋarnerillônêt igluktut, ikomamullo ᴋamisuitomut egitaunernit.

⁹ Ijivîttauk sinaungatikpatit, pêruk egidlugolo. Ilingnut ajunginersauvok, igluinarmik ijeᴋarlutit inôtsemut iteruvit, maggûngnik ijeᴋarnernit, ikomamullo ᴋamitsuitomut egitaunernit.

¹⁰ Kamatsialeritse, makkoarârsuit ilangat nachoginasiuk! Oᴋaupapsele: Engelingita ᴋilangmêtut Atâtama ᴋilangmiub kênanga takotsainarpât.

¹¹ Inûb Erningata piulijartormagit tammarsimajut.

¹² ᴋanok issumavisê? Inuk 100 nik saugaᴋuteᴋarune, tâpkoalo ilangat tammarpat, 99 it ᴋemagajangilait ᴋakᴋanut, tammartok ᴋeneriartorlugô?

¹³ Neniguniuglo, âhamarik, oᴋautivapse, tâmna ᴋuviasutigiluarpâ assinginit 99 nit, tammarsimangitunit.

¹⁴ Taimâktauk Atâtapse ᴋilangmiub assioᴋojomanginivâ ukkuarârsuit ilangat.

¹⁵ ᴋatangutivîlle idluitulivigikpatit, tagva nelipsaruk inerterlugolo kissipteolutik. Nâlekunitit ᴋatangutit âᴋigêrpok tâva.

¹⁶ Tussangipatille, atautsemik maggûngniglônêt illaᴋalerit, oᴋausise okpernarᴋovlugit, maggôvlutik pinasôvluselônêt oᴋalerupse.

¹⁷ Tussangipase, tamanna illagêktunut oᴋautigiuk. Illagêktullo nâlengipagit, nalojotut pimaklertotullônêt ilinganasugileruk.

¹⁸ Âhamarik oᴋautivapse: Nuname ᴋelaᴋsorniartase ᴋelaᴋsorsimajomârivut ᴋilangme; ᴋelarutjârniartaselo nuname, ᴋelarutjârsimajomârivut ᴋilangme.

¹⁹ Ama oᴋautivapse: Maggûk nuname illagêkunik, sumiglônêt tuksiaromavlutik, pijomajatik pilârpâk Atâtamnit ᴋilangmêtomit.

²⁰ Maggûgle pingasullônêt katimajarangata atimne, akornganêtsomavunga.

²¹ Tagva Pêtrusib aperijartorpâ, oᴋarlunalo: Nâlegak, ᴋatangutiga idluitulijok uvamnut, ᴋapsertorlunga issumaᴋarvigijungairaksarivigô? 7 ertorlunga nâmakᴋâ?

²² Jêsusib oᴋautivâ: 7 ertotuinarnernik oᴋautingilagit, 70 le 7 ertorlugit.

²³ Tamanna pivlugo Gûdib nâlegauvia atanertun-ipok, kiglisiniaromajotut kivgaminik.

²⁴ Kiglisinialermagillo, ilangat sakᴋerpok, akkiliksalik atanerminut kênaujanik 10,000 inik.

²⁵ Akkiksaᴋangimalle, ataningata tâmna, nuliangalo ᴋitorngangillo, perᴋutingillo tamaita pisiniutaukovait, akkilertaujomavlune.

²⁶ Tagva kivgab tâpsoma pâmakterdlune tuksiarvigivâ, Oᴋarlunalo: Atanek, ᴋenuêvigilaunga! Tamaita akkileromavakka ilingnut.

²⁷ Tagva ataniub kivgak tâma nâpkigilerpâ, aularᴋolugolo akkilêᴋojungnairivâ akkiliksanik.

²⁸ Tagva kivgak tâmna anilerpok, naipitsivlunalo kivgauᴋatime ilanganik, akkiliksaᴋarvigijiminik kênaujanik 100 inik; tiguvâ tagva, torᴋojâᴋsivlugolo oᴋautivâ: Akkiliksatit uvamnut akkilikit!

²⁹ Tagva kivgauᴋatingata pâmakterdlune tuksiarvigivâ oᴋarlunalo: ᴋenuêvigilaunga, tamaita akkileromavakka ilingnut.

³⁰ Pijomangilarle, parngnanairsimavingmulle itertitsartorpâ, akkiliksangit tamaita akkilertauᴋârtinagit.

³¹ Kivgauᴋatingitale tamanna takogamitsuk, kiksadlalerput, tamaitalo takojatik oᴋautigijartorpait atanermingnut.

³² Tagva ataningata ᴋaiᴋovâ, oᴋautivlugolo: Kivgakullôjotit, akkiliksatit uvamnut tamaita issumagijungnaipakka, tuksiarvigigamga.

³³ Kivgauᴋatille nâpkigijaksaringiniviûk, sorlo nâpkigilaurapkît?

³⁴ Ataningalo ᴋaningaumajâlerpok, pitilugolo âniatitsijunut, akkiliksangit tamaita akkilertauᴋârtinagit.

³⁵ Taimâktauk Atâtama ᴋilangmiub pijomârivâse, ômatipsingne ᴋatangutipse tammarningit issumagijungnainiangikupsigik.