Mattêuse 17 - Labrador Inuttitut Heritage Bible

Kristûsib ânanausijauninganik. Issumairsimajomik pijungnaititsininganik. Aniaminik oᴋauteᴋarninganik. Kenaujanik nunaliksiutauᴋojanik tunijininganik.

¹ Uvlullo pingasujortut kingorngatigut Jêsusib Pêtruse, Jakôbuselo, nukâlo Johannese ingminut pitipait, majorarᴋatikumavlugit ᴋakᴋamut kingiktomut.

² Ananausijauvorlo sângane, kênangalo seᴋinertut ᴋaumatigilerpok, annorângillo ᴋaᴋorsidlarput ᴋaumaneᴋtut.

³ Ahâglo, Môsesiblo Eliasiblo sakᴋervigivait, oᴋâlavlutik tâpsomunga.

⁴ Pêtrusele Jêsusemut oᴋarpok: Tamâne-itsainarominarpok; pijomaguvit, tamâne pingasunik iglolioromavogut, ilingnut atautsemik, Mosesemullo atautsemik, Eliasemullo atautsemik.

⁵ Sulle taimâk oᴋartilugo, ahâk nuvujab ᴋaumajub ullikpait. Ahâglo, nippe nuvujamit oᴋarpok: Tagga ernera nagliktara, ᴋuviagijara, tâmna nâleksiuk!

⁶ Tamanna ilinniartingita tussaramitsuk, pâmakterput ᴋoaᴋsârlutiglo.

⁷ Jêsusible tikipait, aktorlugillo oᴋautivait: Makititse, erᴋsinaselo!

⁸ Uitaleramigle, inuksingilat, Jêsuse kissiat takovât.

⁹ ᴋakᴋamillo atersâramik, Jêsusib inerterpait oᴋarlunalo: Takojase taimna oᴋautiginiarasiuk inungnut, Inûb Erninga toᴋungajunit makerᴋârtinago.

¹⁰ Ilinniartingitale aperivât oᴋarlutiglo: Sôk aglangik ilisimajut oᴋarᴋât Eliasemik sivorliovlune tikitsomârtomîk?

¹¹ Jêsusib kiovait oᴋautivlugillo: Ilâ, Eliase sivorliojuksauvok, tamaitalo idluarsitilugit.

¹² Oᴋaupapsele: Eliase tikitsarêrpok; ilitaringilâllo, issumamingnulle piniarvigilaukpât. Taimâk Inûb Erninga âniatitaujomârivok tâpkonunga.

¹³ Tâva ilinniartingita tukkisivât, Johannesemik baptiterijomik oᴋautingmagit.

¹⁴ Tikingmattalo inugasaksoarnut, inuk Jêsusemut tikipok, itiganginullo pâmakterpok,

¹⁵ Oᴋarlunalo: Nâlegak ernera nâpkigiuk, ilisimailingajok âniadlarlune; ikomamut imermullo ochoᴋattarame.

¹⁶ Ilinniartingnullo âlaukpara, âᴋigungnangilâlle.

¹⁷ Jêsusible kiovâ oᴋarlunalo: Tata ukkua okpingitut mumiksimajut kinguvângoᴋatigêt, ᴋanok sivitutigijomik najoriaᴋarpapsê? ᴋanok sivitutigijomik ᴋenuêvigijariaᴋarpapse? Kaisiuk uvamnut.

¹⁸ Jêsusiblo Sâtanase inerterpâ, anivorlo tâva tâpsomangat, nukapiarlo stundeme tâpsomane pijungnairpok.

¹⁹ Tagva ilinniartingita kissimiovlutik tikipât oᴋarlutiglo: Sôk uvagut anititsungnangilavût?

²⁰ Jêsusible kiovait oᴋautivlugillo: Okpinginise pivlugo. Âhamarik oᴋautivapse: mustardib karngasûtiksatangatut okperneᴋarupse, ᴋakᴋamut ômunga oᴋatuinariaᴋarpose: Tagvangat nûtit taikunga, nûniarpok tâva, ajugaᴋarniaraselo.

²¹ Taimaitulle (Sâtanasit) aniniangilat, kissiane tuksiarnermullo nerritailinermullo.

²² Galilêamele piniarveᴋartilugit, Jêsusib oᴋautivait: Inûb Erninga pititaujomârpok inuit agganginut.

²³ Tâpkoalo toᴋotsomârpât, uvluglo pingajuângne makitsomârpok. Kiksadlalerpullo.

²⁴ Kapernaumulle pingmatta, kênaujanik ataniub Nunaliksiutauᴋojanganik katersijut Pêtruse tikipât oᴋarlutiglo: Ajoᴋertortipse kênaujak nunaliksiutauᴋojak tunivangilaûk?

²⁵ Oᴋarpok: Aukak. Iglomullo itermat, Jêsusib ingiarpâ oᴋarlunalo: ᴋanok issumavêt, Sîmon? Kikunit atanît nunamêtut kênaujat akkitûtaukojaujut nunaliksiutauᴋojaujullônêt pivakpatigîk? ᴋitorngamingnit takorngartanillônêt?

²⁶ Tagva Pêtrusib oᴋautivâ: Takorngartanit. Jêsusib oᴋautivâ: ᴋitorngat tâva tunijijariaᴋangilat.

²⁷ Ningaijauᴋonagille uvaptingnut, tesseᴋsûb sinânut ainiarit, ᴋargjuksârniglo ningitsilutit; sivorlerlo mingeriak ᴋaᴋitat tiguguk. ᴋaningalo aitartikungne, kênaujamik nagvâlârpotit; tâmna tiguguk, tunilugolo tâpkonunga pivlunga pivlutillo.