Mattêuse 16 - Labrador Inuttitut Heritage Bible

Jônasib nalunaikutanganik. Pêtrusib kigligiutijininganik, angervioninganiglo. Kristûsib âniajomârninganik. Kappiasutiksanik malingnerme Jêsusemik.

¹ Tagva Farisêerit Saduzêerillo tikipât; tâpkoa ôktorpât, takotitserᴋojomavlugo nalunaikutamik ᴋilangmit.

² Kiovaille oᴋautivlugit: Unnugangat oᴋarpakpose: ᴋaukpat silaᴋilârpok, ᴋilak aupallulermat.

³ ᴋaujarangalle oᴋarpakpose: Akᴋunaliomidlarniarpok, ᴋilak aupallulilarmelo nuvujalermat. Ilipse takkormôrtose, ᴋilaub ᴋanoelijarianga ᴋaujimavase, sôkle naliutub tamattoma nalunaikutangit ᴋaujimanginivisigîk?

⁴ Ukkua uivêtut assiniartut nalunaikutamik takojomavut; nalunaikutamigle assianik tunitjivioniangilat, nalautaijub Jônasib nalunaikutanganik kissianik. Tâva ᴋemakpait aularlunalo.

⁵ Ilinniartingillo akianut ikâramik, ᴋakᴋôjanik neksangilat, puigulauramik.

⁶ Jêsusible oᴋautivait: Nâlagitse, udjertorluselo Farisêerit Saduzêerillo ᴋakᴋôjangita pudjusautinganik.

⁷ Tagva issumertorpât ingmingnullo oᴋarlutik: Taimâk pivâtigut, ᴋakᴋôjamik neksalaunginapta.

⁸ Jêsusib tamanna tukisigamiuk, oᴋautivait: Okpernikitose, sôk siaklerutigivisiûk ᴋakᴋôjamik neksanginisê?

⁹ Sulle tukkisingilasê? Erᴋaumangilase ᴋakᴋôjanik tallimanik ipkoninga, 5,000 inût? Amârgaujat ᴋapsit tattalaukpisigîk torᴋorlugillô?

¹⁰ ᴋakᴋôjaniktauk ipkoninga 7 nik? Amârgaujat ᴋapsit tattalaukpisigîk torᴋorlugillô?

¹¹ Sôkle tukkisingilasê, ᴋakᴋôjamik oᴋautinginapse, oᴋarama: Udjertoritse Farisêerit Saduzêerillo ᴋakᴋôjangita pudjusautinganîk?

¹² Tagva tukkisilerput, oᴋangimat, udjertoriaᴋarmatta ᴋakᴋôjat pudjusautinganik, Farisêerille Saduzêerillo ajoᴋertûtinginik.

¹³ Jêsuselo Zesarêab, Filippusib iglugasaksoangita erᴋânut pivok, ilinniartinalo aperivait, oᴋarlunalo: Inuit ᴋanok oᴋarᴋât, Inûb Erninga kinaunasugivatsûk?

¹⁴ Oᴋarput: Ilangita Johanneseonasugivâtit baptiterijok; assingita Eliaseonasugivâtit; ilangita Jeremiaseonasugivâtit, nalautaijullônêt ilangat.

¹⁵ Aperivait: Ilipsele kinaunasugivisingâ?

¹⁶ Tagva Sîmonib Pêtrusib kiovâ oᴋarlunalo: Kristûseovotit, Gûdib ômajub erninga.

¹⁷ Jêsusiblo kiovâ oᴋautivlugolo: Pilorikpotit, Sîmon, Jônasib erninga; uvingub aublônêt mattominga nalojungnaitingilâtit, Atâtamale ᴋilangmêtub.

¹⁸ Oᴋaupagillotauk: Pêtruseovotit, ᴋairtomullo mattomunga illagêktoᴋotikka tungatitsomavakka, taᴋtoksûblo pitsartuningata sâlaginiangilait.

¹⁹ Tunitjivigijomavagittauk nâlegauviub ᴋilangmêtub pêrutânik. Nuname ᴋelaksorniartatit ilûnatik, ᴋelaksorimajomârivut ᴋilangme; ᴋelarutjârniartatillo nuname ilûnatik, ᴋelarutjârsimajomârivut ᴋilangme.

²⁰ Tagva ilinniartine inerterpait, oᴋarᴋonagit kimullônêt Kristûseonerminik.

²¹ Mattoma kingorngagut Jêsusib ilinniartine oᴋautivait Jerusalemut aijariaᴋarnerminik, angajoᴋânullo, ajoᴋertuijoksoarnullo, aglangnik ilisimajunullo âniatitaujariaᴋarnerminik angijomik, toᴋotaujariaᴋarnerminiglo, makitjariaᴋarnerminiglo uvluk pingajuangne.

²² Pêtrusiblo ingminut pitipâ inerterlugolo oᴋautivâ: Nâlegak, anajagilerit, taimailiorvioniarnak!

²³ ᴋeviardlunalo Pêtruse oᴋautivâ: Tunumnut pît, Sâtanase! Sinaungasaramga; Gûdib pingit issumaginginangne, inuit pingit kissêta.

²⁴ Tagva Jêsusib ilinniartine oᴋautivait: Uvamnik maligomajoᴋarpat, issumaminik piniarane, seningajoliksaminik (kappiasûtiksaminiglônêt) nangmarle, maliklungalo!

²⁵ Inôserminik ivlersijomajub assiojijomârmago; inôserminiglo assiojijub pivlunga, nagvâromârpâ.

²⁶ Inûb suksarivaûk, silaksoak ilûnât piksarsiarigalloaruniuk, tarninga asserorpat? Ubvalo, sumîk inuk tunijijungnarᴋâ tarnime satûtiksanganîk?

²⁷ Inûb Erninga tikitsomârmat Atâtame ânanauningane Engeleᴋotine illagivlugit; tagvalo ilûnaita akkiniarvigijomârpait piniarningit maliklugit.

²⁸ Âhamarik oᴋautivapse: Nangertut ovane ilangita toᴋo ôngniangilât, Inûb Erninga nâlegaunermine aggertok takoᴋârnago.