Mattêuse 15 - Labrador Inuttitut Heritage Bible

Inuit Gudiblo perᴋojanginik. Arnamik Kanaanemiomik, 4,000 it nerrititauninganik.

¹ Tagva aglangnik ilisimajut Farisêerillo Jerusalemiut tikipât oᴋarlutiglo:

² Sôk ilinniartivît angajoᴋâpta ilusingit malilungilagît? Aggatik ubvangilait, ᴋakᴋôjaᴋtorniarangamik.

³ Kiovaille oᴋautivlugillo: Sôk ilipse Gûdib perᴋojangit nâlengipisigîk, ilusekulluse pivlugît?

⁴ Gûde perᴋojijok: Atâtangnik anânangniglo nâlektuksauvotit; atâtaminulle anânaminullo oᴋarnerluktok, toᴋotaksauvok.

⁵ Ajoᴋertuivosele: Atâtaminut anânaminullônêt oᴋartok: “Nâmanersauvok ilingnut, tunigupko tunerguservingmut”, tamna ajungitulivok.

⁶ Tamattomunga atâtaminik anânaminiglônêt nâlektailitipase; taimaglo Gûdib perᴋojangit atortaujungnaitipase, ilusekulluit pivlugit.

⁷ Takkormôrtose, Jesaiase ilipsingnik nalautailauralloarpok, oᴋarlunalo:

⁸ Inuit ukkua ᴋanermingnut tikipânga ᴋangasinâmingnullo nertorpânga, ômatingitale ungasikpânga.

⁹ Sulinatigle kivgartorpânga, inuit ajoᴋertûsetuinangit ajoᴋertuitigigamigit.

¹⁰ Inugasaksuillo ᴋaiᴋovait, oᴋautivlugillo: Nâlagitse tukkisilugolo.

¹¹ ᴋanikut itertub inuk sujuktingilâ; ᴋanikulle anijub inuk sujuktipâ.

¹² Tagva ilinniartingita tikipât oᴋaudlugolo: ᴋaujimaviûk, oᴋausek tamanna Farisêerit tussaramitsuk, sinaungakutigingmatsûk?

¹³ Kiovaille oᴋarlunalo: Perortut ilûnatik, Atâtama ᴋilangmiub ililaungitangit, nutsuktaujomârput.

¹⁴ Allarsigik! Tautungitôvut, tautungitullo tâpkoa tessiortigivait; tautungitub tautungiᴋatine tessioruniuk, tamarmik tâva itersamut katakpuk.

¹⁵ Tagva Pêtrusib kiovâ oᴋautivlugolo: Adsiujub mattoma tukkinganik nalojungnaititigut.

¹⁶ Jêsusiblo oᴋautivait: Ilipsetauk sulle silatuneᴋangilasê?

¹⁷ Sulle tamanna nalovisiûk, inûb ᴋaningagut itertut ilûnatik, natjângnut pingmatta, iluserivaktamiktullo anititaulermingmatta?

¹⁸ ᴋanikulle anijut, ômamit pivut, tamakkoalo inuk sujuktipât.

¹⁹ Omamit erᴋarsautikulluit pingmatta, inuarnerlo, nuliarêngnermik asserorsainerlo, assiniarnerlo, tiglingnerlo, sagluterᴋarnerlo, mitauteᴋarnerlo.

²⁰ Tamakkoa inuk sujuktipât. Aggangnulle ubvarsimangitunut inuk nerrigalloarpat, mattoma sujuktingilâ.

²¹ Jêsuse tagva tagvangat aularpok, Tirusiblo Sidoniblo erᴋângnut pivok.

²² Ahâglo, arnak Kanaanemioᴋ, tagvangat pijok, oᴋarpok nipliutidlarlugolo: Nâlegak, Dâvidib erninga, nâpkiginga! Sâtanasib paniga âniatidlarpâ.

²³ Kiungimarikpâle oᴋautsemut atautsemullônêt. Tagva ilinniartingita tikipât, ᴋenuvigivlugo oᴋarlutik: Ikajorunguna, nipliojormatigut.

²⁴ Kiovaille oᴋarlunalo: Tilijaumatuinartunga sauganut tammarsimajunut, Israêlib iglunganit pijunut.

²⁵ Taipsomale pâmaktervigijartorpâ oᴋarlunalo: Nâlegak, ikajunga!

²⁶ Kiovâle oᴋarlunalo: Idluangilak, ᴋitorngaujut ᴋakᴋôjanginik aᴋsârlugit, ᴋingminullo egidlugit.

²⁷ Arnak oᴋarpok: Âhaila Nâlegak, taimaikalloarpok; ᴋingmiârsuille nerrivut karnganerlukunik inuata nerrimârvinganit kataktunik.

²⁸ Tagva Jêsusib kiovâ oᴋautivlugolo: Arnak, okpernît angijôvok! Pijomajarnik pilârpotit. Paningalo stundeme tâpsomane pijungnaipok.

²⁹ Jêsuselo tagvangat aularlune, Galilêab tesseᴋsoanganut tikipok, majorarlunalo ᴋakᴋamut, tagvungalo ingipok.

³⁰ Inugasaksuillo nelipsarpât, tussiaktunik, tautungituniglo, oᴋarungnangituniglo, illakungortuniglo, assinginiglo unuktunik illalit, ilivaillo Jêsusib itigangita sânganut; tâpsomalo âᴋikpait,

³¹ Inuillo tamanna pivlugo tataminiarput, takogamik, oᴋarungnangitut oᴋalermatta, illakungortullo pijungnairmatta, tussiaktullo pisulermatta, tautungitullo tautulermatta; Israêliblo Gûdinga nakoridlarpât.

³² Jêsusible ilinniartine ᴋaiᴋovait, oᴋautivlugillo: Inuit ukkua illapsugidlarpakka, nerᴋiksaᴋaratik uvlunik pingasunik uvamnêngmatta; nerritinagillo aularᴋojomangilakka uvamnit, perlerᴋonagit apᴋome.

³³ Tagva ilinniartingita oᴋautivât: Nakit taimâk unuktigijunik ᴋakᴋôjaᴋsiniarpitâ tamâne inuᴋangitome, inugasaksuit ukkua kâgungnairutiksanginîk?

³⁴ Jêsusible aperivait: ᴋapsinik ᴋakᴋôjaᴋarᴋisê? Kiovât: 7 nik, mingeritjaniglo ikitunik.

³⁵ Inugasaksuillo ikterᴋovait nunamut.

³⁶ ᴋakᴋôjallo ukkua 7 it, mingeritjallo tiguvait, ᴋujalivlunalo avgorpait, ilinniartiminullo tunivlugit; ilinniartingitalo tunivait inungnut.

³⁷ Ilûnatiglo nerrivut kâgungnairlutiglo, amiakullo katersorpait, amârgaujat 7 it tattadllugit.

³⁸ Nerrilauktullo 4,000 iovut angutainait, arnat sorutsillo kitinagit.

³⁹ Inuillo aulartinamigit umiarmut ikivok, Magdalab erᴋânut pivlune.