Mattêuse 14 - Labrador Inuttitut Heritage Bible

Johannesib baptiterijub niaᴋoertauninganik. 5,000 it nerrititauninganik. Imiub ᴋângagut Jêsusib pisungninganik.

¹ Taipsomane Herôdese, nunab illainangane atanek tussaumalerpok Jêsusemik.

² Kivganalo oᴋautivait: Tagva Johannese baptiterijok! Toᴋungajunit makisimagame, taimaitunik tatamnartulivok.

³ Herôdesib Johannese tigulaungmago, ᴋelaksorlugolo, itertilugolo parngnanairsimavingmut, Herôdiase, nukame Filippusib nulianga pivlugo.

⁴ Johannesib oᴋautilaungmago: Idluangilak nuliarigangne.

⁵ Toᴋotsomagalloarpâlo, inuille erᴋsigivait, nalautaijônasugingmatsuk.

⁶ Herôdese inûlervingminik uvloᴋsormat, Herôdiasib paninga oᴋigêserpok tâpkoa sângane. Tamanna Herôdesib ᴋuviagivâ.

⁷ Tamanna pivlugo oᴋautimariklugo oᴋarpok, tunitjivigijomavlugo pijomajanganik.

⁸ Anânaminulle ajoᴋertortaulaukârdlune oᴋarpok: ᴋaitsilerit uvamnut Johannesib baptiterijub niaᴋoanik, pôgutamut ilimajomik.

⁹ Atanerlo kiksalerpok; oᴋamaringninele pivlugo nerreᴋatinalo pivlugit, tâpsominga tunitjivioᴋovâ.

¹⁰ Johanneselo parngnanairsimavingmêtok niaᴋoêrtaujartorᴋovâ.

¹¹ Niaᴋoalo pôgutamut ilimajoᴋ ᴋaitaulerpok, tunijaularmelo niviarsiamut; tâpsomalo âpâ anânaminut.

¹² Tagva ilinniartingit tikiput, timingalo tiguvât, iluveriartorlugo; tamannalo oᴋautigijartorpât Jêsusemut.

¹³ Jêsusib tamanna tussaramiuk, aularpok tagvangat umiakut inuᴋangitomut, inutôjomavlune. Inuille tamanna tussaramitsuk, ᴋutterordlutik malikpât iglugasaksoarnit.

¹⁴ Jêsuselo niugame, inugasaksuillo takogamigit, ilapsugidlarpait, ᴋanimajiangillo âᴋikpait.

¹⁵ Uvluklilermalle, ilinniartingita tikipât, oᴋautivlugolo: Tamâne sunataᴋangimat, uvluklilermallo; inuit makkoa aularlit, niuvervingnut nerᴋiksarsiniariartorᴋovlugit nangminek.

¹⁶ Jêsusible oᴋautivait: Aijariaᴋangilat; ilipse nerᴋiksanginik tunitjivigisigik.

¹⁷ Kiovât: ᴋakᴋôjaᴋarpogut tallimainarnik, mingeriângniglo maggûngik.

¹⁸ Oᴋautivaillo: Kaisigik uvamnut.

¹⁹ Iviksukkanullo inuit ikterᴋovait, ᴋakᴋôjallo taipkoa tallimat mingeriâglo maggûk tiguvait, ᴋilangmullo ârlorpok ᴋujalivlune, ᴋakᴋôjallo avgorpait, ilinniartiminullo tunivlugit; ilinniartingitalo inungnut tunivait.

²⁰ Ilûnatiglo nerrivut, kâgungnairlutiglo, amiakullo katersorpait, amârgaujat 12 it tattalugit.

²¹ Nerrilauktulle angutainait 5,000 iovut, arnallo sorutsillo kitinagit.

²² Jêsusiblo ilinniartine erinesâlerdlugit umiarmut ikiorᴋaᴋolerpait, sivorlerijomagamigit akianut, inuit aularterᴋârnagit.

²³ Inuillo aulartinamigit, inutôvlune ᴋakᴋamut majorarpok, tuksiariartor une. Unnulermallo, tagvane kissimeovok.

²⁴ Umiarlo tesseᴋsûb ᴋerᴋanêlerêput, malliksoarnullo nangialerdlutik, anore aggormatsuk.

²⁵ Pigârvingitale sitamangane Jêsusib tikilerpait imab ᴋangagut pisuklune.

²⁶ Imablo ᴋângagut pisuktok ilinniartingita takogamitsuk, kakkilâdlarput oᴋarlutiglo: Ijoro-una! erᴋsinermullo niplialerput.

²⁷ Tuavidlunele Jêsusib oᴋarvigivait niplerlunalo: Maksualeritse, uvangauvunga, erᴋsinase.

²⁸ Pêtrusible kiovâ oᴋarlunalo: Nâlegak, igvioguvit, ᴋaiᴋolunga ilingnut imab ᴋângagut.

²⁹ Oᴋarporlo: ᴋailerit! Pêtruselo umiarmit niovok, imâgullo pisuklune, Jêsuse tikitsomavlugo.

³⁰ Aᴋᴋunaᴋsoarle takogamiuk, ᴋoaᴋsârpok kivililarmelo niplialerpok, oᴋarlunalo: Nâlegak ikajunga!

³¹ Jêsusible tuavidlune aggane issakpait, tigulâlo oᴋautivâ: Okpernikitotit, sôk inertuivêt?

³² Umiarmullo ikingmanik, ᴋassûmivok tâva.

³³ Umiarmêtulle pâmaktervigijartorpât, oᴋarlutiglo: Âhamarik, Gûdib ernerivâtit.

³⁴ Ikâramiglo, Genêzaretemiut nunanganut pivut.

³⁵ Nunablo tâpsoma inungita ilitarigamitsuk; nunamut ilûnânut tiliklerput; ᴋanimajullo sunatuinait âpait tâpsomunga.

³⁶ Tuksiarvigivlugolo, annorângata sinâ aktortaukovlugo taipkonunga. Ilûnatiglo, tâpsominga aktuijut, pijungnailerput.