Mattêuse 13 - Labrador Inuttitut Heritage Bible

Adsiujunik sunatuinarnik Gudib nâlegauvia pivlugo.

¹ Uvlorme tâpsomane Jêsuse iglomit anigame, tesseksûb kiglinganut ingitjartorpok.

² Inugasaksuillo nelipsarmatsuk, umiarmut ikivok ingilarmelo, inugasaksuit ilûnatik tessesûb kiglinganêtilugit.

³ Sunatuinarniglo oᴋarvigivait adsiujutigut, oᴋarlunalo: Ahâk, karngasuijok karngasuijartorpok.

⁴ Karngasuitilugolo, ilangit apᴋosinermut katakput, tingmitjallo pukkumalukpait.

⁵ Ilangillo ᴋairtomut ivjokitomut katakput; perortersârpullo, ivjokinamik.

⁶ Seᴋinerle nuingmat, kunorlersârput, amâᴋanginamiglo pannilerput.

⁷ Ilangit katakput ukpigait kakilautilit akornganut; ukpigaillo kakilautilit, peroramik, toᴋopait.

⁸ Ilangillo katakput nunamut ivjoriktomut, perorsiaksaᴋalerpullo sulugainermingne: ilangit 100 nik, ilangit 60 nik, ilangit 30 nik.

⁹ Tussâjungnik siutelik tussarle.

¹⁰ Ilinniartingitalo tikipât oᴋarlutiglo: Sôk adsiujutigut oᴋarvigivigît?

¹¹ Kiovait oᴋautivlugillo: Ilipse Gûdib nâlegauvingata nalonarninganik ᴋaujititauvose; taipkoale tamattominga tunitjiviongilat.

¹² Peᴋartok tunitjivioniarpok peᴋaluarᴋovlugo; peᴋangitorle aᴋsârtauniarpok pinganik.

¹³ Tamanna pivlugo adsiujutigut oᴋarvigivakka. Ijinut uitajanut tautungimatta, siutinullo angmajunut tussangimata; tukkisinatiglo.

¹⁴ Taipkonungalo Jesaiasib nalautainingit nalautsimalerput, imaitut: Siutipsingnut tussaromârpase, tukkisinagolo; ijipsingnullo takojomârpase ilitarinagolo.

¹⁵ Inuit ukkua ômatingit mangaidlarmata, siutimingnullo tussânerludlarput sikungilarmiglo; ijimingnut takoᴋonagit, siutimingnullo tussarᴋonagit sâgiarᴋonagillo ikajortauvlutik uvamnut.

¹⁶ Piloridlarpulle ijise, tautukamik, siutiselo, tussâgamik.

¹⁷ Âhamarik, oᴋaupapse: Nalautaijut idluartullo unuktut takojase takojomadlalaukpât, takolaungnagolo; tussâjaselo tussaromadlalaukpât, tussalaungnagolo.

¹⁸ Mâna adsiujok tussarsiuk karngasuijomik:

¹⁹ Tussartokarpat oᴋautsinik nâlegauvingmik, tukkisinagillo, tagva Sâtanasib oᴋautsit pêjariartorpait ômatânut karngautigimajut; tâmnauvok, apᴋosiniub senianut karngautigimajok.

²⁰ Karngautigimajok ᴋairtomut ivjokitomut, tâmnauvok, oᴋautsinik tussartok, ᴋuviasuklunalo tamakkoninga illaliorsârtok.

²¹ Amâᴋanginamele ilumine, nakimarnivok; kappianartokalerangat unangmiklertokalerangallônêt oᴋausek pivlugo sinaungasarailerpok.

²² Ukpigaille kakilautilit akornganut karngautigimajok, tâmnauvok, oᴋautsinik tussartok, silaksûblo mattoma pinginik siaklernerub, akluitsomanerublo uivêrinarningata oᴋautsit ipitipait, sulugainertâranalo perorsiaksatalingnik.

²³ Ivjoriktomulle karngautigimajok, tâmnauvok, oᴋautsinik tussartok tukkisivlunalo, sulugainertârlunalo perorsiaksatalingnik; ilangat 100 lingnik, ilangalle 60 lingnik, ilangat 30 lingnik.

²⁴ Adsiujub tâpsoma assianik oᴋarvigivait oᴋarlunalo: Gûdib nâlegauvia inuktun-ipok, perorsiaksamaringnik karngasuijotut perorsêvingminut.

²⁵ Inuille siniktilugit, akkerartorte perornerluktuksanik karngasuijartorpok perorsiaksamarît akornganut, aulalarmelo.

²⁶ Perorsiaksamarît perormatta singaileᴋalilarmiglo; perornerluktokulluittauk nuilerput.

²⁷ Kivgat tagva angajoᴋâmingnut tikiput, oᴋarlutiglo: Nâlegak, karngasuilaungilatît perorsiaksamaringnik perorsêvingnût? Nakit perornerluktuksaᴋarnerᴋâ?

²⁸ Kiovait: Akkerartortib âsit tamanna pivâ. Kivgangita oᴋautivât: Uvaptingnulle tamakkoa nusugiartorᴋovigît?

²⁹ Kiovait: Aukak, perorsiaksamarît nusuᴋassiutiniarasigik, perornerluktokulluit nusulerupsigik.

³⁰ Tammarmik perorᴋatigêkilit, katersivik naliuterᴋârtinago: katersivigle naliutilerpat, kibluijut oᴋautigomavakka: Perornerluktokulluit katerᴋârsigik, ᴋepidlugillo ikoalaklugit; perornitsiariktulle katersorsigik ᴋematulivimnut.

³¹ Adsiujomik assianik oᴋarvigivait, oᴋarlumelo: Gûdib nâlegauvia mustardib karngasûtiksatangatut-ipok; inuk tâpsominga tigusivok ilivlugolo perorsêvingminut.

³² Unârsuk mingnerovok perorsiaksanit tamainit; perorangamele anginerovok assiminit perorsianit makpatâvangnit, napârtôlerlunalo, tingmitjallo ᴋilaub atânêtut ineᴋariartorput akerungita akorngane.

³³ Adsiujomik assianik oᴋarvigivait: Gûdib nâlegauvia ᴋakᴋôjat pudjusautingatut-ipok; arnak tâpsominga tigusivok akkudlugolo sanaugarmut, ôktut pingasuertorlugo, pudjutipâlo ilûnât.

³⁴ Tamakkoninga tamainik Jêsus oᴋarpok inungnut adsiujutigut, adsiujulle atornagit oᴋarvigingilait.

³⁵ Nalautaijub oᴋausingit nalautsilerᴋovlugit, oᴋarmat: Adsiujunik oᴋaromavunga, silab pigiarninganit nalonalauktut unipkautigivlugit.

³⁶ Tagva Jêsusib inuit aularᴋovait, angergarlunalo. Ilinniartingitalo tikipât, oᴋarlutiglo: Adsiujomik mattominga nalojungnaititigut, perornerluktokulluit perorsêvingmêtut pivlugit.

³⁷ Kiovait oᴋautivlugillo: Perornitsiariktuksanik karngasuijok tagva Inûb Erninga.

³⁸ Perorsêvik tagva silaksoak. Perornitsiariktut tagva nâlegauvingme ᴋitorngaujut. Perornerluktut tagva ajortub ᴋitorngangit.

³⁹ Akkerartorte ukkuninga karngasuijok tagva Sâtanase. Katersivik tagva silaksûb mattoma naggatiksanga. Kibluijut tagva Engelit.

⁴⁰ Sorlo inuit nusujôngungmagit perornerluktut, ikomamullo ikoalaklugit, taimaitsomârivok silab mattoma naggatiksangane.

⁴¹ Inûb Erningata Engeline tilijomârpait; taipkoalo sinaungajut tamaita idluitulijullo katitsomârpait.

⁴² Kiaksaumullo ikomalingmut egitsomârpait; tagvane ᴋeavaksoadlarneᴋaromârpok aglerulârneᴋaromârlunalo.

⁴³ Idluartulle seᴋinertut ᴋaumatigijomârput Atâtamik nâ. legauviane. Tussâjungnik siutelik tussarle.

⁴⁴ Ama Gûdib nâlegauvia perᴋutemariktut ivlernartotut, perorsêvingme ijersimajotun-ipok. Inûb tâmna nagvâleramiuk ijerpâ; ᴋuviasungnermullo perᴋutine tamaita niorvgutigivait, perorsêviglo tâmna pisiarivlugo.

⁴⁵ Ama Gudib nâlegauvia niuverniartotut, ajungitunik sapangaksiortotun-ipok.

⁴⁶ Sapangarlo pivianartok nagvâramiuk, perᴋutine tamaita niorvgutigivait, tâmna pisiarivlugo.

⁴⁷ Ama Gûdib nâlegauvia nulutjatitut, imânut ningititaumajutitun-ipok, sunatuinarnik nuluartitsivaktutitut.

⁴⁸ Tattatarangatale, sitjamut ᴋakᴋitipait, ikterdlutiglo ajungitut katilerpait ᴋattaujamut, piungitulle egipait.

⁴⁹ Taimaitsomârivok silaksûb naggatiksangane. Engelit avititsartoromârpait idluitut idluartunit,

⁵⁰ Egidlugillo kiaksaumut ikomalingmut; tagvane ᴋeavaksoadlarneᴋaromârpok aglerulârneᴋaromârlunalo.

⁵¹ Jêsusiblo aperivait: Tamakkoa tamaita tussâvisigîk? Kiovât: Ahaila, Nâlegak.

⁵² Tagva oᴋautivait: Tamanna pivlugo aglangnik ilisimajut naliat, nâlegauvingmik ᴋilangmêtomik ilisimajoᴋ, angajoᴋâtut, perᴋuteᴋarvingminit nutâniglo nutaungituniglo sakᴋertitsijotun-ipok.

⁵³ Jêsusiblo adsiujut tamakkoa nâgamigit, tagvangat aularpok.

⁵⁴ Nunaminut pivlune, katimavingine ajoᴋertorpait; tataminialerpullo oᴋarlutiglo: Oma silatunine tatamnartulininalo nakit pivagît?

⁵⁵ Igloliortib erneringilaûk? Anânanga Marîamik atteᴋangilâᴋ? Katangutingillo Jâko, Jôseselo, Sîmonalo, Jûdaselo;

⁵⁶ Najangillo, ilûnatik uvaptingnêngilât? Nakit tamadja ilûnât pivaûk?

⁵⁷ Sinaungajutigivâllo. Jêsusible oᴋautivait: Nalautaijok nunaᴋatingita iglomioᴋatingitalo kamaginginersarivât assinginit tamainit.

⁵⁸ Tagvanalo unuktunik tatamnartulingilak okpinginingat pivlugo.