Mattêuse 12 - Labrador Inuttitut Heritage Bible

Jêsusib sernârninganik ilinniartiminik. Aggait toᴋungajut âᴋikpait Sabbateme. Kigusingit ajoᴋertusingillo.

¹ Taipsomane Jêsusib perortut ᴋakᴋôjaksat apᴋotigivait Sabbateme; ilinniartingillo kâleramik, sulugainernik nusuksivut nerrivlutiglo.

² Farisêerit tamanna takogamitsuk, oᴋautivât: Ahâk ilinniartitit Sabbateme pijaksaungitomik piniarput.

³ Oᴋautivaille: Atuarsilaungilasê Davidib iliorninganik, kâlerame, ilangillô?

⁴ Gûdib iglunganut iterame, ᴋakᴋôjallo takojaksat nerrivait; nerrivlugit perᴋojaungigalloarame, ilangillônêt, ajoᴋertuijut kissimik?

⁵ Perᴋojanelônêt atuarsilaungilasê, ajoᴋertuijut Sabbateogalloartilugo katimaviksoarme Sabbatemik sujukserᴋôrninginik, passidlaartaunatiglô?

⁶ Oᴋaupapsele; tamânêtoᴋarpok katimaviksoarmit anginersaujomik.

⁷ Tamannale ᴋaujimagupsiuk sunaumangât: nâpkiningnek ᴋuvigivara, tunergutit pinagit, passijaksaungitut passidlarajalaungilase.

⁸ Inûb Erninga Sabbatemuttauk Nâlegauvok.

⁹ Tagvangallo sivumuarame, katimavinganut iterpok.

¹⁰ Ahâglo, inuᴋarpok tagvane aggalingmik iglunginik toᴋungajunik. Apersorpâllo oᴋarlutik: Sabbateotilugo inûlikleriaᴋ idluarᴋâ? Passitiksarsiorlutik tâpsomunga.

¹¹ Oᴋautivaille: Nelipse, saugatuamik piliub, itersamut katakpat Sabbateme, tigunago ᴋagvertinasuangipaûk?

¹² ᴋanok angitigijomik tagva inuk saukamit ivlernarnersaungilâk? Tamanna pivlugo ajungituliak Sabbateme idluingilak.

¹³ Tagva inuk tâmna oᴋautivâ: Aggaktit issakit. Issakpaillo; âᴋiktaulerpullo iglungititut ilivlutik.

¹⁴ Tagva Farisêerit anivut oᴋaᴋatigêlerdlutik ilioriaᴋarnermingnik inuaromavlugo.

¹⁵ Jêsusible tamanna tukkisigamiuk, tagvangat aularpok. Inugasaksuillo malingmatsuk, ilûnaita âᴋikpait,

¹⁶ Inerterpaillo, oᴋautaujomanane inungnut.

¹⁷ Nalautsilerᴋovlugit nalautaijub Jesaiasib oᴋausingit, oᴋarmat:

¹⁸ Ahâk, tagva kivgara, anerilauktara nagligijaralo, tâmna tarnima ᴋuviagijanga: Anernimnik ilijivigijomavara, nalojullo oᴋâlaviginiarpait idluarnermik.

¹⁹ Aivajomananalo ᴋaggudlarniangilak, nippingalo tussartauniangilak apᴋosineâlungine.

²⁰ Iviksoak suvlolik naviksimajok serᴋomimaringniangilâ, mannerlo aumalik ᴋaminianginivâ, idluarnek ajugaᴋangitilerᴋârnago.

²¹ Atingalo nalojut nerriuginiarpât.

²² Tagva Sâtanaselingmik tautungitomik oᴋarungnangitomiglo tâpsomunga âtsivut; pijungnaitilugolo, tautungitok oᴋarungnangitorlo oᴋalertipâ tautulertilugolo.

²³ Inuillo ilûnatik tataminiarput, oᴋarlutiglo: Tâmna Davidib Erneringilaûk?

²⁴ Farisêerille, tamanna tussaramitsuk, oᴋarput: Sâtanasit anitipait, Beelzebubib, Sâtanasit ataningata, pitsartuninganut kissianut.

²⁵ Jêsusible issumangit ᴋaujimagamigit, oᴋautivait: Ataniovît nalît ingmingnut illagêgungnairtut nunguniarput; iglugasaillo iglullônêt nalît ingmingnut illagêgungnairtut, sôngojungnairput.

²⁶ Sâtanasib Sâtanaseoᴋatine anitikuniuk, ingminut akkerartorpok; ᴋanorle ataniovinga soᴋosinginajarᴋâ?

²⁷ Uvangale tagva Sâtanasit anitikupkit Beelzebubekut, kinakut ᴋitorngapse anitipatigîk? Tamanna pivlugo taipkoa erᴋartortigijomârpase.

²⁸ Sâtanasille Gûdib Anerningagut anitikupkit, Gûdib nâlegauviata tagva tikisimavâse.

²⁹ ᴋanorlônêt sangijoksûb iglinganut inuk iterajarᴋâ, perᴋutinginiglo aᴋsârdlugo; sangijoksoak ᴋelaksorᴋâruniuk kissiane, kingorngagut tâva iglungata perᴋutitangit aᴋsârnigarilugît?

³⁰ Uvamnik illaᴋaromangitub akkerartorpânga, katersoiᴋatigingitaralo siamartitsivok.

³¹ Tamanna pivlugo oᴋaupapse: Inuit ajorningit mitauteᴋarningillo tamaita issumagijaujungnairomârput; Anernermigle ajunginermit inuit mitauteᴋarningit issumagijaujungnainiatsangilat.

³² Inûblo Erninganik oᴋauteᴋaluktok issumagijaujungnainiarpok. Anernermigle ajunginermik oᴋauteᴋalûtilik issumagijaujungnainiangilak, naliutomelônêt tamattomane, naliutomelônêt pijomârtome.

³³ Napârtomik ajungitomik ilijigupse, ajungitunik paungaᴋarniarpok; napârtomigle piungitomik ilijigupse, piungitunik paungaᴋarniarpok. Paunganginit napârtok ilitarijauvok.

³⁴ Ilipse ᴋuglugiangojârtut ivajangit, ᴋanok ajungitunik oᴋarungnarᴋisê, piungitôgapsê? Omatib tattajutinginik ᴋanek oᴋasôngovok.

³⁵ Inuk ajungitok ajungitunik sakᴋertitsivok ômatime tattatjutinginit ajungitunit; inuglo piungitok piungitunik sakᴋertitsivok ômatime tattatjutinginit piungitunit.

³⁶ Oᴋaupapsele, uvluksak erᴋartuivik naliutikpat, inuit kiojuksaujomârmatta oᴋautsitik piungitut ilûnaita pivlugit.

³⁷ Oᴋautsitit maliklugit idluarnerartaujomârpotit, oᴋautsitillo maliklugit erᴋartortaujomârpotit.

³⁸ Tagva aglangnik ilisimajut Farisêerillo ilangit kiovut oᴋarlutiglo: Ajoᴋertuijok, nalunaikutamik takojomadlarpogut ilingnit,

³⁹ Kiovaille oᴋautivlugillo: Ukkuarâluit assiniartut nalunaikutamik takojomavut; tunitjivioniangilalle nalautaijub Jônasib nalunaikutangata assianik.

⁴⁰ Sorlo Jônase uvlune pingasune unnuanalo pingasune arviub nânganêlaungmat; taimâktauk Inûb Erninga uvlune pingasune unnuanalo pingasune nunab iluanêtsomârpok.

⁴¹ Ninivemiut uvluksame erᴋartuivingme kinguvângoᴋatigêt ukkua illagivlugit sakᴋeromârput, erᴋartorlugillo; Jônasib oᴋâlaningit maliklugit ᴋaᴋialeramik; ahâglo, tamânêtoᴋarpok Jônasemit anginersaujomik.

⁴² Uvluksame erᴋartuivingme kinguvângoᴋatigêt ukkua illagivlugit ataniub nulianga ângat pijok sakᴋeromârpok erᴋartorlugillo; nunamit ungasiktomêtomit pigame, Salomob silatuninga tussariartorlugo; ahâglo, tamânêtoᴋarpok Salomomit anginersaujomik.

⁴³ Anernek idluitok inungmit anigame, ingergavok sunaᴋangitokut, merngoerserviksarsiorlune, nagvâranalo.

⁴⁴ Oᴋarpok tagva: Iglumnut ᴋemalauktamnut uteromavunga. Tikinamiuglo pêjaiviomajok sannersimajorlo pinnarnarsimajorlo tikipâ.

⁴⁵ Tagva ailerpok, anernernik assiminik 7 nik, ingminit ajornersaujunik illaksarsivlune; iteramiglo tagvanêtualerput; kingorngagut inuk tâmna ajulualerpok sivorlermit. Taimâktauk kinguvângoᴋatigêt kassêtoᴋsuit ukkua itsomarivut.

⁴⁶ Sulle taimâk inungnut oᴋâlatilugo, ahâk anânangalo ᴋatangutingillo angutit silatânêput, oᴋaᴋatigijomavlugo.

⁴⁷ Tagva ilangata oᴋautivâ: Ahâk, anânat ᴋatangutitillo angutit silatânêput, oᴋaᴋatigijomavlutillo.

⁴⁸ Tamattomingale oᴋautjine kiovâ: Kina anânagâ? Kikkullo ᴋatangutikkâ?

⁴⁹ Agganalo issaklugit ilinniartiminut, oᴋarpok: Ahâk tagga anânagâ ᴋatangutikkalo.

⁵⁰ Atâtama ᴋilangmêtub pijomajanganik maliktok, tâmna nukarivara, najagivaralo, anânagivaralo.