Mattêuse 11 - Labrador Inuttitut Heritage Bible

Johannesib ilinniartingita tilijauninginik Kristûsemut. Kristûsib kigligiudjininganik Johannese pivlugo. Iglugasait Galilêamêtut suarutigivait. Atâta nertorpâ. Ingminut ᴋaiᴋojivok.

¹ Jêsusiblo perᴋojane tamakkoa ilinniartiminut 12 inut nâgamigit, tagvangat aularpok, ajoᴋertuivlunalo oᴋâlajartorpok iglugasaksoangine.

² Johannesele Kristûsib piniarninginik tussarame parngnanairsimavingmêdlune, ilinniartiminit maggûngnik tiliklerpok,

³ Aperijauᴋovlugo: Tâmnauvêt tikituksak, assingniglônêt nerriugijaksaᴋarpitâ?

⁴ Jêsusib kiovak, oᴋautivlugiglo: Johannese ama oᴋautijartortikko takojaptingnik tussartaptingniglo:

⁵ Tautungitut tautulerput, tussiaktullo pisulerput, kaladlartut kalagungnairput, tussângitut tussalerput, toᴋungajut ômarput, aklujullo oᴋautjauvut oᴋautsinik tussarnertunik.

⁶ Piloridlarporlo sinaungajuteᴋalungitok uvamnik.

⁷ Utermanik, Jêsuse oᴋalerpok inungnut Johannesemik: Inuᴋangitomut suna takojartorpisiûk? Iviksoak anorib aulatanga sunatuinarmût?

⁸ Sunalônêt takojârtorpisiûk? Inuk annorâtsiariktok takojomavisiûk? Ahâk, annorâtsiariktut, atanersuit iglunginêsôngovut.

⁹ Sunalônêt takojartorpisiûk? Nalautaijok takojomavisiûk? Ila, oᴋautivapse, nalautaijomit anginersaujok.

¹⁰ Tâmnaungmat aglait oᴋautigijangat: Ahâk, Engeliga sivunernut tilivara, apᴋutiksarnik sivunerne âᴋiksoijuksak.

¹¹ Ahâk, oᴋautivapse: Arnanit erniangojoᴋangilak Johannesemit baptiterijomit anginersaujomik; mingnerle Gûdib nâlegauviane anginersauvok tâpsomangat.

¹² Johannesible baptiterijub uvlungita kingorngatigut, sulle tagvunga, nâlegauvik ᴋilangmêtok aᴋsorôtjauvok; tâpsomingalo aksorôtjijut, amualerpât ingmingnut.

¹³ Perᴋojat nalautaujullo ilûnatik nalautsilaungmatta Johannese tikidlugo.

¹⁴ Tamannalo okperijomagupsiuk: tagva Eliase tikituksak.

¹⁵ Tussâjungnik siutelik tussarle.

¹⁶ Inuille ukkua kimut adsiutitaksarivakkâ? Sorrutsit adsigivait, iglut akorngane iksivajut nipliutjeᴋattartullo pingoarᴋatimingnut,

¹⁷ Oᴋarlutiglo: Nipjausijarvigilaukpapse, oᴋigêseromangitoselo; kiksanartomiglo oᴋautilaukpapse, ᴋeajomangitoselo.

¹⁸ Johannese tikitok, nerrinanalo imingilak; tagva oᴋarput: Sâtanaseᴋarpok.

¹⁹ Inûb Erninga tikisimavok, nerrilarmelo imilarmelo; tagva oᴋarput: Ahâk, inuk una nerritojoᴋsoak, vainemiglo imertojoᴋsoak, pimaklertit idluitulijullo ilanârijingat! Gûdible ilisimaninga idluarijaujariaᴋarpok ᴋitorngaminut.

²⁰ Tagva iglugasaksuit uningit suadlalerpait, tatamnartuliviginerpârilauktane, âᴋilaungimattalo.

²¹ Kappianamêk, Korazin! Kappianamêk Betsaida! Tirusemelo Sidonemelo taimaitunik tatamnartunik pijokalaukpat, sorlo ilipsingne; itsak pôksaijatuinarnik annorâᴋardlutik argjamêdlutiglo ᴋaᴋialerajalaukput.

²² Oᴋautivapsele: Tiruselo Sidonalo pitlartaunikinersaujomârput ilipsingnit uvluksame erᴋartuivingme.

²³ Igvillo Kapernaum, ᴋangatarsimajotit ᴋilak tikidlugo, kappianartovingmut kanunga ajaktortaujomârpotit. Sodomame taimâk angitigijunik tatamnartokalaukpat, sorlo ilipsingne, sulle uvlome asserortautailinajalaukput.

²⁴ Oᴋautivapsele: Sodomamiut nunangat pitlartaunikinersaujomârpok ilingnit uvluksame erᴋartuivingme.

²⁵ Taipsomane Jêsuse oᴋalerpok: Atâtak, ᴋilaublo nunablo nâlegangak, nakorivagit, ilisimajunut silatujunullo tamanna angigutjutigigangne, nutaᴋᴋatitun-itunullo nalojungnaitijutigigangne.

²⁶ Ilâ, Atâtak, taimâk sângne idluarᴋolaurangne.

²⁷ Tamaita Atâtab tunilaukpait uvamnut. Ernermiglo ilitarsijokangilak, Atâtab kissime ilitarivâ; Atâtamiglo ilitarsijokanginivok, Ernerub kissime, Ernerublo nalojungnaititsomajangita ilitarivât.

²⁸ ᴋaititse uvamnut tamapse, ajulertose kappiasuktoselo, nakoᴋsititsomavapse.

²⁹ Nangmautara ilipsingnut pisiuk, ilinniarvigivlungalo; ᴋenuênama piojorijuilarmalo ômatimne; tagva merngoerserviksarsiniarpose tarnipsingnut.

³⁰ Nangmautara idluarmat, nangmagaralo oᴋipok.