Mattêuse 10 - Labrador Inuttitut Heritage Bible

Apostelit tilijaulerninginik tatamnartulijartorᴋovlugit.

¹ Ilinniartinalo 12 it ingminut ᴋaiᴋovait, pitsartuneᴋartilaitalo anernernut maᴋojungnartunut, anititserᴋovlugit tamakkoninga; ᴋanimajuniglo sunatuinarnik atsuiliungituniglo sunatuinarnik pijungnaititserᴋovlugit.

² Apostelit 12 it atingit tamadja: Sivorlek Sîmon, Pêtrusemik taijak; nukâlo Andrêase; Jâkobuse, Zebedêusib erninga nukâlo Johannese.

³ Filippuse, Bartolomêuselo; Tômase, Mattêuselo pimaklerte; Jâkobuselo Alfêusib erninga, Lebbêuselo, Taddêusemik atipsâlik;

⁴ Sîmon Kanamiok, Jûdaselo Iskâriot, Jêsusib pititigijomârtanga.

⁵ Tâpkoa 12 it Jêsusib tilivait, perᴋolaitalo oᴋautivait: Nalojut apᴋosininginut ainiarase, Samâriamiullo iglugasaksoanginut iterniarase!

⁶ Aititsele sauganut tammarsimajunut, Israêlib iglunganit pijunut.

⁷ Ajoᴋertuijartorlusele oᴋaritse: Nâlegauvik ᴋilangmêtok ᴋanitomut tikisimavok.

⁸ ᴋanimajut âᴋidlarsigik, kaladlartut kalagungnaitisigik, toᴋungajut ômartisigik, sâtanasit anitisigik! Akkeᴋangitomik pigapsiuk, akkeᴋangitomik tunisiuk!

⁹ Goldemiglônêt silberemiglônêt kanujamiglônêt tapserumiutaᴋartuksaungilase.

¹⁰ Taᴋoaᴋauteᴋarniaraselo ingergaluse, annorâlijarniarasetauk maggûngnik, itigagutipsâlijarniaraselo, ajaupialijarniaraselo. Sanajok nerᴋiksanganik tunitjiviojariaᴋarpok.

¹¹ Iglogasaksoarnut iglugasangnullônêt iterupse, kiglisiniaritse, tagvane itervigijaujariaᴋartokarmangât, tâpsomanêtsainaritselo aularᴋârase.

¹² Iglomulle iterupse, iglub tamattoma inungit salutisigik.

¹³ Tamattomalo iglub inungit taimailioraksaukpatta, ulapirsautise tâpkonunga piniarpok. Taimailioraksaungipattale, ulapirsautipse uterviginiarpâse.

¹⁴ Ilangitalo illalioromangipase, oᴋausiselo tussaromanagit: anititse tagvangat iglomit iglugasaksoarnillônêt; itikapselo sanningit katerarsigik.

¹⁵ Âhamarik oᴋautivapse: Sodomamiut Gomorramiullo nunâgik pitlartaunikinersaujomârpuk uvluksame erᴋartuivingme, iglugasaksoarnit ukkonangat.

¹⁶ Ahâk, saukatitut tilivapse amarᴋut akornganut; tamanna pivlugo silatutsiaritse ᴋuglugiangojârtutitut, nalangainaselo taubititut.

¹⁷ Inungnigle ilimasugitse; kiglisiniarvingmingnut âtsomârmase, issaᴋavluselo ilinniarvingmingne.

¹⁸ Atanernullo atanersoarnullo âtsomârpâse pivlunga, taipkoa nalojullo nalojungnairutiksanginut.

¹⁹ Atsomârpasele, sivôraniarase, ᴋanok sumiglônêt oᴋausiksaᴋarniarmangâpse; stundeme tâpsomane tunitjivioniarapse kigusiksapsingnik.

²⁰ Ilipsingnit oᴋanginapse, Atâtapsele Anerningata oᴋartipâse.

²¹ ᴋatangutible ᴋatangutine toᴋomut pititsomârpâ, atâtablo ernine, ᴋitorngallo angajoᴋâtik ileratsautijomârpait, toᴋoᴋovlugillo.

²² Ilûnatiglo ômigijomârpâse, attera pivlugo. Soᴋosijuitorle naggatiksamut piulijaujomârpok.

²³ Iglugâsaksuille ilangine unangmikpase, assinginut ᴋemâtitse. Âhamarik, oᴋautivapse: Israêlitit iglugasaksoangit ingergajarêrviginiangilase, Inûb Erninga tikerᴋârtinago.

²⁴ Ilinniartok ilinniartitsijiminit anginersaungilak, kivgarlônêt nâlekaminit anginersaunginivok.

²⁵ Ilinniartok ilinniartitsijimitun-ikune, kivgarlo nâlekamitunikune, nâmaksivok. Iglub inua Beelzebumik taigamitsuk; anginersamik iglomioᴋatingit taimâk tainajangilagît?

²⁶ Tamanna pivlugo erᴋsiginiarasigik. Sagvangitoᴋangilak sakᴋertitauniangitomik, angigutjuteᴋangilarlo ᴋaujijauniangitomik.

²⁷ Tâᴋtome uvamnit tussartase oᴋautigisigik ᴋaumajome. Issibjutaujut tussartase, oᴋautigisigik iglut ᴋângine.

²⁸ Erᴋsiginiarasigiglo timinik toᴋotsijut, tarninigle toᴋotsijungnangitut. Anginersamigle taimna erᴋsigisiuk, timiniglo tarniniglo asserortitsijungnartok ânianartovingme.

²⁹ Kutsertak maggûk kênaujârsungmik atautsemik akkeᴋarpangilâk? Ukkoa ilangallônêt nunamut katangniangilak, Atâtapse perᴋungipago.

³⁰ Niaᴋupse nujangille kititaumavut.

³¹ Tamanna pivlugo erᴋsiniarase; kutsertavaksoarnit akkitugijaunersaungijaidlarpose.

³² Tamanna pivlugo, uvamnik oᴋausilik inungnut, oᴋautigijomavara Atâtamnut ᴋilangmêtomut.

³³ Uvamniglo missiutilik inungnut, missiutigijomavaratauk Atâtamnut ᴋilangmêtomut.

³⁴ Ulapirsaijartorasuginiarasinga nunamut. Ulapirsaijartungilanga, saviksoarmigle pititsivunga.

³⁵ Tikinama, ernek akkerartortidlugo atâtaminut, paniglo anânaminut, ukuarlo sakiminut.

³⁶ Inûblo iglomioᴋatine ômigijigijomârpait.

³⁷ Atâtaminik anânaminiglônêt uvamnit naglingnersak, illaᴋarniangilak uvamnik. Ernerminiglo paningminiglo uvamnit naglingnersak, illaᴋarniangilak uvamnik.

³⁸ Saningajoliksaminiglo (kappiasutiksaminiglônêt) tigusijomangitok uvamniglo maligomangitok illaᴋarniangilak uvamnik.

³⁹ Inôserminik ivlersijub assiojijomârpâ, inôserminiglo assiojijub uvanga pivlunga nagvâromârpâ.

⁴⁰ Ilipsingnik illaliortub, illaliorivânga; uvamniglo illaliortub, tiliklertok uvamnik illaliorivâ.

⁴¹ Nalautaijomik illaliortok, nalautaijôngmat, nalautaijotut akkilertaujomârpok. Idluartomiglo illaliortok, idluartôngmat, idluartotut akkilertaujomârpok.

⁴² Ukkoarârsuillo ilanganik imertitsijok imermik niglinartomik, ermgusiârsub imanganik, ilinniartiongmat, âhamarik, oᴋautivapse, akkêngaivioniangilak.