Markuse 9 - Labrador Inuttitut Heritage Bible

Kristusib ânanausijauninganik. Illisimailingajub âᴋiktauninganik. Aniaminik makinerminiglo Jêsusib nelautaininganik. Oᴋâlaninganik piojorijuinermik sinaungajutiksaujuniglo.

¹ Oᴋautivaillo: Ahamarik, oᴋautivapse, nangertut ovane illangita toᴋo ôngniangilât, Gûdib nâlegauvinganik pitsartovlune tikitomik takoᴋâratik.

² Uvlut pingasujortut kingorngatigut Jêsusib Pêtruselo, Jakôbuselo, Jôhanneselo ingminut pitipait, ingmigolivlugillo ᴋaᴋᴋamut ᴋingiktomut majorarᴋatautipait, ânanausivlunelo sângane.

³ Annorângillo ᴋaumaridlarlutik ᴋaᴋᴋorsidlarput aputitut (ᴋaᴋorsaijut nunamêtut taimak ᴋaᴋortigijomik piniarlutik saperput).

⁴ Elîaselo Môseselo saᴋᴋerpik tâpkonunga, Jêsuselo oᴋaᴋatigivâk.

⁵ Petruselo Jesusemut oᴋarpoᴋ: Rabbi (ajoᴋertuijoᴋ), tamânêtsainarominarpoᴋ; pingasunik igloliolerta, ilingnut atautsemik, Môsesemullo atautsemik Elîasemullo atautsemik.

⁶ Oᴋautsinele ᴋaujimangilait, ᴋoaᴋsâramik.

⁷ Nuvujarlo ᴋaivoᴋ uliklugillo. Nippelo nuvujamit tussartauvoᴋ, oᴋarlune: Tagva Ernera nagliktara, tâmna nâlegaksarivase.

⁸ Tagvainarlo, avatimingnut takosaramik, inuksingilat, Jêsuse kissiat takovât.

⁹ Kaᴋᴋamille atersâramik, Jêsusib inerterpait, takojamingnik oᴋautjerᴋonagit kimullônêt, Inûb Erninga toᴋungajunit makeᴋârtinago.

¹⁰ Oᴋauseᴋ tamanna ilumigivât ingmingnullo apersûtivlutik: Kanoᴋ tagva toᴋungajunit makinêᴋ?

¹¹ Apersulerpâllo oᴋarlutik: Sôᴋ aglangnik illisimajut oᴋarᴋât: Elîase tikerᴋârtuksauvôᴋ?

¹² Kiovaillo oᴋautivlugit: Ahaila, Elîase tikerᴋartuksaugalloarpoᴋ, tamaitalo idluarsitilugit; taimaktauᴋ Inûb Erninga angijomik kappiasuktitaujariaᴋarpoᴋ nachogijaulunelo, sorlo aglaksimangmat.

¹³ Oᴋaupapsele: Elîase tikitsarêrpoᴋ, issumamingnullo piniarvigilauᴋpât, sorlo taimna pivlugo aglaksimangmat.

¹⁴ Illiniartinelo tikinamigit, inugasaksuit takovait, aglangniglo illisimajut ilumavait apersorniktut taipkoninga.

¹⁵ Tagvainarlo inuit ilûnatik takogamitsuk, kakkilâdlarput, aivigivlugolo salutipât.

¹⁶ Aglangniglo illisimajut aperivait: Kanoᴋ tâpkoninga apersornikisê?

¹⁷ Inugasaksuit illangata kiovlune oᴋautivâ: Ajoᴋertuijoᴋ, ernera tamaunga âpara ilingnut, anerneᴋartoᴋ oᴋajuitomik.

¹⁸ Tâpsoma tigulerangamiuk aulajârtidlarpâ, ᴋapoalidlalerporlo, nêrᴋolâlarmelo tijilerpoᴋ. Illiniartitit oᴋaᴋatigilauᴋpakka anititaukovlugo, ajorpâlle.

¹⁹ Kiovâle oᴋarlune: Tata! ukkua okpingitut kinguvângoᴋatigêt, ᴋanoᴋ sivitutigijomik najoriaᴋarpapsê? ᴋanorlo sivitutigijomik ᴋenuevigijariaᴋarpapsê? Kaisiuk uvamnut.

²⁰ Apâllo tâpsomunga. Tagvainarlo anernerub oᴋajuitub takogamiuk, aulajârtidlarpâ, nunamullo ochovoᴋ aksakâlarmelo ᴋapoalidlalilarmelo.

²¹ Jêsusiblo atâtanga aperivâ: Kanga taimailerᴋâ? Oᴋarpoᴋ: Nutaraunerminit.

²² Unuktuniglo ochotipâ ikomamullo imermullo toᴋonasuarlugo. Sapingikuville, nâpkigilertigut ikajorlutalo.

²³ Jêsusible oᴋautivâ; Okperungnaruvit; okpertomut ajornartoᴋangilaᴋ sumik.

²⁴ Tagvainaᴋ sorutsib atâtanga niplialerpoᴋ ᴋugviordlune oᴋarlunelo: Okperpunga, nagliktoᴋ Nâlegaᴋ, okpinginimnit piulinga.

²⁵ Jêsusele takogame, inuit ᴋaijalermatta, anerneᴋ ivjornartoᴋ inerterpâ, oᴋautivlugo: Oᴋajuitoᴋ tussângitorlo anerneᴋ perᴋovagit, anît ômangat, kingornganelo iterungnairlutit ômunga.

²⁶ Niplialerpoᴋ tâva, aulajârtidlarmilâllo anivoᴋ. Inuglo tâmna toᴋojotun-ipoᴋ, unuktullo toᴋojoᴋ oᴋautigivât.

²⁷ Jêsusible aggangitigut tiguvâ, makitilâllo: makiporlo tâva.

²⁸ Iglomullo pingmat, illiniartingita ingmikôrlutik apersorpât: Sôᴋ uvagut anititsungnangilavût?

²⁹ Kiovorlo: (Anernerit) taimaitut anititaujungnangilat, kissiane tuksiarnermut nerritailinermullo.

³⁰ Tagvangallo aularamik, Galilêa apᴋotigivât, tamattomingale inuit ᴋaujimaᴋojomangilait.

³¹ Illiniartine ajoᴋertorlugit oᴋautivait: Inûb Erninga pititaujomârpoᴋ inuit agganginut, toᴋotsomârpâllo; toᴋotaukpalle, uvluk pingajuangne makitsomârivoᴋ.

³² Oᴋautsille ukkua tukkisingilait, apersorlugolo ileragivât.

³³ Kapernaumullo pigivoᴋ. Iglomêdlunelo aperivait: Sumik apᴋome oᴋaᴋatigêlauᴋisê?

³⁴ Niplingilalle. Ingergarlutik ingmingnut oᴋalauramik, nelitik anginerongmangât.

³⁵ Ingidlunelo 12 it ᴋaiᴋovait, oᴋautivlugit: Illase sivorliojomajoᴋ kingorliojomârpoᴋ, ilûnatiglo kivgarijomârpât.

³⁶ Nutaᴋamik tâva tigusivoᴋ, akornganullo pitipâ erᴋilugolo, oᴋautivaillo:

³⁷ Taimaitomik nutaᴋamik illaliortub attimne illaliorivânga, uvamniglo illaliortub, kissima illaliungilânga, uvamnigle tiliklertoᴋ illaliorivâ.

³⁸ Jôhannesible oᴋautivâ oᴋarlune: Ajoᴋertuijoᴋ, angutemik takolauᴋpogut atterne Sâtanasinik anititsijomik maligatalo; malingimatigullo, tamanna pivlugo inertilauᴋpavut.

³⁹ Jêsusele oᴋarpoᴋ: Inerteraksaringilase. Tatamnartitsijoᴋangilaᴋ attimne, oᴋarnerlûtigisarailungalo pijomik.

⁴⁰ Uvaptingnik akkerartungitub illagivâtigut.

⁴¹ Ilipsingnigle imertitsijoᴋ imermik, ermgusiarsub imanganik, attimne, Kristusib pigingmase, ahamarik, oᴋautivapse, akkêngaivioniangilaᴋ.

⁴² Uvamnullo okpertut ukkuararsuit illanganik sinaungatitsijomut idluarnersauvoᴋ, serᴋalitsiviub ujaraktanganik ᴋungasingagut nivingaiviogune, egitauvlunelo imarbingmut.

⁴³ Aggakpîlle sinaungatikpatit, nakakit. Ilingnut ajunginersauvoᴋ, illakungorlutit inôtsemut iteruvit, maggûngnik aggaᴋarnernit, âniatitsivingmullo ikomamut ᴋamitsuitomut egitaunernit;

⁴⁴ Taingane ᴋuglugiangat toᴋoniangilaᴋ, ikomangallo ᴋaminiangilaᴋ.

⁴⁵ Itikavîllo sinaungatikpatit, nakakit. Ilingnut ajunginersauvoᴋ, tussiaklutit inôtsemut iteruvit, iglugêngnik itigaᴋarnernit, âniatitsivingmullo ikomamut ᴋamisuitomut egitaunernit.

⁴⁶ Taingane ᴋuglugiangat toᴋoniangilaᴋ, ikomangallo ᴋaminiangilaᴋ.

⁴⁷ Ijivîllo sinaungatikpatit, pêruk egidlugolo. Ilingnut ajunginersauvoᴋ, igluinarmik ijeᴋarlutit Gûdib nâlegauvinganut iteruvit, maggûngnik ijeᴋarnernit, âniatitsiviublo ikomanganut egitaunernit.

⁴⁸ Taingane ᴋuglugiangat toᴋoniangilaᴋ, ikomangallo ᴋaminianginivoᴋ.

⁴⁹ Ilûnatik ikomamut tarrêrtitaujariaᴋarput, tunergutiksallo ilûnatik sioraujamut tarrêrtitauvut.

⁵⁰ Sioraujaᴋ ajungidlarpoᴋ; sioraujarle tarriornitsungnairpat, sumût tarriornitinajarpisiûk? Ilipsingne sioraujaᴋaleritse, ullapirsauteᴋaᴋatigêkluselo ilipsingnut.