Markuse 8 - Labrador Inuttitut Heritage Bible

4,000 it tatamnartomik nerrititauninginik. Farisêerit nelunaikutamik tautugomaninginik. Farisêerit pudjusautinganik. Tautungitub âᴋiktauninganik. Kigligiutjinermik Kristusemik.

¹ Uvlune tamakonane inuit nerᴋiksaᴋangitut unuktut tagvanêngmatta, Jêsusib illiniartine ingminut ᴋaiᴋovait, oᴋautivlugit:

² Inuit ukkua ilapsugidlarpakka nerᴋiksaᴋaratik uvlunik pingasunik uvamnêngmatta;

³ Nerritinagit aulartikupkit, perlidlarajarmatta angergarlutik apᴋome. Illangit ᴋaningitomit pingmatta.

⁴ Illiniartingita kiovât: Nakit ᴋaᴋᴋôjaᴋsiniarpitâ tamâne inuᴋangitome, ukkua kâgungnairutiksanginîk?

⁵ Apersorpaillo: Kapsinik ᴋaᴋᴋôjaᴋarᴋisê? Kiovât: 7 nik.

⁶ Inugasaksuillo ikterᴋovait nunamut. Kaᴋᴋôjallo ukkua 7 it tiguvait, Kujalivlunelo avgorpait, illiniartiminut tunivlugit, inungnut ukkoninga manijerᴋovlugit; inungnullo tagva manivait.

⁷ Mingeritjaniktauᴋ ikitunik peᴋarivut; tâpkoa pivlugit ᴋujaligivok, manijauᴋongmivlugillo.

⁸ Nerrivut tagva, kâgungnairlutiglo, amiakullo katilerpait, amârgaujat 7 it tattadlugit.

⁹ Nerrilauᴋtullo 4,000 iovut; aularᴋolerpaillo tâva.

¹⁰ Tuavidlunelo illiniartine illagilugit umiarmut ikivoᴋ, Dalmanutablo erᴋânut pivlune.

¹¹ Farisêerillo anilutik apersûteᴋatigigiarlugolo ôktorlugolo, takotitserᴋojomavâllo nelunaikutamik ᴋilangmit.

¹² Anernermigullo anersaumivlune oᴋarpoᴋ: Kinguvângoᴋatigêt ukkua sôᴋ nelunaikutamik takojomavât? Ahamarik oᴋautivapse: Kinguvângoᴋatigêt ukkua nelunaikutamik tunitjivioniatsangilat.

¹³ Tâva ᴋemakpait, umiarmullo ama ikivoᴋ, ikârdlunelo utimut.

¹⁴ Kaᴋᴋôjamiglo neksarlutik puigulauᴋput, umiarmelo atusênarmik ᴋaᴋᴋôjaᴋarput.

¹⁵ Perᴋovaillo oᴋarlune: Nâlagitse, udsertorluselo Farisêerit pudjusautinganik, Herôdesiblo pudjusautinganik.

¹⁶ Issumertorpâllo, ingmingnut oᴋarlutik: Taimak pivâtigut, ᴋaᴋᴋôjamik neksalaunginapta.

¹⁷ Jêsusiblo tamanna tukkisigamiuk, oᴋautivait: Sôᴋ ᴋaᴋᴋôjaᴋanginise siaklerutigivisiûk? sulle tukkisingilase silatusinaselô? sullelo mangaitunik ômateᴋarᴋisê?

¹⁸ Ijeᴋarluse takolungilasê, siuteᴋarluse tussangilasê, erᴋainaselônêt ipsomingâ?

¹⁹ Kaᴋᴋôjat tellimat avgorapkit inugasaksoarnut 5,000 inut, amârgaujat ᴋapsit amiakovinernik tattalauᴋpisigîk torᴋorlugillô? Kiovât: 12 it.

²⁰ Kaᴋᴋôjallo 7 it avgorapkit inugasaksoarnut 4,000 inut, amârgaujat ᴋapsit amiakovinernik tattalauᴋpisigîk torᴋorlugillô? Kiovât: 7 it.

²¹ Tagva oᴋautivait: Sôᴋ tukkisingilasê?

²² Betsaidamullo pivoᴋ. Atsivullo tautungitomik tâpsomunga, aktortauᴋovlugolo tuksiarvigivât.

²³ Tautungitorlo aggangitigut tiguvâ, tessiorlugolo iglugasait silatânut, ijîgiglo ᴋetserarlugik, aggangminullo aktorlugo aperivâ: Sumîk takovêt?

²⁴ Uidlunelo oᴋarpoᴋ: Inuit pisuktut takovakka sorlo napârtut.

²⁵ Ijîgiglo ama aktorivak aggangminut, amalo takoᴋomilugo; âᴋiktaulerporlo tâva, tamaita tautugungnalerdlugit.

²⁶ Angerarᴋovâlo oᴋarlune: Iglugasangnut iterniarnak, iglugasangmiuniglônêt taimak oᴋautjiniarnak.

²⁷ Jêsuselo aularpoᴋ illiniartingillo, iglugasangnut Zesarêab Filippusib iglugasaksoangita erᴋanêtunut. Ingergarlutiglo illiniartine aperivait oᴋarlune: Inuit kinaunasugivângâ?

²⁸ Kiovât: Illangita Johaneseonasugivâtit baptiterijoᴋ; illangitale Elîaseonasugivâtit; ama illangita nelautaijullônêt illangat.

²⁹ Oᴋautivaillo: Ilipsele kinaunasugivisingâ? Pêtrusib kiovâ oᴋarlune: Kristuseovotit.

³⁰ Inerterpaillo unipkângojomanane inungnut.

³¹ Ajoᴋertulerpaillo: Inûb Erninga âniatitaujariaᴋarpoᴋ angijomik, ajaktortaujariaᴋarlunelo angajoᴋânut ajoᴋertuijoᴋsoarnullo, aglangniglo illisimajunut, toᴋotaulunelo, uvluglo pingajuangne makitsomârivoᴋ.

³² Angigunagillo tamattominga oᴋarpoᴋ. Pêtrusiblo ingminut pitipâ, inerterlugo taimailerᴋonago.

³³ Keviardlunele illiniartine takunârpait, Pêtruselo inerterpâ oᴋarlune: Tunumnut pît, Sâtanase; Gûdib pingit issumaginginangne, inuit pingit kissêta.

³⁴ Inuillo illiniartinelo ᴋaiᴋovait ingminut, oᴋautivlugit: Uvamnik maligomajoᴋ issumaminik piniarane, seningajoliksaminik (kappiasûtiksaminiglônêt) nangmarle maliklungalo.

³⁵ Inôserminik ivlersijub assiojijomârpâ; inôserminigle assiojijub pivlunga oᴋautsillo tussarnertut pivlugit assiojiniangilâ.

³⁶ Inûb suksarivaûk, silaᴋsoaᴋ ilûnât piksarsiarigalloaruniuk, tarniga asserorpât?

³⁷ Ubvalo sumîk inuk tunijijungnarᴋâ tarnime satûtiksanganîk?

³⁸ Uvamnigle oᴋautsimniglo kangusuktoᴋ kinguvângoᴋatigêne tâpkonane assiniartune ajortulijunelo, tâmna Inûb Erningatatauᴋ kangugijomârpâ, tikikune atâtame ânanauningane, Engelit hailigit illagilugit.