Markuse 7 - Labrador Inuttitut Heritage Bible

Inuit Gudiblo perᴋojanginik. Arnamik Kanaanemiomik. Tussajuitôvlunelo oᴋajuitomik.

¹ Farisêerillo, aglangniglo illisimajut illangit, Jerusalemit pijut, tikipât.

² Illiniartingitalo illangit takogamigit ᴋaᴋᴋôjaᴋtortut, ubvaᴋârnagit aggatik, idluaringilait.

³ Farisêerit Jûdillo ilûnatik nerringimata, aggatik ubvarᴋârnagit, angajoᴋâmik ilûsingit atorlugit.

⁴ Niuvervingmillo tikitarangamik, nerringilat ubvarᴋâratik. Assingillo unuktut taimaitut iluserivait, ermgutsillo, imertautillo, machaillo, pôgutallo sâllo ubvarpaklugit.

⁵ Farisêerillo aglangniglo illisimajut apersorpât: Sôᴋ illiniartivît malingilagît angajoᴋâpta ilusingit, sôᴋ ubvarsimangitunik aggaᴋarlutik ᴋaᴋᴋôjaᴋtorᴋât?

⁶ Kiovaille oᴋautivlugit: Ilipse takkormôrtose, Jesaiasib oᴋautigitsiaralloarpâse, sorlo aglaksimangmat: Inuit ukkua ᴋangasinâmingnut nertorpânga, ômatingitale ungasikpânga.

⁷ Sulinatigle kivgartorpânga, inuit ajoᴋertûsituinangit ajoᴋertuitigigamigit.

⁸ Gûdib perᴋojangit ᴋemakpase, inuit ilusekullungit maliklugit pivase, ᴋattallo ermgusiarsuillo ᴋeblariksivlugit; unuktullo taimaitut atorpase.

⁹ Oᴋautivaillo: Gûdib perᴋojangit atorungnaitsiartipase, ilusekulluse maligomavlugit.

¹⁰ Môsese oᴋarmat: Atâtangniglo anânangniglo nâlektuksauvotit; atâtaminulle anânaminullo oᴋarnerluktoᴋ toᴋotaksauvoᴋ.

¹¹ Ajoᴋertuivosele: Atâtaminut anânaminullônêt oᴋartoᴋ: Perᴋutikka ikajûtaunajartut ilingnut korbâniovut, imaipoᴋ: Tunijausimavut Gûdemut:

¹² Tagva kingorngane avâgosuktailitipase atâtaminik anânaminiglo.

¹³ Taimak Gûdib oᴋausingit atortaujungnaitipase ilusekulluse pivlugit, taimailiutsainarposelo unuktunik.

¹⁴ Inuillo tamaita ingminut ᴋaiᴋovait, oᴋautivlugit: Tamapse nâleksinga ômamigisiuglo.

¹⁵ Sunallônêt inûb silatânit iluanut pijut, sujuktingilât; tâpsomangalle anijut inuk sujuktipât.

¹⁶ Tussâjungnik siutilik tussarle.

¹⁷ Inuille ᴋemaklugit iglomut pingmat, illiniartingita apersorpât mattominga adsiujomik.

¹⁸ Oᴋautivaillo: Ilipsetauᴋ silatuneᴋangilasê? Nelovisê, ilûnatik silatânit inungmut pijut sujuktingimatsûᴋ?

¹⁹ Omatânut pinginamik natjangnulle pivut, iluserivaktamiktullo anititaulerivut, nerᴋititut ilûnaititut.

²⁰ Oᴋarporlo: Inungmit anijub inuk sujuktipâ.

²¹ Kamangat, inuit ômatinginit erᴋarsautikulluit pivut, nuliarêngnermik asserorsainerlo, assiniarnerlo, inuarnerlo,

²² Tiglingnerlo, pijomatudlarnerlo, nelangainerlo, pingitsertornerlo, ikligunerlo, piungitomik ijeᴋarnerlo, Gûdemik mitautiksaᴋarnerlo, piojorinerlo, silainerlo;

²³ Tamakkoa ilûnatik iluanit pivut, inuglo sujuktipât.

²⁴ Nikovidlunelo tâva tagvangat aularpoᴋ, Tirusiblo Sidoniblo erᴋângnut pivoᴋ; iglomullo iterlune inuit angigutijomagalloarpait, ijersimajungnangilarle.

²⁵ Arnat illangata paneᴋartub maᴋojungnartomik anernelingmik tussaumagamiuk, tikilugolo itiganginut pâmaktervigivâ.

²⁶ (Arnaᴋ tâmna tagva Griᴋit arnangita illangat, Sirofenizemioᴋ). Tuksiarvigivâlo, Sâtanase anititauᴋovlugo paningminit.

²⁷ Jêsusible oᴋautivâ: Kitorngaujut kâgungnairᴋârlit; idluangilaᴋ ᴋitorngaujut ᴋaᴋᴋôjanginik aᴋsârlugit, ᴋingminullo egidlugit.

²⁸ Kiovlunele oᴋautivâ: Ahaila Nâlegaᴋ, taimaikalloarpoᴋ, ᴋingmiarsuille nerriviub atânêtut nerrivut ᴋitorngaujut karnganerlukunginik.

²⁹ Oᴋautivâlo: Oᴋautsitit tamakkoa pivlugit aularit; Sâtanase paningnit anisimavoᴋ.

³⁰ Iglominullo pigame, Sâtanase anisimajoᴋ kingorarpâ, paninelo aumitimine nelajoᴋ naipipâ.

³¹ Tirusiblo Sidoniblo erᴋângnit aularmigame, Galilêab tesseᴋsoangata senianut pivoᴋ, iglugasaksuit tellimaujortut erᴋânut.

³² Atsivullo tussajuitomik oᴋarungnangitomik tâpsomunga, ᴋenuvigivâllo, aggangminut aktuerᴋovlugo tapsominga.

³³ Inuillo akornganit ingminut pitipâ, agganelo siutîgingnut ilivait, ᴋesselarmelo, oᴋangalo aktorpâ.

³⁴ Kilangmullo ârlorpoᴋ, anersaumilarmelo oᴋautivâ: Hefata, imaipoᴋ, angmalerit!

³⁵ Siutîgiglo tagvainaᴋ angmarpuk, oᴋangatalo ᴋelarutinga pêrpoᴋ, oᴋatsialilarmelo.

³⁶ Inerterpaillo, tamanna oᴋautauᴋonago inungnut. Tagva inerteralloarmagit angijomik, anginersamigle aᴋpautigivât.

³⁷ Tataminiarlutiglo oᴋarput: Tamaita idluartipait: tussangitut tussartilugit, oᴋarungnangitullo oᴋartipait.