Markuse 6 - Labrador Inuttitut Heritage Bible

Jêsusib nachogijauninganik Nazareteme. Tiliklerninganik Apostelinik. Jôhannesib baptiterijub niaᴋoertauninganik. 5,000 it nerrititauninginik. Imiub ᴋângagut Jêsusib pisungninganik.

¹ Tagvangallo aularpoᴋ, nunaminut pivlune; illiniartingitalo malikpât.

² Sabbatelo neliutingmat, katimavingme ajoᴋertuilerpoᴋ. Unuktullo tussartut tamattominga, ajoᴋertûtingit tataminiarivait, oᴋarlutiglo: Nakit ôma tamakkoa pivagît? ᴋanorlo silatunermik taimaitomik tunitjivionerᴋâ? tatamnartuniglo taimaitunik aggangitigut pijunîk?

³ Igloliorteungitôᴋ? Marîab Erninga, Jakôbusiblo, Jôsesiblo, Jûdasiblo, Siminiblo ᴋatangutigingilatsûk? Najangillo, ilûnatik uvaptingnêngilât? Ilûnatiglo sinaungajutigivât.

⁴ Jêsusible oᴋautivait: Nelautaijoᴋ kamagijaunginersauvakpoᴋ nunaᴋatiminut illaminullo, assinginit tamainit.

⁵ Tagvane tatamnartulijungnangilaᴋ atautsemiglônêt; ᴋanimajut illainangit aggangminut aktorpait pijungnaitilugillo.

⁶ Okpinginingillo tataminiarivait. Arvertarporlo iglugasaksoarnut avatiminêtunut, ajoᴋertuivlunelo.

⁷ 12 illo ᴋaiᴋovait, maggoilivlugillo aularᴋolerpait, ajugautipaillo anernernut maᴋojungnartunut,

⁸ Perᴋolugillo, sumik neksarᴋonagit ingergarlutik, ajaupiatuinrmik kissiane; ikpiârsulijaratiglo, ᴋaᴋᴋôjalijaratiglo, kênaujalijaratiglo tapserutimingne;

⁹ Itigagusersimaᴋovlugille, annorângniglo maggûngnik atorᴋonagit.

¹⁰ Oᴋautivaillo: Iglomut iterupse, tâpsomanetsainaritse, aularᴋârase tâpsomangat.

¹¹ Illangitalo illalioromangipase, oᴋausise tussaromanagillônêt; anititse tagvangat, itikapselo saningit katerarsigik nelojungnairutiksanginut (erᴋartortaujutiksanginullo). Ahamarik oᴋautivapse: Sodomablo Gomorrablo inugilauᴋtangit pitlartaunikinersaujomârput uvluksame erᴋartuivingme iglugasaksoarnit ukkunangat.

¹² Ailerpullo ajoᴋertuijartorlutiglo ᴋaᴋialeriaᴋarnermik.

¹³ Sâtanasiniglo unuktunik anititsivoᴋ, ᴋanimajuniglo unuktunik pijungnaititsivoᴋ, mingoarûmut mingoarlugit.

¹⁴ Atanerlo Herôdese tamattominga tussaumalerame, (Jêsusib attinga illitarijaulermat) oᴋarpoᴋ: Jôhannese baptiterijoᴋ toᴋungajunit makisimavoᴋ; tamanna pivlugo taimaitomik tatamnartulivoᴋ.

¹⁵ Illangille oᴋarput: Elîaseovoᴋ; illangille: nelautaijôvoᴋ, nelautaijullônêt illangatitut.

¹⁶ Herôdesele tamattominga tussarame, oᴋarpoᴋ: Jôhanneseovoᴋ niaᴋoêrtautilauᴋtara; toᴋungajunit makisimavoᴋ.

¹⁷ Herôdesele tiliklilauᴋpoᴋ, Jôhannesemik tigujautitsilune, pititsilunelo parngnanairsimavingmut, Herôdiase, nukame Filippusib nulianga pivlugo; tâmna nulianikamiuk.

¹⁸ Jôhannesib Herôdese oᴋautilaungmago: Idluangilaᴋ, nukavît nulianga pigigangne.

¹⁹ Herôdiasible Jôhannese toᴋonasuaromagalloarlugo ajorpâle.

²⁰ Herôdesible Jôhannese ileragivâ, nelunginamiuk idluartôvlune issumagiktoᴋsôngmat; tamanna pivlugo saputivâ ᴋangaulermallo nâlekpâ, tussarnerilâllo.

²¹ Uvloᴋalermallo pitjutivingmik Herôdesib inûlerviane, tâpsoma atanigasait, sorᴋsuktuksallo angajoᴋângit, Galilêtullo angajoᴋaunersat nerrimârtimagit,

²² Tagva Herôdiasib pania iterpoᴋ, tânserlarmelo, Herôdesiblo nerreᴋatingitalo tamanna ᴋuviagivât. Tagva ataniub Herôdesib niviarsiaᴋ oᴋautivâ: Issumangnik tuksiarviginga, pijomajarnik pilitsomavagit.

²³ Oᴋautimariklugolo oᴋarpoᴋ: Sumik tuksiarvigigumga, ila pilitsomavagit, ataniovingma ᴋoppanganiglônêt.

²⁴ Anivlunelo anânane apersoriartorpâ: Sumîk tuksiartuksauvêk? Kiovâ: Jôhannesib baptiterijub niaᴋoanik.

²⁵ Itersârivorlo atanermut, ᴋenuvlune oᴋarpoᴋ: Tagvainaᴋ tunitjiviojomavunga Jôhannesib baptiterijub niaᴋoanik, pôgutamut ilimajomik.

²⁶ Ataneᴋ kiksalerpoᴋ; oᴋautsinele oᴋarmaringnine pivlugo, nerruᴋatinelo pivlugit, sulinane tuksiarᴋojomalungilâ.

²⁷ Ataniublo niaᴋoêrsije tilisârpâ, niaᴋoalo aijauᴋovâ. Tâpsoma parngnanairsimavingmut niaᴋoêriartorpâ,

²⁸ Niaᴋoalo pôgutamut ilimajoᴋ tikiupâ, tunilugolo niviarsiamut, niviarsiable anânaminut tunivâ.

²⁹ Tamannalo illiniartingita tussaramitsuk, tikilerput timingalo iluvermut ilijartorpât.

³⁰ Apostelillo Jêsusemut katilerput, oᴋautivlugolo tamakkoninga tamainik, piniarnermingniglo ajoᴋertuinermingniglo.

³¹ Oᴋautivaillo: Kissipta inuᴋangitomut ailauᴋta, merngoêrserluselo. Tikitut utertullo unungmatta; nerrijungnangilallônêt, agviartaugamik.

³² Umiakullo aularput inuᴋangitomut.

³³ Inuillo takovait allivartut, unuktullo illitarivât, aᴋpangerlutiglo ᴋuterorlutik malikpât illagêklutik iglugasaksoarnit tamainit, ingiarlugolo tikipât.

³⁴ Jêsuselo niovoᴋ; inugasaksuillo takogamigit, ilapsugidlarpait; saukatitut mianerijeᴋangitutitut-ingmatta. Unuktuniglo oᴋâlavigilerpait.

³⁵ Uvluklilermallo, illiniartingita tikipât, Oᴋautivlugolo: Tamâne sunataᴋangimat, uvluklilermallo;

³⁶ Aularlit, mattoma erᴋât iglugasanginut niuvervinginullo, ᴋaᴋᴋôjaᴋsiniariartorᴋovlugit; nerᴋiksaᴋanginamik.

³⁷ Jêsusible kiovait, oᴋautivlugillo: Ilipse nerᴋiksanginki tunitjivigisigik. Oᴋautivâllo: Kaᴋᴋôjaᴋsiniariartortuksauvitâ, kênaujat 200 it akkinginut, ukkua nerᴋiksanginîk?

³⁸ Oᴋautivaille: Kapsinik ᴋaᴋᴋôjaᴋarᴋisê? ullernaisijartoritse. Ullernairamigillo, oᴋarput: Tellimanik, mingeriângniglo maggûngnik.

³⁹ Ikterᴋolerpaillo nerrimârtutitut iviksukkanut ᴋunorlingaitunut.

⁴⁰ Tunulerêktidlutik tâva ikterput ingmigolivlutik 100 illo 100 illo 50 illo 50 illo.

⁴¹ Ukkualo ᴋaᴋᴋôjat tellimat, mingeriâglo magguk tiguvait, ᴋilangmullo ârlorpoᴋ, ᴋujalivlunelo ᴋaᴋᴋôjat avgorpait, tunivlugillo illiniartiminut, manijerᴋovlugit tâpkonunga, mingeriaglo magguk avikpak ilûnainut.

⁴² Ilûnatik tâva nerrivut, kâgungnairlutiglo.

⁴³ Amiakungillo katilerpait, amârgaujat 12 it tattadlugit, mingeriaglo illanginik.

⁴⁴ Nerrilauᴋtullo angutainait 5,000 iovut.

⁴⁵ Illiniartinello erinesâlerdlugit umiarmut ikiorᴋaᴋolerpait, sivorlerijomagamigit Betsaidamut, inuit aularterᴋârnagit.

⁴⁶ Inuillo aulartinamigit, ᴋaᴋᴋamut majorarpoᴋ tuksiariatorlune.

⁴⁷ Unnulermallo umiat tesseᴋsûb ᴋerᴋanêput, Jêsuselo kissime nunamêpoᴋ.

⁴⁸ Takovorlo, epunermik sapikasalermatta, anore aggormatsuk. Pigârvingitale sitamangane unnuame tikilerpait, imab ᴋângagut pisuklune,

⁴⁹ Kângerniarᴋôrdlugit. Imarlo pisugvigingmago takogamitsuk, ijorônasugivât, nipliadlarlutiglo.

⁵⁰ Ilûnatik takogamitsuk, kakkilârput. Tuavile oᴋaᴋatigilerpait, oᴋautivlugit: Manigoleritse, uvangauvunga, erᴋsinase!

⁵¹ Umiarmullo ikivoᴋ tâpkununga, ᴋassûmivoᴋ tâva kakkilârlutiglo tataminiadlarput angijomik.

⁵² Kaᴋᴋôjat pitjutigilugit silatusinersaulaungilat, ômatingit mangaidlarmatta.

⁵³ Ikâlauramiglo, Genêzaremiut nunanganut pivut nunalidlutiglo.

⁵⁴ Umiarmillo niungmatta, inuit illitarijarêrpât.

⁵⁵ Aᴋpangilerlutiglo nunanut mattoma erᴋânêtunut tamainut; ᴋanimajullo aumitimingne nelajut âlerpait najugânut tussaumajamingnut.

⁵⁶ Niuvervingnut, iglugasaksoarnullônêt iglugasangnullônêt iterangat, ᴋanimajiatik ilivait iglut akornganut, tuksiarvigivlugolo, annorângata sinâ aktortauᴋovlugo taipkonunga. Tâpsomingalo aktuijut ilûnatik pijungnairput.