Markuse 5 - Labrador Inuttitut Heritage Bible

Legiônit Sâtanasit anititauninginik. Arnamik auᴋatsainartomik. Jaîrusib paninganik.

¹ Tesseksûblo akianut pivut, Gadarênerit nunanganut.

² Umiarmillo niungmat, inûb illangata anernermik maᴋojungnartomik ilumiktub pagrearsârpâ iluvernit anivlune.

³ Iluverne ineᴋarame. Kelaksoijungnartoᴋangilarlônêt tâpsominga, ᴋelaumgujanullônêt.

⁴ Unuktunik ᴋelaksortaulauralloarangame parngnanairsûtinut ᴋelaumgujanullo, tapsoma ᴋelaumgujat kiktorâvait, parngnanairsûtillo alliktordlugit asserortipait, nujuititaujungnangilarlônêt.

⁵ Uvlunelo unnuanelo ᴋaᴋᴋanêtsainarpoᴋ iluvernêtsainalarmelo, ᴋagudlarlunelo ujarᴋanut ingminik tiglûjarpoᴋ.

⁶ Jêsusele takogamiuk ᴋaningitomit, aᴋpangerdlune pagrearpâ, pâmaktervigivlugolo nipliadlarlunelo oᴋarpoᴋ:

⁷ Suniarpagît, Jêsuse, Gûdib ᴋotsingnerub Erningâ? tuksiarvigilutit Gûdib sângane oᴋaupagit: kappiasuktitserᴋonak uvamnik.

⁸ Oᴋautivâle: Anît anerniojotit maᴋojungnartotit inungmit ômangat.

⁹ Jêsusiblo apersorpâ; Kinauvêt? Kiovâlo: Legiônemik atteᴋarpunga, unudlarapta.

¹⁰ Tuksiarvigivâlo angijomik, aulartitaujomanatik mattoma erᴋânit.

¹¹ Mattomalo erᴋâne kuingêngigasaksoaᴋarpoᴋ ᴋaᴋᴋame nerrijunik.

¹² Sâtanasillo ilûnatik tuksiarvigivât, oᴋarlutiglo: Kuingêngigasaksoarnut tâpkonunga pullaᴋotigut!

¹³ Jêsusiblo tuavilune perᴋovait. Anernerit maᴋojungnartut tâva anivut, kuingênginut pullavlutik; kuingêngigasaksuillo pangaliklutik sivinganariktomit ingmingnik ijukkâdlarput tesseᴋsoarmut, (tâpkoale 2,000 iokasait) ipivlutiglo imâne.

¹⁴ Kuingênginiglo mianersijut ᴋemâvut, iglugasaksoarmiunullo iglugasangmiunullo tamanna oᴋautigijartorpât. Taipkoalo anivut iluserilauᴋtangat tamanna takojartorlugo.

¹⁵ Jêsuselo tikipât, Sâtanaseliolauᴋtorlo annorâtsiartoᴋ, silatôvlunelo iksivajoᴋ takovât; erᴋsivlutiglo.

¹⁶ Tamakkoningalo tautulauktut oᴋautivait Sâtanasiliub kuingêngillo iliortauninginik.

¹⁷ Tuksialerpâllo, nunamingnit aularᴋovlugo.

¹⁸ Umiarmullo ikingmat, Satanaseliolauᴋtub tuksiarvigivâ, najoromavlugo oᴋarlune.

¹⁹ Jêsusible perᴋungilâ, oᴋautivlugole: Angergarit iglungnut illangnullo oᴋautivlugillo pitsiarvionernik Nâlekamut, nâpkigijaunerniglo tâpsomunga.

²⁰ Aularporlo, iglugasaksoarnelo tellimaujortune oᴋâlalerpoᴋ pitsiarvionerminik angijomik Jêsusemut. Tamattomingalo tussartut ilûnatik tataminiadlarput.

²¹ Jêsuselo umiakut ikârdlune utermingmat, inugasaksuit katisâlerdlutik tikipât tesseᴋsûb sinânêtoᴋ.

²² Ahâglo katimaviub angajoᴋângita illangat, Jaîrusemik attilik tikipoᴋ, takogamiuglo itiganginut pâmakterpoᴋ.

²³ Angijomiglo ᴋenuvigivlugo oᴋarpoᴋ: Paniga toᴋokasakpoᴋ; aggangnut aktoriartulauruk inûlijauvlunelo inôᴋovlugo.

²⁴ Jêsusiblo tagva aiparilerpâ; inugasaksuillo malikpât nimniortidlugolo.

²⁵ Arnarlo tagvanênivoᴋ; tâmna Jârinik 12 inik auᴋatsainartoᴋ.

²⁶ Kappiasudlarlunelo perᴋutine tamaita nungulauᴋpait âniasiortinut: soᴋoseranele sugaluluatuinartoᴋ.

²⁷ Tâmna Jêsusemik tussalerame, inuit akorngatigut annorânga aktoriartorpâ tunuanit.

²⁸ Oᴋarame: Annorângalônêt aktorungnarupko, pijungnainajarpunga.

²⁹ Tagvainarlo aunga kôktoᴋ kigikpoᴋ; timiminelo misigilerpoᴋ, pijungnairame kappiagijaminit.

³⁰ Jêsuselo mânakut ingminik misigivoᴋ, pitsartuneᴋ ingminit aningmat, inungnullo ᴋeviardlune oᴋarpoᴋ: Kia annorâkka aktorpagît?

³¹ Illiniartingitalo oᴋautivât: Takovotit, inuit nimniutidlarmatit, oᴋarpotillo: Kia aktorpângâ?

³² Keviarporlo aktortiminut, ᴋenerdlugo.

³³ Arnarle erᴋsilune sajukpoᴋ, piniarvionerminik ᴋanoᴋ ᴋaujimagame, pâmaktervigijartorpâlo, kiglilingmiglo oᴋautivâ.

³⁴ Jêsusible oᴋautivâ: Paniga, okpernivît pijungnaitipâtit; ullapirsauteᴋarlutit aularit, kappiagijarnillo âᴋiktaulerit.

³⁵ Sulle taimak oᴋartilugo, katimaviub angajoᴋângata kivgangita illangit tikiput oᴋarlutiglo: Panît toᴋovoᴋ, sôᴋ ajoᴋertuijoᴋ sulle pagvisârpiûk?

³⁶ Jêsusible oᴋausingit tamakkoa tussarsârpait, katimaviublo angajoᴋânganut oᴋarpoᴋ: Erᴋsiniarnak, okperille!

³⁷ Illauᴋojingilarlônêt Pêtrusib, Jakôbusiblo, Johannesiblo, Jakôbusib nukangata, assinginik.

³⁸ Katimaviublo angajoᴋângata iglunganut iterame, aulajâludlartut takovait, ᴋeadlartullo, nipliadlartullo.

³⁹ Iterlunelo oᴋautivait: Sôᴋ aulajâludlarluse ᴋeadlarᴋisê? Niviarsiaᴋ una toᴋungilaᴋ, sinikporle. Ijoridlarpâllo.

⁴⁰ Ilûnaitalo anitipait; niviarsiablo atâtanga. anânangalo illagivlugik iterpoᴋ niviarsiab nelavianut.

⁴¹ Niviarsiarlo aggangitigut tiguvâ oᴋautivlugolo: Talita kumi, imaipoᴋ: Niviarsiaᴋ oᴋaupagit makitit.

⁴² Tagvainarlo niviarsiaᴋ makisârpoᴋ arvertalilarmelo. Jâreᴋarporle 12 nik. Ilûnatiglo tataminiadlarput angijomik.

⁴³ Inerterpaillo angijomik, ᴋaujujoᴋalerᴋonago tamattominga, niviarsiarlo nerrititauᴋovâ.