Markuse 4 - Labrador Inuttitut Heritage Bible

Adsiujunik sunatuinarnik. Tesseᴋsub ikubliartitauninganik.

¹ Tesseksûblo kiglingane ama ajoᴋertuilerpoᴋ; inugasaksuillo katilermatta tâpsomunga, umiarmut tesseᴋsoarmêtomut ikijariaᴋalerpoᴋ ingidlunelo; inugasaksuillo ilûnatik tesseᴋsûb kiglinganêput.

² Akunillo ajoᴋertorpait adsiujutigut, ajoᴋertuivlunelo oᴋautivait:

³ Nâlagitse, ahâk karngasoijoᴋ karngasoijartorpoᴋ.

⁴ Karngasoitilugolo illangit apᴋosinermut katakput; tagva tingmitjat ᴋilaub atânêtut pukumalukpait.

⁵ Illangillo ᴋairtomut ivjokitomut katakput; perortersârpullo, ivjokinamik.

⁶ Seᴋinerlo nuingmat, ᴋunorlersârput, amâᴋanginamiglo panilerput.

⁷ Illangit katakput ukpigait kakilautilit akornganut; ukpigaillo kakilautilit peroramik, toᴋopait, sulugaineᴋartailitilugillo.

⁸ Illangillo katakput nunamut ivjoriktomut, nuilerlutiglo perorlarmiglo perorsiaksaᴋalerput sulugainermingne: illangit 30 nik, illangillo 60 nik, illangillo 100 nik.

⁹ Oᴋautivaillo: Tussâjungnik siutilik tussarle!

¹⁰ Kissimeolermallo, najortingita 12 it illagivlugit aperivât adsiujub tamattoma tukkinganik.

¹¹ Kiovait oᴋautivlugillo: Ilipse Gûdib nâlegauvingata nelonarninganik ᴋaûjititauvose; taipkoale uvaptingnêngitut adsiujunik oᴋautjaulerput;

¹² Ijinut uitajunut tautuklutik illitarserᴋonagit, siutinullo angmajunut tussâvlutik tukkiserᴋonagit, sâgiarᴋonagillo, ajorningillo issumagijaujungnairᴋonagit.

¹³ Oᴋautivaillo: Adsiujut tamakkoa tukkisingikupsigik, ᴋanoᴋ assingit tamaita tukkisinajarpisigîk?

¹⁴ Karngasoijub oᴋauseᴋ karngasoriartorpâ.

¹⁵ Apᴋosiniub senianut karngautigimajut, tâpkoangovut, (Gûdib) oᴋausinginik tussartut; tussarpagille, Sâtanasib tâva oᴋautsinik pêjariartorpait, ômatinginut karngautigimajut.

¹⁶ Taimaktauᴋ ᴋairtomut ivjokitomut karngautigimajut, tâpkoangovut, oᴋautsinik tussartut, kuviasuklutiglo tamakkoninga illaliorsârtut.

¹⁷ Amâᴋanginamigle ilumingne, sangusaraidlarput; kappianartoᴋalerangat unangmiklertoᴋalerangallônêt oᴋauseᴋ pivlugo, sinaungasarailerput.

¹⁸ Ukpigaille kakilautilit akorngannut karngautigimajut, tâpkoangovut, oᴋautsinik tussartut;

¹⁹ Silaᴋsûblo mattoma pinginik siaklernerub, akluitsomanerublo uivêrinarningata, assingitalo ikligunerit unuktut, oᴋautsit ipitipait, sulugainertâratiglo perorsiaksatalingnik.

²⁰ Ivjoriktomullo karngautigimajut, tâpkoangovut, oᴋautsinik tussartut illaliortullo, sulugainertârlutiglo perorsiaksatalingnik; illangat 100 ilingnik, illangalle 60 lingnik, illangallo 30 lingnik.

²¹ Oᴋautivaillo: Nennergoaᴋ ikitaunajarᴋâ, ᴋattaujab sâblônêt atânut ilivlugô? aukagle, nennergoarvingmulle ilivât.

²² Ijersimajoᴋangilaᴋ saᴋᴋijâromângitomik angiarijaujoᴋanginivoᴋ tussaumajaujomângitomik.

²³ Tussâjungnik siutilik tussarle!

²⁴ Oᴋautivaillo: Tussartase nâleksigik; ôktûtipsingnut ôktoraujomârivose; tapeᴋaromârluselo ilipse tamattominga tussartose.

²⁵ Peᴋartoᴋ tunitjivioniarpoᴋ; peᴋangitorlo aᴋsârtauniarpoᴋ pinganik.

²⁶ Oᴋarporlo: Gûdib nâlegauvia imaipoᴋ, sorlo inuk karngasûtinik karngasoijotut nunamut;

²⁷ Siniklunelo unnugangat, makilarmelo ᴋaulerangat; karngasûtillo nuilerlutik perorput, tâmna nelotilugo ᴋanoᴋ.

²⁸ Nunab ingminik iviksukat perorterᴋârpait, kingorngagut sulugainingit, kingorngagullo sulugainerit senaugaksanik perorsiaksataᴋalerput.

²⁹ Sulugainermarîlle inerangata, inuata kibloriartorsârpait, katersivik neliutingmat.

³⁰ Oᴋarporlo: Sumut Gûdib nâlegauvinga adsiutitaksarivitigô? adsiujullônêt neliatigut nelonarungnaititaksarivitigô?

³¹ Mustardib karngasûtiksatangatut-ipoᴋ; tâmna karngasortaugame nunamut, mingnerovoᴋ assiminit karngasûtinit tamainit nuname.

³² Karngasortaugamelo perorpoᴋ, anginersauvlunelo perorsianit makpatâvangnit tamainit; akkeroᴋalilarmelo angijunik, tingmitjallo ᴋilaub atânêtut ineᴋarungnarput tachaliningane.

³³ Taimaitutigut adsiujutigut unuktutigut oᴋautsinik oᴋarvigivait, tukkisijungnarnikiningat maliklugo.

³⁴ Adsiojôngitutigullo oᴋarvigingilait; illatuarigunigille, illiniartiminut tamakkoa tamaita tukkeᴋartipait.

³⁵ Uvlormelo taipsomane unnuktome oᴋautivait: Akianut ikârta!

³⁶ Inuillo aulartinamigit, umiarmut ikitipât; assingitalo umiat illagigivait.

³⁷ Ullijutjeradlalermallo, mallit umiaᴋ itipjuallugo pivât tattadlugolo.

³⁸ Umiablo aᴋᴋoanêpoᴋ siniklunelo akitime, tupârdlugolo oᴋautivât: Ajoᴋertuijoᴋ, issumagingilat sutairniarnivût?

³⁹ Makidlunelo anore inerterpâ imarlo oᴋautivâ: Nipangerit nipalârungnairlutillo. Anoreᴋarungnairpoᴋ tâva, ikublialidlalarmelo.

⁴⁰ Oᴋautivaillo: Sôᴋ taimak nangiarᴋisê? suna pivlugo okperneᴋangilasê?

⁴¹ Erᴋsidlarpullo, oᴋarlutiglo ingmingnut: Kina unâ? anoriblo imablo nâlengmakko.