Markuse 3 - Labrador Inuttitut Heritage Bible

Aggangik toᴋungajunik Jêsusib âᴋêninganik Sabbateme. Apostelit 12 it anerijaulerninginik. Jêsusib Sâtanaseᴋarnerartauninganik aglangnik illisimajunut. Anânanganik ᴋatangutinginiglo.

¹ Katimavingmullo ama iterivoᴋ. Ahâglo, inuᴋarpoᴋ tagvane aggalingmik iglunginik toᴋungajunik.

² Udjertorpâllo, sabbateme âᴋingniarmangâgo, pasitiksaᴋaromavlutik tâpsomunga.

³ Inungmullo toᴋungajunik aggalingmut oᴋarpoᴋ: Tamaunga pît!

⁴ Aperivaillo: Sabbateme ajungitulijuksauvitâ, idluitulijuksauvitâlônêt? inuk piulivlugolônêt asserorlugolônêt? Tâpkoale niplingilat.

⁵ Ningarlunelo ilumajine takunârpait, kiksautigivlugillo, ômatingit mangaidlarmatta, inuglo tâmna oᴋautivâ: Aggaktit issakit! Issakpaillo; âᴋiktaulerpullo iglungititut ilivlutik.

⁶ Farisêerillo anivut, oᴋaᴋatigêlerlutiglo Herôdesib kivgangit illagilugit ilioriaᴋarnermingnik inuaromavlugo.

⁷ Jêsusele illiniartine illagilugit tesseᴋsûb sinânut aivoᴋ: inugiartorsuillo malikpât Galilêamit Jûdêamillo.

⁸ Jerusalemillo, Idumêamillo, Jordaniblo akianit, Tirusiblo Sidoniblo erᴋângnêtut, inugiartorsuit, tatamnartitanginik tussartut, tikipât.

⁹ Illiniartinelo oᴋautivait, umiarâmik peᴋalerᴋovlugit, inungnut nimniutitaujomanane.

¹⁰ Unuktut âᴋingmagit; taimaimat kappiasuktitaujut ilûnatik arliartipât, aktoromavlugo.

¹¹ Anernerillo maᴋojungnartut takojarangamitsuk pâmagvigivât, niplerlutiglo oᴋarput; Gûdib Ernerivâtit.

¹² Angijomigle inerterpait, nelonairtaujomanane.

¹³ Kaᴋᴋamullo majorarpoᴋ, ᴋaiᴋojivlunelo pijomajaminik; ᴋaiᴋojangitalo tikipât.

¹⁴ 12 illo anerivait, najortigênaromavlugit oᴋâlajartortitsomavlugillo,

¹⁵ Pitsartutitsomavlugillo ᴋanimanartunik pêjaiᴋovlugit, Sâtanasiniglo anititserᴋovlugit.

¹⁶ Simonelo Pêtrusemik atserarpâ.

¹⁷ Jakôbuselo, Zebedêusib erninga, nukâlo Jôhannese, tâpkoa magguk atserarpak Boanergêsingnik, imaipoᴋ: kallub ᴋitornâgingnik.

¹⁸ Andrêaselo, Filippuselo, Bartolomêuselo, Mattêuselo, Tômaselo, Jakôbuselo Alfêusib erninga, Taddêuselo, Simonelo Kanamioᴋ.

¹⁹ Jûdaselo Iskâriot, Jêsusib pititigijomârtanga.

²⁰ Iglomullo angergarput; inugasaksuillo katilermingmatta iniksairutivlutik, nerrinermik ajulerput aglât.

²¹ Najortingitalo tamanna tussaramitsuk, anivigivât inerteromavlugo; oᴋaramik: Issumairutinerpoᴋ.

²² Aglangnigle illisimajut Jerusalemit atârsimajut oᴋarput: Beelzebubeᴋarpoᴋ, Sâtanasillo angajoᴋângatigut Sâtanasit anitipait.

²³ Atautsemullo ᴋaiᴋovait, adsiujutigut oᴋautivlugit: Kanoᴋ Sâtanasib Sâtanaseoᴋatine anititsungnarpaûk?

²⁴ Atanioviub inungit ingmingnut illagêgungnairunik, nunguniarput.

²⁵ Iglublo inungit ingmingnut illagêgungnarunik nunguniarput.

²⁶ Sâtanasetauᴋ ingminut akkerartorune, ingminut illagêgungnairune, sulijungnangilaᴋ, nungulerporle.

²⁷ Sangijoᴋsûb iglunganut itertoᴋarungnangilaᴋ, perᴋutinginik aᴋsârlugo; kissiane sangijoᴋsoaᴋ ᴋelaᴋsorᴋâruniuk, kingorngagut iglungata perᴋutitangit aᴋsârnigarivlugit.

²⁸ Ahamarik oᴋaupapse: Inuit idluitulininginit tamainit issumagijaujungnairomârput, Gûdemut mitautiksaᴋarninginillo aglât.

²⁹ Anernermigle ajunginermik oᴋarnerlûtilik issumagijaujungnainiangilaᴋ issoᴋangitomut, pititaksauvorle erᴋartuivingmut nâksaungitomut.

³⁰ Maᴋojungnartomik anerneᴋartoᴋ oᴋautigingmatsuk.

³¹ Anânangalo ᴋatangutingillo angutit tikiput, silatâne nangerdlutik, tiliklerpullo ᴋaiᴋolugo.

³² Inuille iksivajut ilumangmatsuk, oᴋautivât: Ahâk, anânavît ᴋatangutivîllo silatânêtut aperᴋotigivâtit.

³³ Kiovaillo oᴋarlunelo: Kina anânaga, kikullo ᴋatangutikkâ?

³⁴ Avatimine iksivajut illiniartine takunârpait oᴋarlunelo: Ahâk, tagva anânaga ᴋatangutikkalo.

³⁵ Gûdible perᴋojanganik maliktoᴋ nukarivara, najagivaralo, anânagivaralo.