Markuse 2 - Labrador Inuttitut Heritage Bible

Tumângajub âᴋiktauninganik. Mattêusib ᴋaiᴋojauninganik. Illiniartit nerᴋiksarsiorninginik Sabbateme.

¹ Uvlullo ikitut kingorngatigut Kapernaumut aigivoᴋ: iglomêtorlo tussaramitsuk,

² Inugasaksuit katisâlerput, iniksairutjivlutik, pângane aglât; ajoᴋertorpaillo.

³ Illangitalo tikipât, âtsivlutik tumângajomik, sitamanut akigartaujomik.

⁴ Tikitsungnanginamitsuglo inungnut, iglo ᴋângagut kilakpât; angmaramitsuglo, aumit tumângajub nelavia ningitipât.

⁵ Jêsusible okperningat takogamiuk, tumângajoᴋ oᴋautivâ: Ernera, ajornitit issumagijaujungnairput.

⁶ Aglangnigle illisimajut illangit tagvane iksivajut issumalerput ômatimingne:

⁷ Una ᴋanoetunik oᴋauseᴋarᴋâ akkerartortunik Gûdemût? Kia, Gûdib assiata, ajornerit issumagijungnaijungnarᴋagît?

⁸ Jêsusiblo anernermine issumangit tagvainaᴋ ᴋaujileramigit, aperivait: Sôᴋ ômatipsingne taimak issumavisê?

⁹ Neliak oᴋinersauvâ oᴋarlune tumângajomut: Ajornitit issumagijaujungnaiput; ubvalo: Makitit, aumititit pikit, arvertarlutillô?

¹⁰ Nelojungnairᴋovlusele, Inûb Erninga pitsartuneᴋarmat nuname ajortoêrutjinermik, tumângajomut oᴋarpoᴋ:

¹¹ Oᴋaupagit, makitit, aumititit pikit, angerarlutillo.

¹² Tautuktilugillo makisârpoᴋ, aumitinelo neksarlugit anivoᴋ; ilûnatiglo tataminiarput, Gûdelo nakoridlarpât, oᴋarlutiglo; Taimaitomik mattoma sivorngagut takolaungimarikpogut.

¹³ Ama anigivoᴋ ailunelo tesseᴋsûb sinânut, inuillo ilûnatik tikipât, ajoᴋertorpaillo.

¹⁴ Jêsusiblo ᴋângiutilerame, Lêvi takovâ, Alfêusib erninga, tuniorᴋaivingme iksivajoᴋ, oᴋautivlugolo: Malinga! Nikovidlunelo malikpâ.

¹⁵ Iglunganelo nerrimârvingme iksivatilugo, pimaklertit idluitulijullo unuktut Jêsuse illiniartingillo ikterᴋatigivait nerrimârvingmut. Tâpsominga maliktut unungmatta.

¹⁶ Aglangnik illisimajut Farisêerillo takogamitsuk, pimaklertit idluitulijullo nerreᴋatigingmagit, illiniartinginut oᴋarput: Sôᴋ pimaklertit idluitulijullo nerreᴋatigivlugilo imerᴋatigivagît?

¹⁷ Jêsusib tamanna tussaramiuk, oᴋautivait: Atsuilît inûlijeᴋariaᴋangilat, ᴋanimajut kissimik. Ajortulit ᴋaiᴋojartorpakka, ablatsâmik issumaᴋarᴋovlugit, idluartut pinagit.

¹⁸ Jôhannesiblo Farisêerillo illiniartingit nerritailivakput akulaitomik. Illangitalo tikipât, oᴋarlutik: Sôᴋ Jôhannesiblo Farisêerillo illiniartingit nerritailivakkât akulaitomik, illiniartitille nerritailivangilât?

¹⁹ Jêsusiblo kiovait: Nulianiktomut tikitut ᴋanoᴋ nerritailinajarᴋât, uiksaᴋ illagigamitsûk? uiksaᴋ taipkonunga illautilugo, nerritailijungnangilat.

²⁰ Neliutsomârporle uiksamik aᴋsârtauvingat, tagva nerritailivangniarput.

²¹ Annorâtoᴋaᴋ illâᴋpangilât nutâmik illâksamik; nutâb aliktorniarmago nutaungitoᴋ, aliktornerlo pivalianiarpoᴋ.

²² Vainelo nutâᴋ imerᴋautinut nutaungitunut imertûtinginivât; vainib nutâb aliktorniarmagit imerᴋautit, vainelo kovituinarpoᴋ, imerᴋautillo asserorlugit. Vainele nutâᴋ imerᴋautinut nutânut imertûtijaksauvoᴋ.

²³ Taipsomane perortut ᴋaᴋᴋôjaksat apᴋotigingmagit sabbateme, illiniartingita ingergavlutik sulugainingit nutsulerpait.

²⁴ Farisêerillo oᴋautivât: Ahâk, illiniartitit sabbateme pijaksaungitomik pivut.

²⁵ Oᴋautivaillo: Atuarsilaungilasê, Davidib iliorninganik, ajoᴋsalerame kâleramelo, najortingillô?

²⁶ Gûdib iglunganut iterame, Abjâtar ajoᴋertuinerotilugo; ᴋaᴋᴋôjat takojaksat nerrivait, ajoᴋertuijut assinginut kimullônêt nerrijauᴋojaungitut, tunivlugillo illangit najortiminut.

²⁷ Oᴋautivaillo: Inuk pivlugo sabbate pingortisimavoᴋ, sabbatele pivlugo inuk pingortitaungilaᴋ,

²⁸ Inûb Erninga sabbatemuttauᴋ Nâlegauvoᴋ.