Markuse 16 - Labrador Inuttitut Heritage Bible

Kristusib makininganik. Sakᴋertininganik Marîa Magdalênamut illinniartunullo. Tiliklerninganik Apostelinik. Kilaliarninganik.

¹ Sabbatelo ᴋângermat Marîa Magdalêna, Marîalo, Jakôbusib anânanga, Salomelo tipitsiariksautisiniarput, mingoariartoromavlugo.

² Vogiblo uvlungita sivorlerpângane uvlârarsukut, iluvermut pivut, seᴋineᴋ nuilermat.

³ Ingmingnullo oᴋarput: kia ujaraᴋsoaᴋ illuviub pânganit aksakârtiniarpaûk?

⁴ Tagvungalo takunâramik, ujaraᴋsoaᴋ aksakârtitavineᴋ malugivât; angijôvaksôngmat.

⁵ Iluvermullo iteramik, angut inôsuktoᴋ talerpiata tungâne iksivajoᴋ takogamitsuk, angijoᴋtamik ᴋaᴋortamik annorâlik, kakkilâdlarput.

⁶ Tâpsomale oᴋautivait: Kakkilârase, Jêsuse Nazaremioᴋ kikiaktorsimajoᴋ ᴋenerpase; makisimavoᴋ, tamânêngilaᴋ; ilijauvigilauᴋtanganik takoleritse.

⁷ Oᴋariartoritsele illinniartinginut, Pêtrusemullo, Galilêamut sivorlerilârapsiuk; tagvane takojomârpase, sorlo oᴋautilaujungmase.

⁸ Tuavidlutiglo anivut, iluveᴋ ᴋemaklugo. Sajudlarlutiglo kakkilâdlarput, oᴋangilallônêt inungnut, erᴋsidlaramik.

⁹ Jêsusele uvlâkut makiname, vochib uvlungita sivorlerpângane, sakᴋerᴋârpoᴋ Maria Magdalênamut, anititsivigilauᴋtaminut Sâtanasinik 7 nik.

¹⁰ Tâmna oᴋariartorpoᴋ illagilauᴋtanginut, kiksarlarmiglo ᴋeajunut.

¹¹ Tâpkoalo, tussaramik inôngmat, sakᴋilaungmallo tâpsomunga, okperingilât.

¹² Mattoma kingorngagut tapkoa illâgingnut maggungnut sakᴋerpoᴋ, assianik tautuᴋalerdlune, ingergatilugik natername.

¹³ Tâpkoalotauᴋ illamingnut oᴋariartorivuk tamattominga; tâpkoatauᴋ okperinginivakit.

¹⁴ Kingorlermik 11 it saᴋᴋervigivait nerritilugit, okpingimattalo suadlarpait, ômatingillo mangaidlarmatta; toᴋungajunit makisimajomik takolauᴋtut okperingimagit.

¹⁵ Oᴋautivaillo: Silaᴋsoarmut ilûnânut ainiaritse, oᴋautsillo tussarnertut oᴋautigisigik inungnut tamainut.

¹⁶ Okpertoᴋ baptitaujorlo piulijaujomârpoᴋ; okpingitorle erᴋartortaujomârpoᴋ.

¹⁷ Tamakkoningale nalunaikutaᴋaromârput okpertut: Attimne Sâtanasit anititsomârpait, oᴋanut nutânut oᴋaromârput,

¹⁸ Kuglugiarâlungnik pêjaijomârput; toᴋonartomiglo imeralloarunik, soᴋoseromângilat; ᴋanimajut patingmikpatigik, pijungnairomârput.

¹⁹ Nâlekablo taimâk oᴋautilauramigit, ᴋongmuartitauvoᴋ ᴋilangmut, ingitsartorlarmelo Gûdib talerpiata tungânut.

²⁰ Tâpkoale ilûnainut oᴋariartorput; Nâlekablo piniarᴋatigivait, oᴋausingillo okpernartipait tatamnartunut maliktunut.