Markuse 15 - Labrador Inuttitut Heritage Bible

Jêsusib kiglisiniartauninganik Pilatusemut. Toᴋotaksaunerartauninganik mitautigijauninganiglo. kikiaktortauninganik iluvertauninganiglo.

¹ Kaulermallo erinesuklutik ajoᴋertuijoᴋsuit, angajoᴋâllo, aglangniglo illisimajut, kiglisiniarpaktullo ilûnatik ᴋaggimiolerput, Jêsuselo ᴋelaᴋsorlugo aularutivât, Pilatusemullo unertujutigivât.

² Pilatusiblo aperivâ: Jûdinut ataniovêt? kiovâle oᴋautivlugo: (Nalâgut) oᴋarpotit.

³ Ajoᴋertuijoᴋsuillo angijomik pasidlarpât.

⁴ Pilatusib ama aperivlugo oᴋautivâ: Ahâk, angijomik pasidlarmatit, kiungilatît?

⁵ Jêsusele kiojungnairmat, Pilatusetauᴋ tamattominga tataminiarpoᴋ.

⁶ Aularviksiorangatale Pilatuse iluseᴋarpoᴋ, parngnanairsimavingmêtut illangat, inuit pijomajangat, aularᴋolugo.

⁷ Parngnanairsimadjaujoᴋarporle Barrabasemik attilingmik, kipalijoᴋsuit illagivlugit tigujaujomik, kipalijoᴋsôvlutik inungmik toᴋotsigamik.

⁸ Inugasaksuillo ᴋagudlarlutik tuksiarvigivât, iluserminik atorᴋovlugo.

⁹ Pilatusible oᴋautivait: Jûdit ataningat uvamnut aularᴋojauᴋovisiûk?

¹⁰ Nalunginamigit, ajoᴋertuijoᴋsuit idluigosungnermut tagvunga pitilaungmatsuk.

¹¹ Ajoᴋertuijoᴋsuille inuit kajungertipait, Barrabasemik ᴋenungârᴋovlugit, aularᴋojauᴋovlugo.

¹² Pilatusib ama kiovait oᴋautivlugit: Jûdit ataninganik taijase ᴋanoᴋ uvamnut iliortauᴋovisiûk?

¹³ Kagudlarivut ama oᴋarlutik: kikiaktoruk!

¹⁴ Pilatusible ama apersorpait: Sumîk idluitomik pinialauᴋâ? Nipliluarivut: kikiaktoruk!

¹⁵ Pilatusible tâva inuit satômaᴋaᴋojomavlugit, Barrabase aularᴋovâ tâpkonunga, Jêsusele aklunânut issaᴋajauᴋovâ, unertutigilâllo kikiaktortauᴋovlugo saningajolingmut.

¹⁶ Sorsuktuksalle Jêsuse âpât igloᴋsoarmut kiglisiniarvingmut, sorsuktuksallo ilûnaita atautsemut ᴋaiᴋovait.

¹⁷ Uliksoarmiglo aupaluktamik kapitipât, niaᴋôtiksamiglo kakilautilingmik pergaivut, ilivlugolo niaᴋoanut;

¹⁸ Salutilerdlugolo oᴋarput: Salutitauvotit, Jûdit ataningat!

¹⁹ Niaᴋoagullo anaudlarpât ajaupiamut suvlulingmut, ᴋetserarlugo, sêrᴋortorvigilugolo tuksiarvigivât.

²⁰ Mitautigijarêramitsuglo, uliksoaᴋ aupalluktaᴋ pêrpât, annorânginik nangmininginik atitidlugo, aularutivâllo kikiaktorniardlugo.

²¹ Inuglo senerᴋotoᴋ aksorôtivât, Simonemik attilik Zirenemioᴋ, perorsêvingmit pijoᴋ, Aleksandriblo Ruffiblo atâtangak; tâpsomunga erᴋsuktautipât kikiaktortauviksanga.

²² Apâllo ᴋakᴋamut Golgatamut, imaipoᴋ: niaᴋovinertalingmut.

²³ Vainemiglo ᴋassilinartomik ilalingmik imertinasuarpât; pijomangilâle.

²⁴ kikiaktorêramitsuglo, annorângit avikpait, imerautigivlugillo, kia piksariniarmangâgit.

²⁵ Stundîgle pingajuangne kikiaktorpât.

²⁶ Kolânelo aglaksimavoᴋ, ᴋanoᴋ pasijauninga: Jûdit ataningat.

²⁷ Inuartuglo magguk kikiaktortauᴋatigilugo pivakit, aipâ talerpiata tungânut, aipâlo saumiata tungânut.

²⁸ Oᴋautsit aglaksimajut nalautsivut tagva, imailijut: Idluitulijut akornganut pititauvoᴋ.

²⁹ Tagvûnalo arvertartut mitautigivât, illeᴋetamârlutiglo oᴋarput: Kuinangnâlukpotit katimavingmik asseroijotit, ama sanalugo uvlune pingasune.

³⁰ Ilingnik piulidlarit, seningajolingmit mâna akᴋarit.

³¹ Taimaktauᴋ ajoᴋertuijoᴋsuit mitautigivât ingmingnut oᴋarlutik aglangnik illisimajut illagilugit: Assine ikajulauᴋpait, ingminigle ikajornermik saperpoᴋ.

³² Kristuseogune, Israêlitillo atanerikpatsuk, saningajolingmit mâna akᴋarle, tautorᴋovluta okperᴋovlutalo.

³³ Stundillo 6ingata kingorngagut nuname ilûnâne tâᴋtoksôlerpoᴋ stundit 9ingat tikilugo.

³⁴ Stundillo 9ingane Jêsuse nipperᴋortovlune oᴋarpoᴋ: Eli, Eli, lama asabtani? imaipoᴋ: Gûdiga, Gûdiga, sôᴋ ᴋemakpingâ?

³⁵ Tagvanêtullo illangita tamanna tussaramitsuk, oᴋarput: Ahâk, Eliase ᴋaiᴋovâ.

³⁶ Tagva illangat aᴋpangerpoᴋ, niperᴋumiglo sêrnartotalingmut misuksivoᴋ, ajaupiamullo kapomitârlugo, imertipâ oᴋarlunelo: Ovatsiaro, takunârta, Elîasib akᴋartitsartorniarmangâgo!

³⁷ Jêsusele nipperᴋortovlune anernangerpoᴋ.

³⁸ katimaviksûblo upkoksoanga alikpoᴋ maggôlivlune, pikangat ununga tikidlune.

³⁹ Sorsuktuksalle angajoᴋângata nalâne nangertub, takogamiuk anernangertoᴋ taimaitomut nippersoarmut, oᴋarpoᴋ: Ahamarik, Gûdib angut tâmna ernerivâ.

⁴⁰ Tagvanelo arnaᴋarivoᴋ, alivasiktomit tamakkoninga takunârtunik; tâpkoa illangit tagva Marîa Magdalêna, Marîalo, Jakôbusib mikinersab Jôsesiblo anânangak, Salomelo,

⁴¹ Maliktigilauᴋtangit Galilêamêtilugo kivgartulauᴋtullo; assingillo unuktut Jerusalemut majoraᴋatigilauᴋtangit.

⁴² Unnulermallo, uvloᴋ opalungaijaiviongmat sabbatib tuglia,

⁴³ Josefe Arimatîamioᴋ tikipoᴋ, kiglisiniarpaktut illangat, ajungitoᴋ issumagiktorlo, Gûdib nâlegauvinganik neriungmijoᴋ; tâpsoma sivôranane Pilatuse itervigijartorpâ, Jesusib timinganik tuksiarvigivlugo.

⁴⁴ Pilatusib toᴋojarêrtoᴋ tussaramiuk, tataminiarpoᴋ, sorsuktuksallo angajoᴋângat ᴋaiᴋovâ, aperivlugo toᴋoᴋammermangât?

⁴⁵ Angajoᴋâmillo tussaumaleramiuk, timinga tunijauᴋovâ Jôsefemut.

⁴⁶ Uvineruksajaᴋsiniaramelo, akᴋartitsartorpâ, imuserdlugolo uvineruksajamik, ilivlugolo iluvermut, ᴋairtomut ilulimajomut; ujaraᴋsoarmiglo aksakârtitsivoᴋ iluviub pânganut matuksamik.

⁴⁷ Marîa Magdalênable, Marîablo Jôsesib anânangata, takunârpâk, namut ilijauniarmangât.