Markuse 14 - Labrador Inuttitut Heritage Bible

Ajoᴋertuijoᴋsuit Jêsusib toᴋotauninganik kajusilerput. Mingoartauninganik Betâniame. Judasib angerninganik pititsomavlugo. Jêsusib nerrininganik saugârsungmik aularviksiorutiksamik, ilijininganiglo Kommunionemik. Tuksiarninganik Getsêmaneme. Pititauninganik pijauninganiglo. Pêtrusib misiutjininganik.

¹ Uvluk magguk kingorngangne aularviksiorvik, pujusauteᴋangituniglo ᴋakᴋôjaktorvik naliutilerpoᴋ. Ajoᴋertuijoᴋsuillo aglangniglo illisimajut pingitsertorlutik tigunasuarpât toᴋotsomavlugo.

² Oᴋarpulle: Aularviksiorvingme pinago, inuit pikablâdlarᴋonagit.

³ Betâniamêngmallo Simonib kalaᴋadlalauᴋtub iglungane, nerrimârvingme iksivatilugo, tagva arnaᴋ tikipoᴋ, publaujatsialijardlune tipitsiariksaumik pivianartoᴋsoarmik imalingmik, publaujarlo serᴋomipâ, imangalo niaᴋoanut kovivâ.

⁴ Tagvanêtulle illangit anûlerput oᴋarlutik: Mingoarut tâmna sôᴋ kovijauvâ?

⁵ Imeᴋ tâmna pisiangonajalaurune, akkeᴋarajarpoᴋ ununersamik kênaujanit 300init, aklujunut tunijaksanik. Oᴋarnerlûtigivâllo.

⁶ Jêsusele oᴋarpoᴋ: Arnaᴋ una ulapinasiuk; sôᴋ kiksartipisiûk? ajungitomik pivânga.

⁷ Aklujunik illaᴋatsainarpose; ajungitulivigijomagupsigiglo pituinariaᴋarpose; uvangale najortigitsainarniangilapsinga.

⁸ Ajugaringitaminik pivoᴋ; sivorngagut timiga mingoarpâ ilijartortauviksara pivlugo.

⁹ Ahamarik Oᴋautivapse: Nane oᴋautsit tussarnertut ukkua oᴋautigijaukpatta silaᴋsoarme ilûnâne, oᴋartoᴋarniarivoᴋ tâpsoma piniarninganik uvamnut, erᴋaumajaujutiksanganik.

¹⁰ Jûdaselo Iskâriot, 12it illangat, ajoᴋertuijoᴋsoarnut aivoᴋ, tâpkonunga pititsomavlugo.

¹¹ Tamanna tussaramitsuk, ᴋuviasulerput, kênaujaniglo tunitjivigijomavlugo oᴋarput. Taipkonungalo pitinasualerpâ.

¹² Pudjusauteᴋangitunigle ᴋakᴋôjaᴋtorviub uvlungita sivorlingane, saugârsub aularviksiorutiksab toᴋotaujuksauviane, illinniartingita aperivât: Nane âᴋiksoijartorᴋovitigût saugârsungmik aularviksiorutiksamik nerriniartarnîk?

¹³ Maggungniglo illinniartiminit tiliklerpoᴋ oᴋautivlugiglo: Iglugasaksoarnut aileritik, inungmiglo pâksilârpotik, imektartomik, tamna maliktikko.

¹⁴ Itervigilârtangatalo iglub inuanut oᴋaritik: Ajoᴋertuijub oᴋautjauᴋovâtit: Iglo nauk, nerriviksara saugârsungmik aularvisiorutiksamik illinniartikka illagilugît?

¹⁵ Iglomiglo angijomik iglub ᴋolâne, atuinaujomik âᴋiksorsimatsiartomiglo unertûtilârpâtik; tagvane piksaptingnik âᴋiksoigitik.

¹⁶ Illinniartuglo aivuk, pilutiglo iglugasaksoarnut, sorlolo oᴋautilaungmagik, naipipâk, saugârsuglo aularviksiorutiksaᴋ âᴋiksorpâk.

¹⁷ Unnulermallo 12it illagillugit tikipoᴋ.

¹⁸ Nerrimârvingme iksivagamik nerrilutiglo, Jêsuse oᴋarpoᴋ: Illapse illangata nerreᴋatima pitilârpânga.

¹⁹ Kiksalerdlutiglo aperivât nelekârdlutik: Uvangauniapêk? assialo: Uvangauniarpêk?

²⁰ Kiovaille oᴋarlune: 12it illangata misukseᴋatima.

²¹ Inûb Erninga ainiaralloarpoᴋ, sorlo tapsominga aglaksimangmat; inugle tâmna kappianamêk, Inûb Erninganik pititsijoᴋ. Inungmut tâpsomunga idluarnersaunajarpoᴋ, erniangongikune.

²² Nerrivlutiglo Jêsusib ᴋakᴋôjaᴋ tiguvâ, ᴋujalivlunelo avgorpâ, tâpkonungalo tunivâ oᴋarlunelo: Tigulugo nerrisiuk, tagva timiga.

²³ Ermgusiarsuglo tigugivâ, ᴋujalivlunelo tâpkonunga tâmna tunivâ; ilûnatiglo tâpsomangat imerput.

²⁴ Oᴋautivaillo: Tagva auga, Testamentitâb (aunga) kovijauniartoᴋ unuktut pivlugit.

²⁵ Ahamarik oᴋaupapse, mattoma kingorngagut imerniarungnairpunga napârtub vainiliksab iptinganik, uvloᴋ taimna naliuterᴋârtinago, nutautilugo imileromârupko Gûdib nâlegauvingane.

²⁶ Tuksiarutsillo nertordlerutiksat nâgamigit, anivut ᴋakᴋamut orᴋsoktalingmut.

²⁷ Jêsusiblo oᴋautivait: Unnuarme tamattomane tamapse sinaungajutigilârpapsinga. Aglaksimangmat: Mianersijoᴋ unatadlarniarpara, saukkallo siamartidlarniarput.

²⁸ Makigumale (toᴋungajunit), sivunapsingne Galilêamut aijomavunga.

²⁹ Pêtrusible oᴋautivâ: Ilûnamatsiatik sinaungajutigigalloarpatit, uvanga sinaungajuteᴋarniatsangilanga.

³⁰ Jêsusiblo oᴋautivâ: Ahamarik, oᴋaupagit: Unnuarme tamattomane, angutauneᴋ niplerᴋârtinago maggoertorlune, misiarutigilârparma pingasuertorlutit.

³¹ Oᴋarivorle ama: Ilâ, toᴋoᴋatigijaksarigupkillônêt, misiarutigijomangilagit. Taimaktauᴋ ilûnatik oᴋarivut.

³² Perorsêvingmullo avaluliorsimajomut pivut, Getsêmanemik attilingmut. Illinniartinelo oᴋautivait: Tamaunga ingititse, tuksiariartortilunga.

³³ Pêtruselo, Jakôbuselo, Johanneselo illagivait, sajudlalerlunelo kappiaktoadlalerpoᴋ,

³⁴ Oᴋautivaillo: Tarniga kiksarpoᴋ toᴋo tikidlugo; tagvanêtitse pigârluse.

³⁵ Averngoalerdlune nunamut pâmakterpoᴋ tuksiarlarmelo, ajornangipat, naliutoᴋ tamanna ᴋângerᴋovlugo.

³⁶ Oᴋarlunelo: Abba, Atâtak, ajugaᴋanginavit, ermgusiarsuk una pêruk uvamnit; pijomajaraungitorle, pijomajat pile.

³⁷ Siniktulle tikinamigit, Pêtruse oᴋautivâ: Simon, sinikpêt? stundemik atautsemiglônêt pigâᴋatigijungnangilarmâ?

³⁸ Pigârluselo tuksiaritse, ôktortaulungnermut perᴋonase. Anerneᴋ pijomagalloarpoᴋ, uvinigle sangêpoᴋ.

³⁹ Ama tuksiariartorpoᴋ, oᴋautsit taipkoatsainait atormilugit.

⁴⁰ Ama utermigame, siniktut tikinivait; ijingit oᴋumaimatta uerngarnermut, kigusitiglo tâpsomunga nalovait.

⁴¹ Pingajuaniglo tikinamigit, oᴋautivait: Mâna sinikluselo merngoêrseromavisê? Nâmaksivoᴋ tagva, stunde tikisimavoᴋ. Ahak Inûb Erninga pititauniarpoᴋ idluitulijut agganginut.

⁴² Makititse aularta; ahâk, uvamnik pititsiniartoᴋ ᴋaglivoᴋ.

⁴³ Sullelo taimâk oᴋartilugo, Jûdase, 12it illangat, tikilerpoᴋ inugiartoᴋsuit illagilugit, saviksoalijardlutik ajaupialijarlarmiglo, ajoᴋertuijoᴋsoarnit aglangniglo illisimajunit inuillo angajoᴋânginit pijut.

⁴⁴ Pititsiniartublo nalunaikutaksamik (illitarsijutiksanganik) oᴋautilauᴋpait, oᴋarlunelo: kunilârtara, taimnauvoᴋ! tigusiuk, aulartailitilugolo.

⁴⁵ Tikiname, ᴋanilersârpâ oᴋarlune: Rabbi, Rabbi, kuniklugolo.

⁴⁶ Aktulerpâlle tâva, tigulâllo.

⁴⁷ Sanianêtulle illangata saviksoane amuvâ, ajoᴋertuijoᴋsûblo kivganga ulimavlugo siutairpâ.

⁴⁸ Jêsusiblo kiovlune oᴋautivait: Sorlo inuartomut anivose, saviksoalijarluse ajaupialijalapselo, tigujomavlunga.

⁴⁹ Uvlut tamaita najortigilauᴋpapse katimavingme ajoᴋertuivlungalo, aktulaungilapsingalo; nalautaijulle aglangit nalautserᴋovlugit.

⁵⁰ Illinniartingitalo ilûnatik ᴋemakpât ᴋemâvlutiglo.

⁵¹ Inôsuktullo illangata malikpâ, sâtomik annorâmik uvineruliub; inôsuktullo tâmna tiguvât.

⁵² Uvinerunele iperarpâ, annorairdlunelo ᴋemâvoᴋ taipkonangat.

⁵³ Jêsuselo ajoᴋertuijoᴋsoarmut pitipât; tagvunga ajoᴋertuijoᴋsuit, angajoᴋâllo, aglangniglo illisimajut ilûnatik katimavut.

⁵⁴ Petrusible kinguvasiklune malikpâ ajoᴋertuijoᴋsûb igloᴋsoanganut pilune; tagvanelo kivgat iksivaᴋatigivait, ikomamut kitjaᴋejârlune.

⁵⁵ Ajoᴋertuijoᴋsuille ᴋaggimiojullo ilûnatik pasitiksarsiorput Jêsuse pivlugo, toᴋotsomavlugo, nagvângilallo.

⁵⁶ Unuktut oᴋautigiludlarpât saglovlutik, oᴋausingille adsigêngilat,

⁵⁷ Illangillo saglovlutik pasiklertut sakᴋerput, oᴋarlutik:

⁵⁸ Tussalauᴋpavut, oᴋarmat: Tempele aggangnut sanamajoᴋ asseroromavara, uvlunelo pingasune assianik sanalunga aggangnut sanamangitomik.

⁵⁹ Sullele oᴋausingit adsigêngilat.

⁶⁰ Ajoᴋertuijoᴋsoarlo akornganit nikovipoᴋ Jêsuselo aperivâ oᴋarlune: kiungilatît tamakkonunga ukkua pasiklerninginût?

⁶¹ Nipleranele kiungilaᴋ. Ajoᴋertuijoᴋsûb ama aperivâ, oᴋautivlugo: Kristuseovêt, nakorinadlartub erningâ?

⁶² Jêsusele oᴋarpoᴋ: Tâmnauvunga. Inûblo Erninga takojomârpase iksivajoᴋ (Gûdib) pitsartujub talerpiata tungâne, ᴋilaublo nuvujangitigut akᴋartoᴋ.

⁶³ Tâva ajoᴋertuijoᴋsûb annorâne alikpait, oᴋarlunelo: kigligiutsijeᴋariaᴋarungnairpogut.

⁶⁴ Gûdemik oᴋarnerlûteᴋarninga tussarpase; ᴋanoᴋ issumavise? Tâpkoale ilûnatik erᴋartorpât, toᴋotaksaujoᴋ oᴋautigilugo.

⁶⁵ Tagva illangita ᴋetseralerpât, kênangalo natuvlugo erᴋsârpât, oᴋautivlugo: Nalautalertigut. Kivgallo kênanga tiglukpât.

⁶⁶ Pêtruselo igloᴋsûb iluata pârdlerᴋamêtilugo, ajoᴋertuijoᴋsûb kivangita arnat illangata itertub,

⁶⁷ Pêtruse kitjaᴋejârtoᴋ takogamiuk, takunâlerpâ oᴋarlune: Igvittauᴋ Jêsuse Nazaremioᴋ illagivat.

⁶⁸ Misiarporle oᴋarlune: Illitaringilara, oᴋautsitillo nalogivakka. Pâmullo aningmat, angutauneᴋ niplerpoᴋ.

⁶⁹ Arnablo ama takogamiuk, senianêtunut oᴋalerivoᴋ: Tâmna taipkoa illangat.

⁷⁰ Misiarivoᴋ ama. kingornganegalâk, tagvanêtut Pêtruse ama oᴋautivât: Ahamarik taipkoa illagivâtit; Galilêamiogavit, oᴋautsivît nalunailivâtit.

⁷¹ Ingminulle oᴋarnerlulerdlune (Gûde taivlugo) oᴋarpoᴋ: Inuk tâmna oᴋautigijase illitaringilara.

⁷² Angutaunerlo aipânik niplerpoᴋ. Tagva Pêtrusib erᴋarpait Jêsusib oᴋausingit, oᴋautilaungmago: Angutauneᴋ maggoertorlune niplerᴋârtinago, misiarutigilârparma pingasuertorlutit. Tagva ᴋeasilerpoᴋ.