Markuse 13 - Labrador Inuttitut Heritage Bible

Jêsusib nalautaininganik Jerusalemib asserortauninga erᴋartuiviglo kingorlerpâᴋ pivlugik.

¹ Jêsuselo katimaviksoarmit aningmat, illiniartingita illangata oᴋautivâ: Ajoᴋertuijoᴋ, takulaurit, igloᴋsoaᴋ una, ujarᴋallo makkoa ᴋanoᴋ sanamajût!

² Jêsusiblo kiovlune oᴋautivâ: Tamakkoa tamaita sanamajoᴋsuit takogalloarpigît? ujarᴋat ukkua ilûnatik serᴋomitaujomârput, ᴋalerêktoᴋarungnailutiglo.

³ Kakᴋamelo orᴋsoktalingme iksivangmat katimaviub akiane, Pêtrusib, Jakôbusiblo, Johannesiblo, Andrêasiblo kissimeovlutik apersorpât:

⁴ Oᴋautitigut, Kanga pijuksat tamakkoa tamaita pijomârᴋât? Sunalo nelunaikutaksaujomârᴋâ, tamakkoa tamaita nalautsilerpattâ?

⁵ Jêsusib kiovait oᴋarlune: ᴋamatitse, uivêrijauᴋonase.

⁶ Unuktut tikitsomârmatta attera atterivlugo oᴋarlutik: Kristuseovunga, unuktullo tamartiniarpait.

⁷ Unatartunigle, unatartullo unipkautauninginik tussaromârupse, erᴋsiniarase, taimailiortoᴋartuksaungmat. Naggatiksarle naliutingilaᴋ sulle.

⁸ Inuᴋatigât inuᴋatigênut assimingnut sorᴋsugomârput, ataniovingmiullo ataniovingmiunut assimingnut. Nunat sunatuinarne sajukpilugomârput, kângnartorsoarmiglo erᴋsinartomiglo pijoᴋaromârpoᴋ. Tamadja kappianartub pigiarninga.

⁹ Ilipsele nangminipsingnik udjertoritse. Erᴋartuivingmut katimavingmingnullo pititsomârpâse; issaᴋajaujariaᴋarpose, ataniojunullo ataniviksoarnullo âtaujariaᴋarpose, uvanga pivlunga, nelojungnairutiksanginut.

¹⁰ Sivorngagullo oᴋautsit tussarnertut oᴋautaujuksauvut inuᴋatigênut tamainut.

¹¹ Aularutikpasele unertojutigiluselo, sivôraniarase, sumik oᴋausiksaᴋarniarmangâpse, issumaᴋarsimaniaraselo sivorngagut, stundeme mattomane tunergusiase oᴋauserisigik. Ilipse oᴋanginapse, Anernerle ajungineᴋ.

¹² Katangutible ᴋatangutine toᴋomut pititsomârpâ, atâtablo ernine ᴋitorngallo angajoᴋâtik akkerartoromârpait toᴋoᴋovlugillo.

¹³ Ilûnatiglo ômigijomârpâse attera pivlugo. îssuanulle soᴋosijuitoᴋ piulijaujomârpoᴋ.

¹⁴ Nungutsiviuble maᴋojungnarninga takogupsiuk, oᴋautigijaumajoᴋ nalautaijomut Daniêlemut, inigijaksaringitaminêtoᴋ, (tamattominga atuarsijub kamagilerligit!) taimaipat, Jûdêamêtoᴋ ᴋemâlerle ᴋakᴋanut.

¹⁵ Iglublo ᴋânganêtoᴋ akᴋarniarane iglomut, iterniaranelo, sumik iglominit aikleromavlune.

¹⁶ Perorsêvingmêtorlo uterniarane, annorâne pijartorlugit.

¹⁷ Kappianamêgle singaijut amâmaktitsijullo, tamanna naliutikpat.

¹⁸ Tuksiaritsele, ᴋemâviksase okiome pilerᴋonago.

¹⁹ Uvlune taipkonane kappianartoᴋaromârmat naleᴋangitomik; silab pigiarninganit, taimangat Gûdib inuit pingortilaungmagit, tamanna tikidlugo taimaitoᴋalaungilaᴋ, kingornganelo taimâk angitigijomik kappianartoᴋarnianginivoᴋ.

²⁰ Nâlekablo uvlut taipkoa ikitliniangipagit, inuk atauserlônêt piulijaunajangilaᴋ, anerimajulle tâpsoma anerilauᴋtangit pivlugit uvlut taipkoa ikitlijaujomârput.

²¹ Uvlut taipkoa naliutikpatta, oᴋautjaugupse: Ahâk Kristuse tagvanêpoᴋ ikanelônêt, tamanna okperiniarasiuk.

²² Kristuseovlutik oᴋartut, nalautainerluktut saglojut sakᴋeromârput, nalunaikutaᴋsoarniglo tatamnartunik pilutik, annerimajut aglât tamartinasuarlugit, ajornangipatta.

²³ Ilipsele kamatsiaritse. Ahâk, makkoninga tamainik oᴋautivapse naliuterᴋârtinagit.

²⁴ Uvlut taipkoa kappianartut kingorngatigut, seᴋineᴋ taᴋᴋerlo ᴋaumajungnairomârpuk.

²⁵ Uvloritjallo katagomârput ᴋilangmit, ᴋilaublo pitsartuningit aulataujomârput.

²⁶ Inûblo Erninga tâva takojomârpât ᴋilaub nuvujangitigut akᴋartoᴋ, pitsartudlarlune ânanaudlartoᴋ.

²⁷ Engelinelo tilijomârpait, katitilugillo anerijane anorenit sitamanit, nunab issuanit ᴋilaub issuanut.

²⁸ Napârtomit paungatannaᴋarpaktomit adsiujomik illinniaritse. Akkerungit ipteᴋalerangata, sigilerangatalo, ᴋaujimavose aujajaraklilermat.

²⁹ Taimaktauᴋ ilipse, makkoa tamaita takogupsigik, ᴋaujimaleritse, ᴋaglilermat.

³⁰ Ahamarik oᴋaupapse: Kinguvânguᴋatigêt ukkua nunguniangilat, makkoa ilûnatik nâmakserᴋârtinagit.

³¹ Kilaglo nunalo nungujomârpuk, oᴋausikkale nungujomângilat.

³² Uvlormigle stundemiglônêt taipsominga ᴋaujimajoᴋangilaᴋ; Engelillônêt ᴋilangmêtut, Ernerublônêt ᴋaujimanginivât, Atâtable kissime ᴋaujimavâ.

³³ Kamatitse, pigâritse tuksiarluselo; ᴋanga naliutinajarmangât nalogapsiuk.

³⁴ Sorlo angutitut iglominik ᴋemaijotut nunab assianut aulardlune, kivganelo angajoᴋângortidlugit, ilûnaita tunitjivigingmagit suliaksanginik, iterviublo udjertortinga perᴋungmago, pigârᴋovlugo.

³⁵ Taimâk pivlugo pigâritse, iglub inuata tikilervia nalogapsiuk, unnukullônêt, unnuaᴋ ᴋiterarpallônêt, angutauneᴋ niplerpallônêt, uvlâkullônêt.

³⁶ Tuavitomut tikitauᴋonase, siniktiluse opingartauᴋonaselo.

³⁷ Ilipsingnulle oᴋauserijamnik tamainut oᴋarpunga: Pigâritse!