Markuse 12 - Labrador Inuttitut Heritage Bible

Adsiujomik perorsêvilerijunik vainiliksatalingmik. kênaujanik nunaliksiutauᴋojaujunik. Makitsomârnermik. Perᴋojamik anginerpaujomik. Kristusib kinausinganik. Udsertorᴋojaunermik Farisêerinit. Uigarniub tunergutiksârsuanik.

¹ Adsiujuniglo oᴋarvigilerpait: Anguteᴋalauᴋpoᴋ perorsêviliortomik, vainiliksanik ilijivlune, avatâlo avaluliudlarlugo; paungallo iptêjartauviksanganik sanalaurivoᴋ, nuvuguseᴋsoaliorivorlo; perorsêvilerijunullo pimajauᴋogamiuk, nuname asianut aularpoᴋ.

² Paungallo inilervait naliutingmat, kivgame ilangat tilivâ perorsêvilerijunut, perorsêviub paunganginik pijartorᴋolugo.

³ Tâpkoale tiguvât, anaudlarlugolo naksartinagolo aulartipât.

⁴ Ama kivgamik asianik tiliklerpoᴋ taipkonunga; tâmna ujarᴋanut milorpât, niaᴋoa kilidlarlugo, mitautigivlugolo aulartipât.

⁵ Ama kivgamik asianik tiliklerpoᴋ; tâmnale toᴋopât: asingillo unuktut, ilangit isaᴋavait, ilangillo toᴋodlugit.

⁶ Sulle ernetauᴋarpoᴋ nagligijaminik; tâmna kingorliotilerdlugo tiligiva taipkonunga, oᴋarlune: Ernera ileraginiarpât.

⁷ Perorsêvilerijulle ingmingnut oᴋarput: Tagva kingormgujijuksaᴋ; attê, toᴋoniarlavut, kingormgutijaksangillo uvagut pigilerdlugit.

⁸ Tigulugolo toᴋopât, egidlugolo perorsêviub silatânut.

⁹ Perorsêviub inua, ᴋanoᴋ tagva pijomârᴋâ? tikitsomârpoᴋ, perorsêvilerijut ukkua toᴋodlugit, perorsêviglo asinginut pimajauᴋojomârpâ.

¹⁰ Aglait ukua atualaungilasê: Ujarak, igloliortut igitangat, tâmna iglub terreᴋoa ujaraulernerpôᴋ?

¹¹ Tagva Nâlekab piniarninga, tatamnadlarporlo ijiptingnut.

¹² Tigunasuaralloarpâllo, (inuille erᴋsigivait) malugigamitsuk, adsuijomut matomunga oᴋautigingmagit; ᴋemaklugolo tâva aularput.

¹³ Tilivaillo tâpsomunga Farisêerit Herôdesiblo kivgangita ilangit, oᴋausinginut aportinasuarlugo.

¹⁴ Tâpkoa tikinamitsuk, aperivât: Ajoᴋertuijoᴋ, okpernartôjotit ᴋaujimavaptigit, inuillo sivôragingilatit, tâpkoa kinauningit kamaginginangne; Gûdemullo apᴋotiksamik ajoᴋertuitsiarpotit. Ataniviksoaᴋ kênaujanik nunaliksiutauᴋojaujunik tunitjivigilugo idluarᴋâ, idluangilarlônêt? tunitjijuksauvitâ, tunitjijuksaungipitâlônêt?

¹⁵ Takkormôrningille tukisivait oᴋautivaillo: Sôᴋ ôktorpisingâ? kênaujaᴋ ᴋaisiuk, takolago.

¹⁶ kênaujarlo ᴋaipât. Apersorpaillo: Kia adsinga, kialo aglangit ᴋolânê? Kiovât: Ataniviksûb.

¹⁷ Jêsusib tagva oᴋautivait: Ataniviksoarmut tunisiuk ataniviksûb pinga, Gûdemullo Gûdib pinga. Tataminiarivâllo tagva.

¹⁸ Saduzêerillo tikipât, makiviksaᴋangitomik oᴋartut; aperivâllo oᴋarlutik:

¹⁹ Ajoᴋertuijoᴋ, Môsesib aglagvigivâtigut: Angutib angajua toᴋokpat, nuliane ᴋitorngaᴋangitoᴋ ᴋemakpago, nukangata tagva (angajugilauᴋtame) nulianga nuliarijaksarivâ, angajune kinguvâksarsilugo.

²⁰ Tagva nukarêᴋalauᴋpoᴋ 7nik. Angajukleᴋ nulianilauᴋpoᴋ; ᴋitornginanelo toᴋovoᴋ.

²¹ Tugliata nuliarilermigamiuk, tâmnatauᴋ toᴋogivoᴋ ᴋitorngingminane. Taimaktauᴋ pingajuata pigivâ.

²² Tâpkoa 7it ilûnatik nuliarivât (kingorlerêklutik), ᴋitorngineᴋaratik. Ilûnatik kingorngatigut arnaᴋtauᴋ toᴋogivoᴋ.

²³ Makivingmele, makikunik, taipkoa 7it naliata nuliarijomârpaûk? ilûnatik nuliarilaungmatsuk.

²⁴ Jêsusiblo kiovlune oᴋautivait: Imaingilâᴋ? Tamarpose, aglait nalogapsigik, Gûdib ajugaᴋanginingalônêt.

²⁵ Toᴋungajunit makitsomârunik, nulianingniangilat, uiningniangilallo, Engelititulle ᴋilangmêtutitut itsomârput.

²⁶ Toᴋungajunik makitsomârtunik Môsesib aglanginik atuarsilaungilasê? napârtut saniane Gûdib oᴋautilaungmago: Abrahab Gûdigivânga, Isaab Gûdigivânga, Jâkoblo Gûdigivânga.

²⁷ Toᴋungajulle Gûde Gûdigingilât, inôjulle Gûdigivât. Taimak pivlugo tammarpose angijomik.

²⁸ Aglangniglo illisimajut illangata tikipâk ingmingnut apersûtilaungmatta, tussaramigit: idluartomiglo (Jêsusib) kiongmagit, tussaramiuk, apersorpâ: Perᴋojanit tamainit naliat anginerovâ?

²⁹ Jêsusib kiova: Perᴋojanit tamainit anginerojoᴋ imaipoᴋ: Ahâk, Israêle, Nâlegaᴋ Gûdivut Gûdetôvoᴋ.

³⁰ Gûdingnik Nâlegarnik nagliktuksauvotit ômatingnut tamânut, tarningnullo tamânut, issumangnullo tamainut, pitsartunernullo tamainut. Tâmna pijariaᴋarnerojoᴋ perᴋojanit tamainit.

³¹ Aipangalo tâpsotunaᴋ-ipoᴋ: Inuᴋatingnik iliktut nagliktuksauvotit. Assianik tâpkonangat anginersamik perᴋojaᴋangilaᴋ.

³² Aglangniglo illisimajub oᴋautivâ: Ajoᴋertuijoᴋ, ahamarik, mikseᴋârtomik oᴋarpotit, Gûde atausiongmat, tâpsomalo assianik Gûdeᴋangilaᴋ.

³³ Tâmna nagligilugo ômamut tamânut, issumanullo tamainut, tarnimullo tamânut, pitsartunernullo tamainut, inuᴋatine ingmitut nagligilugo, tagva ajunginersauvoᴋ tunergutiksanit ôtaksanit tamainit.

³⁴ Silatujomiglo kiolaungmat, Jêsusib tussaramiuk, oᴋautivâ: Gûdib nâlegauvinganut ᴋanilerpotit. Kingorngagullo aperilugo saperpât.

³⁵ Jêsuselo katimaviksoarme ajoᴋertuivlune, kiovlugillo oᴋarpoᴋ: Sôᴋ aglangnik illisimajut Kristuse oᴋautigivatsûk, Dâvidib erneringmagô?

³⁶ Dâvide nangminiᴋ oᴋarmat Anernikut ajungikut: Nâlegaᴋ Nâlekamnut oᴋarpoᴋ: Talerpingma tungânut ingitit, ômigijingnik ilijerᴋârtinanga itigapît ikogganganut.

³⁷ Nâlekaminik Dâvidib taigamiuk; ᴋanoᴋ ernerivaûk? Inugasaksuillo tussarneridlarpât.

³⁸ Ajoᴋertorpaillo oᴋautivlugit: Aglangnik illisimajunik udjertoritse! annorânik angijoᴋtanik atoromavut, niuvervingmelo salutitaujomavut.

³⁹ katimavingmelo nerrimârvingmelo isukliovlutik iksivajomavut.

⁴⁰ Uigarnerit pingit nungupait, takijuniglo tuksiarutinik tuksiarutsomavlugit oᴋarput. Tamanna pivlugo taipkoa pitlartaunersaujomârput.

⁴¹ Jêsuselo ingipoᴋ Gûdib iklervingata nalânut, inuit takunârlugit, kênaujanik illijijut Gûdib iklervinganut. Unuktullo akluitut unuktunik ilijivut.

⁴² Uigarnerlo aklujoᴋ tikipoᴋtauᴋ, kênaujârsungnik maggungnik ilijingmijoᴋ; tâpkoa centetut atausertut ipuk.

⁴³ Illinniartinelo ᴋaiᴋovlugit oᴋautivait: Ahamarik oᴋaupapse, uigarneᴋ una aklujoᴋ Gûdib iklervinganut ununersanik ilijivoᴋ, ilijijunit tamainit.

⁴⁴ Tamakkoa illûnatik pimingnik atorniangitamingnik ilijivut; unale aklujoᴋ perᴋutituaminik ilijivoᴋ, inôgutiksaminik tamainik.