Markuse 10 - Labrador Inuttitut Heritage Bible

Nuliarêngniub avitauninganik. Sorutsit saimartauninginik. Akluinerub agviarungnarninganik. Jêsusib nelautaininganik âniaminik. Illiniartit nertortaujomaninginik. Bartimêusib âᴋiktauninganik.

¹ Tagvangat ama aularivoᴋ, Jûdêab erᴋânut pivlune, Jordanib akianut. Inuillo ama inugiartoᴋsôvlutik tikipât, iluserivaktamitullo ajoᴋertorivait.

² Farisêerillo tikipât apersorlugo: angutib nuliane avidlugo idluarmangât, tamattomungalo ôktorpât.

³ Kiovlunele oᴋautivait: Môsesib ᴋanoᴋ perᴋovâsê?

⁴ Oᴋautivât: Môsesib agvialaungilâtigut, aglangnik avitsitiksanik aglakluta, avilugolo (arnaᴋ).

⁵ Jêsusib ᴋiovait oᴋautivlugillo: Omatipse mangainingit pivlugit perᴋojamik taimaitomik aglalauᴋpoᴋ ilipsingnut.

⁶ Pingortitalle pigiarninganit Gûdib angut atauseᴋ arnarlo atauseᴋ pingortipak.

⁷ Tamanna pivlugo angutib atâtane anânanelo ᴋemangniarpak, nuliane ungagivlugo.

⁸ Tâpkoalo magguk uvinioniarpuk atautsemik. Tamanna pivlugo maggôjungnairlutik, uviniovuk atautsemik.

⁹ Gûdib katititâgik inub avititaksaringilak.

¹⁰ Iglome illiniartingita amalo mattominga aperingmatsuk,

¹¹ Oᴋautivait: Nuliaminik avitsijub, assianiglo nulianiklune, nuliarêngneᴋ asserorpâ tâpsomunga.

¹² Nuliablo uine ᴋemakuniuk assianiglo uiniklune, nuliarêngneᴋ asserorivâ.

¹³ Nutaᴋaniglo âtsivut tâpsomunga, patingmijauᴋovlugit. Illiniartingitale nutaᴋanik âtsijut suadlarpait.

¹⁴ Jêsusible tamanna takogamiuk, idluaringilâ, oᴋautivlugillo: Nutaᴋat uvamnut pilit, inerterasigiglo; tâpkoa Gûdib nâlegauvinga pigingmatsuk.

¹⁵ Ahamarik oᴋaupapse: Nutaᴋatut Gûdib nâlegauvinganik pingitoᴋ, iterniangilaᴋ.

¹⁶ Erᴋilugillo aggangminut patingmivait, saimartilugillo.

¹⁷ Anilaungmallo apᴋosinermut, inuit illangata ingiarsijub sêrᴋortorvigilugo aperivâ: Ajungitotit ajoᴋertuijoᴋ, sumik piniartuksauvîk, inôtsemik nâksaungitomik kingormgujerᴋovlungâ?

¹⁸ Jêsusible kiovâ: Sôᴋ ajunginerarpingâ? Ajungitoᴋangilaᴋ, Gûde kissime ajungilaᴋ.

¹⁹ Perᴋojat ᴋaujimagalloarpatit: Nuliarêngnermik asseroijuksaungilatit. Inuartuksaungilatit. Tigliktiksaungilatit. Kigliluktomik oᴋautigijaᴋartuksaungilatit. Akkilênerluktuksaungilatit. Atâtallo anânallo nâlekik.

²⁰ Kiovâle oᴋautivlugolo: Ajoᴋertuijoᴋ, tamaita tamakkoa malilauᴋpakka sorusionimnit.

²¹ Jêsusiblo takusarpâ, nagligilugolo oᴋautivâ: Atauseᴋ sulle pigingilat. Perᴋutitit tamaita niorvgotigijartokit, aklujunullo piliutigilugit, tagva perᴋuteᴋatsiarniarpotit ᴋilangme; ᴋailerillo maliklunga, oᴋumaitiksarniglo ilingnut pît.

²² Tamannale oᴋauseᴋ tussaramiuk anûlerpoᴋ kiksarlarmelo ᴋemakpâ; perᴋuteᴋarame unuktunik.

²³ Jêsusible ᴋeviarlune illiniartine oᴋautivait: Akluitut nâlegauvingmut ᴋilangmêtomut pilutik sapernakasakpoᴋ.

²⁴ Illiniartingitale oᴋausingit tamakkoa kakkilârutigivait. Jêsusible ama kiovait oᴋautivlugillo: Nagliktakka ᴋitorngakka, Gûdib nâlegauvinganut iteriaᴋ ajornarpoᴋ perᴋutimingnik tatteᴋartunut.

²⁵ Ajornanginersauvoᴋ, nergjutsoaᴋ kamêle merᴋutib ijingagut pilune, akluitub iterniarninganit Gûdib nâlegauvianut.

²⁶ Kakkilârnersaugivut ama, oᴋarlutiglo ingmingnut: Kinale tagva piulijaujungnarniarᴋâ?

²⁷ Jêsusible takusarlugit oᴋautivait: Inungnut ajornarpoᴋ, Gûdemulle ajornangilaᴋ; Gûdemut tamaita ajornangilat.

²⁸ Tagva Pêtrusib oᴋautivâ: Ahâk tamaita ᴋemalauᴋpavut malilarpillo.

²⁹ Jêsuse kiovoᴋ oᴋarlunlo: Ahamarik oᴋaupapse: Inûb iglune ᴋemakuniuk, ᴋatangutinelônêt, atâtanelônêt, anânanelônêt, nulianelônêt, ᴋitornganelônêt, perorsêvinelônêt, uvanga pivlunga oᴋautsillo tussarnertut pivlugit;

³⁰ Mattomanêdlune 100 ertortunik piniarivoᴋ iglunik, ᴋatangutiniglo, anânaniglo, ᴋitornganiglo, perorsêvingniglo, mâne ômigijaunermine, silaᴋsoarmelo pijomârtome inôgumik nungusuitomik.

³¹ Unuktulle sivorlît kingorliojomârput, unuktullo kingorlît sivorliojomârput.

³² Apᴋomêpulle, Jerusalemut majorariardlutik; Jêsuselo sivorlerivât, kakkilâdlarpulle, erᴋsivlutiglo malikpât. Jesusiblo ama tâpkua 12 it ingminut pitipait, oᴋautivlugillo pijauniarnerminik.

³³ Ahâk, takpaunga Jerusalemut aivogut, Inûblo Erninga pititaulârpoᴋ ajoᴋertuijoᴋsoarnut aglangniglo illisimajunut; taipkoa toᴋotaksautilârpât, nelojunullo unertujutigilârpât.

³⁴ Taipkoalo mitautigilârpât, issaᴋavlugolo ᴋetserarlugolo toᴋolârpât, uvluglo pingajuangne makilârivoᴋ.

³⁵ Jakôbusiblo Jôhannesiblo, Zebedêusib ernîkita tikipâk, oᴋarlutik: Ajoᴋertuijoᴋ, ilingnut piniarviojomavoguk ᴋenuarijaptingnik.

³⁶ Aperivaᴋ: Sumîk uvamnut piniarviojomavitîk?

³⁷ Kiovâk: Perᴋogitiguk, atauseᴋ talerpikpît tungâne, aipangalo saumikpît tungâne iksivaᴋolunuk nâlegauvingne.

³⁸ Jêsusible oᴋautivaᴋ: Tuksiararijatik nelovatik. Ermgusiârsub imanga imigaksara imerungnarpitikô, baptitauniksaralo baptitauniksarijungnaralloarpitikô?

³⁹ Kiovâk: Ahaila ajungikalloarpoguk. Jêsusible oᴋautivak: Ermgusiârsub imanga imigaksara imerniaralloarpatik baptitauniksamnullo baptitaujuksaugalloarpotik;

⁴⁰ Talerpingmale tungâne, saumingmalônêt tungâne iksivajomârneᴋ uvamnut perᴋojaksaungilaᴋ iliptingnut; iksivaᴋojaujulle kissimik iksivajomârput.

⁴¹ Illiniartut 10 it tamanna tussaramitsuk, anûjutigilerpakit Jakôbuse Jôhanneselo.

⁴² Jêsusible ᴋaiᴋovait oᴋautivlugillo: Kaujimavose, nunab ataningit ataniotingmatta, atanersuillo pitsartuneᴋarmatta.

⁴³ Ilipsele taimailerniarase; angnerojomajorle kivgaksauvoᴋ ilipsingnut.

⁴⁴ Illaselo ataniotijomajoᴋ kivgaksauvoᴋ ilûnapsingnut.

⁴⁵ Inûb Erningatauᴋ tikingilaᴋ, kivgartortaujomavlune, kivgartoriartorporle, tunivlunelo inôtsiminik unuktut akkiliksairutiksanginik.

⁴⁶ Jêriᴋomullo pivut. Jêriᴋomillo aularmat, nangminiᴋ illiniartingillo inugiartoᴋsuillo, tautungitoᴋ apᴋotâne iksivavoᴋ, ᴋenuvlunelo, Bartimêusemik attilik, Timêusib erninga.

⁴⁷ Jêsuseojoᴋ Nazaremioᴋ tussaramiuk, niplialerpoᴋ oᴋarlunelo: Jêsuse, Dâvidib erninga nâpkiginga!

⁴⁸ Unuktullo inerterpât nipangerᴋovlugo. Niplilualerporle: Dâvidib erninga, nâpkiginga!

⁴⁹ Jêsusiblo noᴋᴋardlune ᴋaiᴋojauᴋovâ. Tâva tautungitoᴋ ᴋaiᴋovât oᴋautivlugolo: Nikovidlutit manigolerit, ᴋaiᴋungmatit.

⁵⁰ Annorânelo egipâ, nikovilarmelo Jêsusemut pivoᴋ.

⁵¹ Jêsusiblo aperivâ: Sumîk uvamnit pijomavêt? Tautungitub kiovâ: Rabbi (ajoᴋertuijoᴋ), tautuleromavlunga.

⁵² Jêsusib oᴋautivâ: Aularit, okpernivît ikajorpâtit. Tagvainarlo tautulerpoᴋ, malikpâlo apkome.