Mâlaki 3 - Labrador Inuttitut Heritage Bible

¹ Ahâk, sivorlerijara tilivara, tâpsomalo apᴋutiksaᴋ âᴋiksolârpâ sivunamne: Nâlegarlo, ᴋenertase, tikiaᴋilârpoᴋ katimaviksoaᴋôtiminut: angiᴋatigêngnerub sivorlerijanga, ᴋuviagidlartase, ahâk, tâmna ᴋaivoᴋ, oᴋarpoᴋ Nâlegaᴋ Zebaot.

² Kiale uvloᴋ tikiviksanga sapingilârᴋaûk? Kinalo nangerungnalârᴋâ tâmna saᴋᴋijârpât? Goldemik auksititsijûb ikomangatut ipoᴋ, ergortuijûblo ubvautingatut;

³ Iksivajomârporlo auksititsilune sujungaititsilunelo silberemik, Lêviblo erningit sujungaititsomârpait, epᴋêjarlugillo goldetut silberetullo; tunergusilârpullo Nâlekamut tunergutinik nerᴋiksanik idluarnerme.

⁴ Tagva Jûdab Jerusalemiblo tunergutingit nerᴋiksat Nâlekab ᴋuviagilârpait sorlo itsarsoarme, sôrlo jârine nutângojungnaitune.

⁵ Kiglisiniarlungalo najoromârpapse, erinesuavlungalo angakuit, assiniartullo, saglovlutiglo angertut kigligiutjivigijomârpakka; oᴋumaiksartitsijullo kivganik ikajusingine, uigarnerniglo, illiarsungniglo, arᴋtainiktullo takorngartanik idluarijanginik, sivôralugatiglo uvamnik, oᴋarpoᴋ Nâlegaᴋ Zebaot.

⁶ Uvanga Nâlegaᴋ soᴋosijuigama; taimaimat ilipse Jâkob ᴋitorngangit nungutaungilase.

⁷ Atâtapse uvlunginit aglât sanguvose maligaksauᴋojamnit, nâlengnagillo. Uteritse uvamnut, uvangalo uteromagivunga ilipsingnut, oᴋarpoᴋ Nâlegaᴋ Zebaot. Oᴋarposele: ᴋanoᴋ ilivluta utertuksauvitâ?

⁸ Inûb Gude arᴋtaiviginiarᴋaûk? Ilipsele arᴋtaivigivapsinga. Oᴋarposele: Sunamik arᴋtaivigivitigît? Katersortapse tellimaujoanik tunergutiniglo isautijaujunik.

⁹ Ôminarsijauvose ôminarsiᴋojinermut; arᴋtarapsinga, ilâ, inôᴋatigêksuit tamakkoa iluengartut.

¹⁰ Katersortapse tellimaujoat ilûnaita âsigik ᴋematulivingmut, nerᴋiksaᴋarᴋovlugo iglumne, ôktorsingalo mâna mattomunga, oᴋarpoᴋ Nâlegaᴋ Zebaot, ᴋilaub igalângit angmaromângimangâpkit ilipsingnut, saimanartoᴋsoarmiglo koveriluse nimniornadlartomik.

¹¹ Pivluselo nerrijiniktoᴋ inerteromârpara, asseroiᴋonago nunapse perortunginik; vaineliksataliselo kataiᴋonagit paungamingnik perorsêvingme neliutiᴋârtinago, oᴋarpoᴋ Nâlegaᴋ Zebaot.

¹² Inôᴋatigêksuillo ilûnatik pilloringneraromârpâse: nunaselo inerᴋonadlaromârmat, oᴋarpoᴋ Nâlegaᴋ Zebaot.

¹³ Pingijaidlartunik oᴋauseᴋarpose uvamnut, oᴋarpoᴋ Nâlegaᴋ. Oᴋarposele: Kanoetunik oᴋauseᴋarᴋitâ ilingnût?

¹⁴ Oᴋarpose: Gude kivgartorlugo tukkeᴋalungilaᴋ: sumiglo piksarsivitâ perᴋojangit malikuptigîk, arvertarlutalo kiksarluta Nâlekab Zebaotib sânganê?

¹⁵ Mânalo piojorijut pilloringnerarpavut; ilâ, idluitulijut pilluangovut; ilâ, Gude ôktolukpât, ᴋanoetomullo tikitaungilat.

¹⁶ Tagva Nâlekamik sivôrajut oᴋaᴋatigêlerput: Nâlegarlo nâlakpoᴋ tusarlunelo, aglaillo erᴋaumajutiksat aglaktauvut tâpsoma sângane, Nâlekamik sivôrajut pivlugit, attinganiglo erᴋaijut pivlugit.

¹⁷ Perᴋutigijomârpakkalo, oᴋarpoᴋ Nâlegaᴋ Zebaot, uvloᴋ adseungitoᴋ perᴋutiksaliorviga neliutikpat; nikagijomârpakkalo, sôrlo angutib ernine kivgartortine nikagingmago.

¹⁸ Uteromârpose tagva ulernairtuiluselo idluartullo idluitullo adsigêngininginik, Gudemiglo kivgartortut, tâpsomingalo kivgartolungitut adsigêngininginik.