Lukase 9 - Labrador Inuttitut Heritage Bible

Aposteliminik Kristûsib tiliklerninganik. Herôdesib issumanginik Jêsuse pivlugo. 5,000 it nerrititauninginik. Ilinniartut kigligiutjininginik Kristûse pivlugo. Jêsusib nalautaininganik âniaminik toᴋominiglo. Ananausititauninganik ᴋakᴋame. Aᴋêninganik Sâtanasilingmik. Ilinniartit anginersaujomautinginik. Zebedêusib ernîkita illungertorningangnik. Jêsusemik malingnerub ilingajuksauninganik ᴋanok.

¹ Ilinniartinele 12 it ᴋaiᴋolerpait, pitsartunermilo nâlegaunermiglo Sâtanasinut tamainut tunitjivigivait, ᴋanimasiniglo âᴋêjungnarᴋovlugit.

² Oᴋâlajartorᴋovaillo Gûdib nâlegauvinganik, âᴋêᴋovlugillo ᴋanimajunik.

³ Oᴋautivaillo: Ingergarluse sumik neksartuksaungilase, ajaupiamiglônêt, ikpiârsungmiglônêt, ᴋakᴋôjaniglônêt, kênaujaniglônêt; maggûngniktauk annorâᴋartoᴋartuksaungilak.

⁴ Iglomut iterupse, tagvanêtitse aularᴋârase tagvangat.

⁵ Ilangitalo ilalioromangipase, anititse tagvangat iglugasaksoarnit, itikapselo saningit katerarsigik nalojungnairutiksanginut (erᴋartortaujutiksanginullo).

⁶ Aularput tagva, iglugasaktigut ingergarlutik oᴋautsiniglo tussarnertunik oᴋâlavut, ᴋanimajullo âᴋikpait ilûnâne.

⁷ Herôdesele, nunab illainangane ataniojok, Jêsusib piniarninginik tussaumalerpok, issumamigullo issumajâlerpok, ilangita Johannese toᴋungajunit makisimajoᴋ oᴋautigingmatsuk.

⁸ Ilangille oᴋarput: Elîase takotipok; ilangille: Nalautaijotoᴋavinît illangat makisimavok.

⁹ Herôdeselo oᴋarpok: Johannese niaᴋoêrtautilaukpara; taimnale kinauvâ, tussaumajara taimaitomîk? Taimâk pivlugo takojomadlarivâ.

¹⁰ Apostelillo utermigamik tâpsomunga oᴋautigivait tatamnartitatik. Ingminullo pitilugit aularpok inuᴋangitomut, iglugasait Betsaidamik atilit erᴋânut.

¹¹ Inuille tamattominga malugosukamik, malikpât; ᴋaiᴋolugillo oᴋautivait Gûdib nâlegauvianik, âᴋiktaujariaᴋartullo âᴋikpait. Uvluklilermalle,

¹² Tagva 12 it tikipât oᴋautivlugo: Inuit makkoa aularlit, niuvervingnut avaliptingnut iglugasangnullo, siniktarviksarsiorᴋovlugit nerᴋiksarsiniarlutiglo; tamâne unuᴋajuitomênapta.

¹³ Oᴋautivaille: Ilipse nerᴋiksamik tunitjivigisigik. Oᴋarput: Tallimainarnik ᴋakᴋôjaᴋarpogut, mingeriangniglo maggûngnik; inugasaksuit ukkua nerᴋiksanginik pisiniariartorlungikupta.

¹⁴ Inuit 5,000 eongmatta. Ilinniartiminullo oᴋarpok: Ingilit tunulerêktidlutik, ingmiᴋôrdlutik 50 it, amatauk 50 it.

¹⁵ Taimailiorput tagva ilûnatiglo ikterput.

¹⁶ Tagva taipkoa ᴋakᴋôjat tallimat, mingeriâglo tiguvait, ᴋilangmullo ârlorpok, ᴋujalivlunelo avgorpait ilinniartiminut tunivlugit, manijerᴋovlugit inungnut.

¹⁷ Ilûnatiglo nerrivut, kâgungnairlutiglo, amiakullo katersorpait, amârgaujat 7 it tattalugit.

¹⁸ Kissîmeolerdlune tuksiarame, ilinniartingitalo kissimik najormatsuk; aperivait oᴋarlune: Inuit kinaunasugivângâ?

¹⁹ Kiovât oᴋarlutik: Ilangita Johanneseonasugivâtit baptiterijok; ilangitale Eliaseonasugivâtit; ilangitatauk nelautaijut inutoᴋavinît illangat makkisimanasugivât.

²⁰ Oᴋautivaille: Ilipsele kinaunasugivisingâ? Tagva Pêtrusib kiovâ, oᴋarlune: Gûdib Kristûsegivâtit.

²¹ Inerterpaille perᴋojivlunelo, oᴋautjerᴋonagit kimik tamattominga.

²² Oᴋarporlo: Inûb Erninga âniatitaujariaᴋarpok sulle unuktunik, angajoᴋânullo ajoᴋertuijoksoarnullo aglangniglo ilisimajunut ajaktortaujariaᴋarpok, toᴋotauvlunelo, uvlullo pingajuangne makitsomârivok.

²³ Ilûnaitale oᴋautivait: Uvamnik maligomajoᴋarpat, issumaminik inôjomaniarane, saningajoliksaminiglo uvlut tamaita nangmarle, maliklungalo.

²⁴ Inôserminik ivlersijomajub, assiojijomârpâ, inôserminigle assiojijub pivlunga, piulijomârpâ.

²⁵ Inûblo suksarivaûk, silaksoak ilûnât piksarsiarigalloaruniuk, ingminiglo assiogune, ingminiglônêt asserorunê?

²⁶ Uvamnigle oᴋausimniglo kangusuktok, tâmna Inûb Erningatatauk kangugijomârpâ, tikikune ânanaunermine, Atâtamelo Engelillo ajungitut (ânanauningine).

²⁷ Âhamarik, oᴋautivapsele: Nangertut ovane ilangita toᴋo ôngniangilât, Gûdib nâlegauvianik takoᴋaratik.

²⁸ Tamattoma oᴋâlanerme kingorngagut, uvlut sitamaujortolermatta, Pêtruse Johanneselo Jakôbuselo ingminut pitilugit, ᴋakᴋamut tuksiariartorpok.

²⁹ Tuksiartilugolo kênangata tautua ablatsaulerpok, annorângalo ᴋaᴋorsidlarlune ᴋeblariktoᴋsôlerpok.

³⁰ Ahâglo, angutik maggûk oᴋaᴋatigivâk, tâpkua Môsese Elîaselo.

³¹ Ananâvaksôvlutik sakᴋertuk, oᴋâlalutiglo naggaserninganik nâmaksitiksanganik Jerusaleme.

³² Pêtrusele illagijâgiglo uerngarnermut sinilerput. Tuppakamigle, ᴋaumaninga takovât, angutiglo tâpkoa maggûk sanianêtuk.

³³ Tâpkoalo ᴋemangmakko, Pêtruse Jêsusemut oᴋarpok: Ajoᴋertuijok, tamanêtsainarominarpok; pingasunik igloliorta, ilingnut atautsemik, Môsesemullo atautsemik, Elîasemullo atautsemik. Oᴋautsinele ᴋaujimangilait.

³⁴ Taimâk oᴋartilugo, nuvujak ᴋaivok, uliklugillo; ᴋoaᴋsârpullo, nuvujab ulingmagit.

³⁵ Nippelo nuvujamit pivok, oᴋarlune: Tagga Ernera nagliktara, tâmna nâleksiuk.

³⁶ Nippelo tussaramitsuk, Jêsuse kissiat takovât. Angigutjilerpullo, oᴋaratik takojamingnik uvlune taipkonane.

³⁷ Uvlub aipangane, ᴋakᴋamit atersârmatta, inugasaksuit pagrearpait.

³⁸ Ahâglo, angut inuit akornganit niplialerpok oᴋarlune: Ajoᴋertuijok ᴋenuvigivagit, ernera takunâlauruk, ernetuarigapko.

³⁹ Ahâk, anernerub (ajortub) tigulerangago, tuavidlune niplialerpok, aulajârtidlalerangago ᴋapoalidlarpakpok; aulajârtidlalauramiuglo, kêta ᴋemalerpakpâ.

⁴⁰ Ilinniartitillo ᴋenuvigilaukpakka, anititauᴋovlugo, ajorpâlle.

⁴¹ Tagva Jêsusib kiovâ oᴋarlune: Tata! Ukkua okpingitut mumiksimajullo kinguvângoᴋatigêt, ᴋanok sivitutigijomik najoriaᴋarpapsê, ᴋenuêvigijariaᴋarluselô? Ernît ᴋailauruk.

⁴² Tikilermagolo, Sâtanasib aulajârtidlarlugo aksorotidlarpâ. Jêsusible anernek ivsornartok inerterpâ; soruserlo pijungnaitinamiuk, atâtanganut tunivâ.

⁴³ Ilûnatiglo Gûdib pitsartudlarninga kakilârutigivât. Ilûnatigle tataminiarmatta ilûnainik piniarninginik, ilinniartiminut oᴋarpok:

⁴⁴ Oᴋautsit ukkua siutipsingnut tussarsigik, Inûb Erninga pititaujariaᴋarmat inuit agganginut.

⁴⁵ Oᴋautsille ukkua nalojungnaingilait, nalovlugillo tukkisingilait, apersorlugolo ileragivât oᴋautsinik tamakkoninga.

⁴⁶ Issumalerpullo nalitik anginerongmangât.

⁴⁷ Jêsusible ômatingita issumangit ᴋaujileramigit, nutakᴋamik tigusivok, nangertilugolo saniminut.

⁴⁸ Oᴋautivlugit: Ominga nutakᴋamik illaliortub atimne, ilaliorivânga; uvamniglo ilaliortub, ilaliorivâ uvamnik tiliklertok. Ilipsingnele ilûnapsingne mingnerojok angijôjomârpok.

⁴⁹ Tagva Johannesib kiovâ oᴋarlunelo: Ajoᴋertuijok, angutemik takolaukpogut, atterne Sâtanasinik anititsijomik; inerterpavulle, illagiluta malingimatit.

⁵⁰ Jêsusiblo oᴋautivâ: Inerterasiuk; uvaptingnik akkerartungitub illagingmatigut.

⁵¹ ᴋongmuartitauviksangale neliutilermat, kajusimalerpok Jerusalemut aijomavlune.

⁵² Sivorliksanelo tilivait. Tâpkoa Samâriamiut iglugasanginut siniktarviksarsioriarpât.

⁵³ Taipkoale siniktarᴋojomangilât, Jerusalemut ingergalermat.

⁵⁴ Ilinniartîkitale Jakôbusib Johannesiblo tamanna tussaramikko, oᴋarpuk: Nâlegak, pijomaguvit, oᴋaromavoguk sorlo Eliase, ikomamik ᴋilangmit kataktoᴋarᴋovlugo, nungutauᴋovlugit.

⁵⁵ Jêsusible ᴋeviardlugik inerterpak, oᴋarlune: Anernerub ᴋanoetûb ᴋitorngaringmatik, ᴋaujimangilatîk?

⁵⁶ Inûb Erninga tikisimangilak inuit tarningit asseroromavlugit, piulijomavlugille.

⁵⁷ Iglugasaille assinginut aivut. Ingergavlutik ilangata oᴋautivâ: Maligomavagit aiviksarnut.

⁵⁸ Jêsusiblo oᴋautivâ: Terrianiat sitteᴋarput, tingmitjallo ᴋilaub atânêtut ubloᴋarivut; Inûble Erninga peᴋangilarlônêt niaᴋorme inangaviksanganik.

⁵⁹ Assianullo oᴋarpok: Malinga. Tâpsomale kiovâ: Nâlegak, aiᴋâlaulanga, atâtaga iluveriartorlugo.

⁶⁰ Jêsusible oᴋautivâ: Toᴋungajut toᴋojiatik iluveriartorlitigik: igville Gûdib nâlegauvinganik oᴋariartorit.

⁶¹ Assiatauk oᴋarivok: Nâlegak maligomavagit; sivorlermigle perᴋunga, iglomioᴋatikka sorairutiksamik oᴋautijartorlugit.

⁶² Jêsusible oᴋautivâ: Aggangminut tigusijok sanajaksaminik, ᴋeviarlunelo, tâmna idluangilak Gûdib nâlegauvinganut.