Lukase 8 - Labrador Inuttitut Heritage Bible

Arnanik, Jêsusemik maliktunik. Adsiujomik karngasuijomik. Jêsusib anânangata ᴋatangutingitalo kinauninginik. Imab ikubliartitauninganik. Jêsusib âᴋêninganik Sâtanaselingmik, arnamiglo auᴋatsainartomik. Jaîrusib paningata ômartitauninganik.

¹ Mattoma kingorngagut arvertarpok iglugasaksoatigut iglugasaktigullo, oᴋautsit tussarnertut Gûdib nâlegauvinganik oᴋautigivlugit, ipkoalo 12 it illagivât.

² Arnallo ilangit illaugivut, pijungnaititangit anerniâlungnit ᴋanimasinillo, tagva Marîa, Magdalênamik taijak, Sâtanasêrutijaujok 7 nik;

³ Johannalo, Kusab, Herôdesib pimaklertingata, nulianga: Susannalo, assingillo unuktut; taipkoa perᴋutimingnit tunijivut tâpsomunga.

⁴ Inugasaksuille katilermatta, iglugasaksoarnillo tamainit katsungaitomik nelipsarmatsuk, adsiujutigut oᴋautjilerpok:

⁵ Karngasoijok karngasoijartorpok karngasûtiminik; karngasoitilugolo, ilangit apᴋosinermut katakput, tullerajartauvlutiglo, tingmitjallo ᴋilaub atânêtut pukumalukpait.

⁶ Ilangillo ᴋairtomut (ivjokitomut) katakput; nuileramiglo ᴋunorlersârput, ipteᴋanginamik.

⁷ Ilangillo katakput ukpigait kakilautilit akornganut; ukpigaillo kakilautilit peroramik, toᴋopait.

⁸ Ilangillo katakput nunamut ivjoriktomut, nuilerutiglo perorlarmiglo karngasutiksaᴋalerput sulugainermingne 100 nik. Taimâk oᴋarame, niplialerpok: Tussâjungnik siutilik tussarle!

⁹ Ilinniartingitale aperivât oᴋarlutik: Adsiujok una ᴋanok tukkilîk?

¹⁰ Kiovaille: Ilipse Gûdib nâlegauviata nelonarninganik ᴋaujititaugalloarpose; assisele oᴋautjauvut adsiujutigut, takogalloardlutik takoᴋonagit, tussaralloardlutiglo tussarᴋonagit.

¹¹ Tamannale adsiujub tukkinga: Karngasûtiksat tagva Gûdib oᴋausingit.

¹² Apᴋosiniub sanianêtut, tâpkoangovut, tussartut tamakkoninga; kingorngagut Sâtanasib tâva oᴋautsit pêjariartorpait ômatinginit, okperᴋonagit piulijauᴋonagillo.

¹³ Kairtomêtulle, tâpkoangovut, tamakkoninga tussarunik, ᴋuviasuklutik ilaliortut; tâpkoale amâᴋangilat; anikitomik okperput, kappianartoᴋalerangalle, katakput.

¹⁴ Ukpigaille kakilautilit akornganut kataktut, tâpkoangovut, tamakkoninga tussartut, inôtsible siaklernarningane, akluitsomaninganelo, ikliguninginelo pijut, ipidlarpullo, sulugaineᴋtâratiglo sanaugaksatalingnik.

¹⁵ Ivjoriktomulle pijut, tâpkoangovut, oᴋautsinik tussartut, torᴋorlugillo ômamingne idluartome, sulugaineᴋtârlutiglo sanaugaksatalingnik ᴋenuêdlutik.

¹⁶ Ikitsijoᴋangilak nennergoamik, ᴋattaujab iksivautablônêt atânut ilivlugo; nennergoable ininganut ilivâ, itertunut takojauᴋovlugo nennergoak.

¹⁷ Sagvangitoᴋangilak sakᴋertitauniangitomik, angigutjuteᴋangilarlo ᴋaujijauniangitomik.

¹⁸ Tamanna pivlugo tussartase tussâtsiarsigik. Peᴋartok tunitjivioniarpok; peᴋangitorle aᴋsârtauniarpok piginasugijanganik.

¹⁹ Anânangale ᴋatangutingillo tagvunga aivut, tikitsungnangilâlle inuit pivlugit.

²⁰ Ilangitalo oᴋautivât: Anânavît ᴋatangutivîllo silatânêtut takojomavâtit.

²¹ Kiovlunele oᴋautivait: Anânaga ᴋatangutikka tâpkoangovut, Gûdib oᴋausinginik tussartut maliklugillo.

²² Uvlullo illangane, ilinniartine illagilugit umiamut ikigame, oᴋautivait: Tesseᴋsûb akianut ikârta! Aulalerput tagva.

²³ Umiaᴋtoleramiglo, (Jêsuse) sinilerpok. Ulajutjeradlalerporle tesseᴋsoarme, mallillo umiak itibjuavlugo pivât, nangiadlarpullo.

²⁴ Tagva ᴋanilerpât, tupârdlugolo oᴋautivât: Ajoᴋertuijok, ajoᴋertuijok, sutairpogut! Tagva makipok, anorelo imablo malidlarningit inerterpait; sorairpullo, ikublialilarmelo.

²⁵ Oᴋautivaille: Okpernise naûk? Tâpkoale erᴋsidlarput, tataminiarlarmiglo ingmingnut oᴋarput: Kina unâ? Inertermagik, anorib imablo nâlekpâk.

²⁶ Umiakullo ingergavut Gadarênerit nunanganut pilutik, Galilêab akianêtomut.

²⁷ Niungmallo nunamut, angut pâksivok Jêsusemik, iglugasaksoarnit pijok, sâtanasinik ilumiktoᴋ itsanit; tâmna annorânik atungilak, iglomelo ᴋikajuipok, iluvine kissiane.

²⁸ Jêsusele takogamiuk, nipliadlarpok, pâmaktervigivlugolo nipperᴋortovlune oᴋarpok: Suniarpagît, Jêsuse, Gûdib ᴋotsingnerojub Erningâ? Tuksiarpagit, kappiasuktiniarnanga!

²⁹ Anernek maᴋojungnartok anerᴋungmago inungmit tâpsomangat; akunêrtoksoarmik kappiasuktilaungmago. ᴋelaksortaulaukporlo ᴋelaumgujanut, parngnanairsûtinullo; ᴋelaksûtille kiktorâvait, Sâtanasiblo aularutivâ inuᴋangitomut.

³⁰ Jêsusiblo aperivâ, oᴋarlune: Kinauvêt? Kiovok: Legiônemik ateᴋarpunga. Sâtanasit unuktut pulamavigilaungmatsuk.

³¹ Tuksiarvigivâllo, itijomut aulartitaujomanatik.

³² Tagvanele kuingêngigasaksoaᴋarpok nerrijunik ᴋakᴋame. Tuksiarvigivâllo, tâpkonunga pularᴋojaujomavlutik. Perᴋovaillo.

³³ Sâtanasit tâva anivut inungmit tâpsomangat, kuingênginullo pulavut, kuingêngigasaksuillo pangaliklutik ingmingnik ijukkâdlarput imânut, ipivlutiglo.

³⁴ Mianersijulle tamanna takogamitsuk, ᴋemâvut, iglogasaksoarmiunullo iglogasangmiunullo tamanna oᴋautigijartorpât.

³⁵ Tagva takojartoramitsuk tamanna, Jêsuse tikipât, inuglo sâtanasêrutjaujok naipipât, annorâlijalertok silatovlune iksivajok Jêsusib itigangita sângane; erᴋsivlutiglo.

³⁶ Tamakkoningalo takolauktut oᴋautivait sâtanaseᴋalauktub pijungnaititauninganik.

³⁷ Inugasaksuillo Gadarênerit ilûnamatsiatik tamattomalo erᴋânêtut tuksiarpât, ᴋemaktigijomavlugo, erᴋsidlaramik. Umiamullo ikivok utermilunelo.

³⁸ Angutible sâtanasêrutjaujok tuksiarvigivâ, najoromavlugo. Jêsusible aularᴋovâ oᴋarlune:

³⁹ Iglungnut angergarit, pitsiarvionîlle Gûdemut oᴋautigileruk. Aularporlo, iglugasaksoarmiunullo tamainut oᴋâlalerpok pitsiarvionerminik angijomik Jêsusemut.

⁴⁰ Jêsuselo utermat, inuit illaliorpât, ilûnatik utaᴋigamitsuk.

⁴¹ Ahâglo, katimaviub angajoᴋângita ilangat Jaîrusemik atilik tikipok, pâmakterlunelo Jêsusib itiganginut; tuksiarvigivlugolo iglominut iterᴋovâ.

⁴² Panetuaᴋarame, jârelingmik 12 nik, tâmna Toᴋokasâkpok. Tagvungalo (Jêsuse) aitilugo, inugasaksuit igvikliortipât.

⁴³ Arnarlo, jârinik 12 nik auᴋatsainarpok; tâpsoma perᴋutine tamaita nungulaukpait âniasiortinut, pijungnaititaujungnangilarlo kimullônêt.

⁴⁴ Tagva Jêsuse annorângata sinâgut aktoriartorpâ tunuanit; tagvainarlo aunga kigikpok.

⁴⁵ Jêsuselo oᴋarpok: Kia aktorpângâ? Ilûnatigle misiarmatta, Pêtruse najortingillo oᴋarput: Ajoᴋertuijok, inuit tatidlalarpillo igvikliortipâtit; oᴋarpotillo: Kia aktorpângâ?

⁴⁶ Jêsusele oᴋarpok: Aktortauvunga; misigigapkok pitsartunek uvamnit anisimangmat.

⁴⁷ Tagva arnab tamanna angigutjutigijungnanginamiuk, sajuklune pâmaktervigijartorpâ, inuillo ilûnatik tussartilugit unipkârpok suna pivlugo aktulauramiuk pijungnaisârnerminiglo.

⁴⁸ Jêsusible oᴋautivâ: Paniga, manigolerit, okpernivît pijungnaitipâtit; ulapirsauteᴋarlutit aularit.

⁴⁹ Sulle taimâk oᴋartilugo, katimaviub angajoᴋângata kivgangita illangat tikipok oᴋautilâllo: Panît toᴋovok; ajoᴋertuijok pagvisârniarnago.

⁵⁰ Jêsusible tamanna tussaramiuk, kiovâ oᴋautivlugolo: Erᴋsiniarnak; okpituinarit, ᴋanoetsungnailârpok tagva.

⁵¹ Iglunganulle iterame, assingit iterᴋongilait, Pêtruse, Jakôbuselo, Johanneselo, niviarsiablo atâtanga kissêta iterᴋovait.

⁵² Ilûnatigle ᴋeavut, ogguarivlugo. Jêsusele oᴋarpok: ᴋeanase; toᴋungilak, sinikporle.

⁵³ Ijoridlarpâllo toᴋojomik nalungikalloaramik.

⁵⁴ Tamaitale anitipait, aggangitigullo tiguvâ, nipliavlunelo oᴋarpok: Niviarsiak makitit!

⁵⁵ Anerningatalo utervigivâ, makisârporlo. Nerrititauᴋovâlo.

⁵⁶ Angajoᴋâgiglo tataminiadlarpuk. Inerterpaille, oᴋâlaᴋonagit inungnut tamattominga.