Lukase 6 - Labrador Inuttitut Heritage Bible

Ilinniartit nerᴋiksarsiorninginik Sabbateme. Jêsusib âᴋêninganik agganik toᴋungajunik Sabbateme. Apostelit 12 it ᴋaiᴋojauninginik. Jêsusib oᴋâlaninganik natername.

¹ Taipsomane Jêsusib perortut sanaugaksat apᴋotigingmagit sabbateme sivorliub tugliane, ilinniartingita sulugainingit nutsulerpait, aggangmingnullo aksaliklugit nerrivait.

² Farisêerille ilangata oᴋautivait: Sôk piniarpise Sabbateme pijaksaungitomîk?

³ Jêsusiblo kiovait oᴋautivlugit: Atuarsilaungilasê Dâvidib iliorninganik, kâlerame, illagijangillô?

⁴ Gûdib iglunganut iterame; ᴋakᴋôjat takojaksat tiguvait, nerrilarmelo, ilaminullo tunijivlune; tamakkoa nerrilugit ajoᴋertuijut kissimik perᴋojaugalloarmatta.

⁵ Oᴋautivaillo: Inûb Erninga sabbatemuttauk nâlegauvok.

⁶ Sabbatemele assiane katimavingmut itermat, ajoᴋertuiniardlune, inuᴋarpok tagvane aggalingmik talerpinginik toᴋungajunik.

⁷ Aglangnigle ilisimajut Farisêerillo nautsertorpât, sabbateme âᴋingniarmangâgo, pasitiksaᴋaromavlutik tâpsomunga.

⁸ Issumangille ᴋaujimagamigit, inungmut toᴋungajunik aggalingmut oᴋarpok: Nikovidlutit tamaunga pît. Taimnalo nikovidlune tagvunga pivok.

⁹ Tagva Jêsusib oᴋautivait: Aperivapse, sabbateme sumik sulijuksauvitâ, ajungitomiglônêt ajortumiglônêt; inuk piulivlugolônêt asserorlugolônêt?

¹⁰ Avatiminêtullo tamaita takosarpait, inuglo tâmna oᴋautivâ: Aggaktit issakit. Taimailiorporlo. Tagva aggangit âᴋiktaulerput iglungititut ᴋanoêtsungnairlutik.

¹¹ Tâpkoale ᴋevidlutik issumalulerput; oᴋaᴋatigêlerlutiglo, ᴋanok (Jêsuse) piniaromavlugo.

¹² Uvlunelo taipkonane ᴋakᴋamut majorarame tuksiariartordlune, unnuak nâvâ Gûdemut tuksiarlune.

¹³ ᴋaulermallo ilinniartine ᴋaiᴋovait, tâpkonangallo 12 it anerivait, tâpkoa tailerdlugittauk Apostelinik:

¹⁴ Tamadsa (atingit:) Simon, Pêtrusemik taijanga, nukâlo Andrêase; Jakôbuselo Johanneselo; Filippuselo Bartolomêuselo;

¹⁵ Mattêuselo, Tômaselo, Jakôbuselo, Alfêusib erninga, Simonelo Zelôtesemik taigusilik;

¹⁶ Jûdaselo, Jakôbusib nukâ, Jûdaselo Iskâriot, pititsijok (Jêsusemik).

¹⁷ Taipkoa illagivlugit atersâlerpok, naternamut pivlune. Ilinniartigasaillo inugasaksuillo Judêamit illûnânit, Jerûsalemillo, Tirusiblo, Sidoniblo imab sanianêtuk erᴋângnit,

¹⁸ Tagvane katimajut tussaromavlugo, âᴋiktaujomavlutiglo tâpsomunga ᴋanimasermingnit, anernernullo maᴋojungnartunut kappiasuktitaujut, pijungnaititauvut.

¹⁹ Inuillo ilûnatik aktorasuarpât; pitsartunek tâpsomangat aningmat, tamaitalo pijungnaitipait.

²⁰ Ilinniartinelo ijîngminut takunârpait, oᴋarlunelo: Piloridlarpose aklujose, Gûdib nâlegauvia pigilerapsiuk.

²¹ Piloridlarpose ovane ᴋâktose (Gûdib idluarninganik); ilumertaujomârapse. Piloridlarpose ovane ᴋugviortose, ijoromârapse.

²² Piloridlarpose, inuit ômigikpase, avidluselo, suangadlarpaselo, atiselo tainerlukpatigik idluitônerarluse, Inûb Erninga pivlugo.

²³ ᴋuviasugitse ᴋigertarluselo; akkiksase angidlaromârmat ᴋilangme. Sivorlingitatauk taimailiorivait nelautaijut.

²⁴ Kiglormut, kappianamêk akluitose; manigortiksaᴋarungnairapse.

²⁵ Kappianamêk peᴋaluartose, kâgomârapse. Kappianamêk ilipse, ovane ijudlartose; ᴋeadlarluse ogguadlaromârapse.

²⁶ Kappianamêk ilipse, inuit ilûnatik ânanâmik oᴋautigikpase. Sivorlingitatauk taimailiorivait nalautainerluktut.

²⁷ Uvangale oᴋautivapse, nâlektose: Akkerartortise nagligisigik; ômigijise ajungituliviginiarsigik;

²⁸ Ilipsingnut oᴋauserluktut saimartisigik; ilipsingnik kiksartitsijut tuksiarutisigik.

²⁹ Uluakut erᴋsârtauguvit, igluatauk manileruk, uliksoarniglo aᴋsârtauguvit, ulîttauk pigiliuk!

³⁰ Ilingnit sumik tuksiartok, tunitsivigiuk; perᴋutingniglo aᴋsârtauguvit, uterᴋojaksaringilat.

³¹ Sorlo ilipse piniarviojomagapse unungnut, taimâktauk piniarvigisigik.

³² Nagligijise nagligijatuarigupsigik, ᴋanok ᴋujagijaunagarpisê? Idluituttauk nagligijitik nagligivait.

³³ Pitsiartipsingnullo pitsiaᴋattarupse, ᴋanok ᴋujagijaunajarpisê? Idluituttauk taimailiutsainarivut.

³⁴ Ilipsingnut utertitsilârniartut attarsiakitatuarigupsigik, ᴋanok ᴋujagijaunajarᴋisê? Idluituttauk attartortitsingmatta idluitunut, taimaikuarênik utertitsiviojomavlutik.

³⁵ Tamanna pivlugo ômigijise naglingniarsigik; pitsiarluselo attarsiaᴋisititse, sumik nerriugutiginago; akkiksase angidlaromârpok tagva, ᴋotsingnerublo ᴋitorngarijomârpâse. Tâpsoma avagingmagit ᴋujalingitut kasêtullo.

³⁶ Tamanna pivlugo nâpkinigitse, sôrlo Atâtase nâpkiniktôngmat.

³⁷ Pasiklerniarase, tagva pasijaunianginivose. Erᴋartuiniarase, tagva erᴋartortaunianginivose. Issumaᴋarveᴋarungnairitse, tagva issumaᴋarviojungnairivose.

³⁸ Tunijititse, tagva tunitjiviojomârivose. Oktûmik tattatomik, nimnitersimajomik, amigangitomik, ulipkitârtomik kinermiligomârpâse. Oktûtipsingnut ôktortaujomârivose.

³⁹ Adsiujuniglo oᴋautivait: Tautungitub tautungitok apᴋotâgut tessiorungnarpaûk? Tamarmik itersamut katangniangilâk?

⁴⁰ Ilinniartok ajoᴋertortiminit anginersaungilak; ajoᴋertortimitut-ikune, tâgva nâmaksivok.

⁴¹ ᴋatangutivît ijingata sukkiutâ sôk takoviûk, ikâk ijingnêtok maluginagô?

⁴² ᴋanorlo ᴋatangutingnut oᴋarungnarᴋêt: Ovatsiaro, ᴋatangutiga, sukkiut ijingnit pêromavara; igvillo nangminek ikâk ijingnêtok malugingipiûk? Takkormôrtotit, ikâk ijingnit pêrᴋâruk; kingorngagut ᴋatangutivît sukkiutâ pêrasuaruk!

⁴³ Ajungitomik napârtokangimat, piungitunik paungaᴋartomik; piungitomiglo napârtoᴋanginivok, ajungitunik paungaᴋartomik.

⁴⁴ Napârtut ilûnatik nalonangilat paungamingnit. Paungatannait pêjarniangilait kakilanartunit, paungallônêt katersornianginivait ukpiganit kakilautilingnit.

⁴⁵ Inuk ajungitok ajungitunik sakᴋertitsivok ômatime tattatjutinginit ajungitunit; inuglo piungitoᴋ piungitunik sakᴋertitsivok ômatime tattatjutinginit piungitunit. Omatib tattatjutinginik ᴋanek oᴋajôngovok.

⁴⁶ Sôk Nâlekamik, Nâlekamik taivisingâ, nâlengnagillo oᴋausikkâ?

⁴⁷ Uvamnut pijub oᴋausikkalo tussarlugit nâleklugillo, tâpsoma adsigijanganik ᴋaujititsomavapse.

⁴⁸ Adsigivâ inuk igloliortok; tâpsoma nuna itersaliorlugo illutujomik tungavilerpâ ᴋairtomut. Imerle kutjermat, kôb iglo supivigivâ, aulatjarungnarnagolo, ᴋairtomut tungalermat.

⁴⁹ Tussartuble malingitublo adsigivâ inuk igloliortok, nunamut tungaviktârnago; kôblo akkingmivigidlarmago, iglo tuavidlune ochovok angijomik asserortauvlune.