Lukase 5 - Labrador Inuttitut Heritage Bible

Tatamnartomik mingeritjanik nuluarniartunik. Kalaᴋartok tumângajorlo âᴋiktaulerpuk. Lêvi ᴋaiᴋojauvok. Ilinniartit nerritailininginik.

¹ Inugasaksuille igvikliortingmatsuk, Gûdib oᴋausingit tussaromavlugit Genêzaretib tesseksoangata saniane nangerpok.

² Umiaglo maggûk tesseᴋsûb kiglinganêtuk takovak, mingeriarniartullo niumavut, nulutjatik ergortorlugit.

³ Umiab aipanganut, Simonib pinganut ikivok, ᴋenuvigivâlo, imarbikparialaᴋovlugo. Ingidlunelo, inuit ajoᴋertorpait umiamit.

⁴ Oᴋâlajungnairamelo, Simonemut oᴋarpok: Imarbikpalerit itijomut, nuluaselo ningitisigik, mingeriarᴋovluse.

⁵ Simonib kiovâ oᴋautivlugo: Ajoᴋertuijok, unnuak nâvlugo pinasualaukpogut angênarlutalo; oᴋautsille nâleklugo nulutjat ningititsomavakka.

⁶ Taimailioramik, mingeriavaksuit pivait, nuluangillo alikput.

⁷ Umiamiullo aipaitik nulorarpait, amuarᴋatiᴋumavlugit. ᴋaivullo, umiatiglo ussilertorpakit puklivlugik.

⁸ Sîmonib Pêtrusib tamanna takogamiuk, Jêsusib itiganginut pâmakterpok, oᴋarlune: Nâlegak, ᴋemanga ajortoliksôvlunga.

⁹ ᴋoaksârame, illagijangillo ilûnatik mingeritjat amuartatik pivlugit.

¹⁰ Taimâktauk Jakôbuse Johanneselo, Zebedêusib ernîgik, Simônib pinasuarᴋatîgik (ᴋoaksângavuk.) Jêsuselo Simonemut oᴋarpok: Erᴋsinak, mattoma kingorngane inungnik pinasuarniarpotit.

¹¹ Umiatiglo sidjamut pitipakit, perᴋutitiglo tamaita ᴋemakpait maliklugolo.

¹² Iglugasaksoatalit illanganêtilugolo, ahâk, tagvane anguteᴋarpok kalaliksoarmik. Tâpsoma Jêsuse takogamiuk, pâmaktervigivlugo tuksiarvigivâ, oᴋarlune: Nâlegak pijomaguvit, kalagungnaititsungnaralloarparma.

¹³ Agganelo issakpait, aktorlâllo, oᴋarlune: Pijomavunga, kalagungnairit. Tagvainarlo kalagungnaisârpok tagva.

¹⁴ Inerterpâlo oᴋautivlugolo: Assingnut sumik oᴋarniarnak; ajoᴋertuijomulle ainiarit, takotilutillo taipsomunga, tunergutiksarlo Môsesib tunerᴋojanga tunilugo, kalagungnainernik nelojungnairᴋovlugit.

¹⁵ Anginersamigle tussaumajaulerpok; inugasaksuillo tussaromavlugo tikipât, âᴋiktaujomavlutiglo ᴋanimasermingnit tâpsomunga.

¹⁶ (Jêsusele) ᴋemaklugit inuᴋangitomut aivok tuksiarlunelo.

¹⁷ Uvlut taipkoa ilangane, ajoᴋertuilermat, Farisêerit aglangniglo ilisimajut iglugasangnit tamainit Galilêamêtunit, Jûdêamêtunillo, Jerusalemillo pijut, tagvane iksivavut. Nâlekablo pitsartuninga tâpsomangat anivok, tamaita âᴋiklugit.

¹⁸ Ahâglo, angutit ilangit âtsivut angumik tumângajomik aumitimine nalajomik akigardlugo; tâmnalo itertinasuarpât, sânganut ilijomavlugo.

¹⁹ Iterviksarsinginamitsuglo inungnut, iglub ᴋângat majoarput, angmajoᴋullo ningitipât innangavialo, inuit akornganut, Jêsusib sânganut.

²⁰ Jêsusible okperningat takogamiuk, tumângajok oᴋautivâ: Inuk, ajornitit issumagijaujungnairput.

²¹ Aglangniglo ilisimajut Farisêerillo issumalerput oᴋarlutik: Kina una, oᴋauseᴋarmat akkerartortunik Gûdemût? Kia, Gûdib assiata, ajornerit issumagijungnairungnarᴋagît?

²² Jêsusible issumangit malugigamigit, aperivait: ᴋanok ômatipsingne issumaᴋarᴋisê?

²³ Naliak ajornanginersauvâ, oᴋarlune: Ajornitit issumagijaujungnairpût? Oᴋarlunelônêt: Makitit arvertarlutillô?

²⁴ Nalojungnairᴋovlusele, Inûb Erninga pitsartuneᴋarmat nuname ajortoêrutjinermik, tumângajomut oᴋarpok: Oᴋaupagit, makitit, aumititit pikit angergarlutillo.

²⁵ Takoanelo makisârpok, aumitinelo nalavigilauktane tiguvlugit, iglominut angergarpok, Gûdelo nakoridlarpâ.

²⁶ Ilûnnatiglo tataminiarput, Gudelo nakoridlarpât, erᴋsidlalarmiglo oᴋarput: Uvlome tatamnartunik takolaukpogut.

²⁷ Mattoma kingorngagut anigame, pimaklerte Lêvimik atilik takovâ, tuniorᴋaivingme iksivajok; tâmna oᴋautivâ: Malinga!

²⁸ Nikoviporlo, tamaitalo ᴋemaklugit malikpâ.

²⁹ Lêviblo iglomine nerᴋiksaliudlarpâ, pimaklertillo assingitalo unuktut iksivaᴋatigivât nerrimârvingme.

³⁰ Aglangniglo illisimajut Farisêerillo (Jêsusib ilinniartingit avamudlarvigilerpait,) oᴋautivlugit: Sôk pimaklertit idluitulijullo nerreᴋatigivisigîk imerᴋatigivlugillô?

³¹ Jêsusiblo kiovait, oᴋautivlugit: Atsuilît inûlijeᴋariaᴋangilat, ᴋanimajut kissimik.

³² Ajortulit ᴋaiᴋojartorpakka, ablatsâmik issumaᴋarᴋovlugit, idluartut pinagit.

³³ Oᴋautivâlle: Sôk Johannesib ilinniartingit nerritailivakkât tuksiarlarmiglo akulaitomik taimâktauk Farisêerit ilinniartingît? Ilinniartitille nerrivut imilarmiglo.

³⁴ Oᴋautivaille: Nulianiktomut tikitut nerritailitilugit ajorpase, uiksak taipkonunga illautilugo.

³⁵ Neliutsomârporle uiksamik aᴋsârtauvingat, tagva nerritailivangniarput.

³⁶ Adsiujuniglo oᴋautivait: Annorâtoᴋak illâkpangilât nutâmik illâksamik, nutâb aliktorniarmago nutaungitok, illâktârlo idluanginivok nutaungitomut.

³⁷ Vainelo nutâk imerᴋautinut nutaungitunut imertûtinginivât; vainib nutâb aliktorniarmagit imerᴋautit, vainelo kovituinarpok, imerᴋautillo asserorlugit.

³⁸ Vainele nutâk imerᴋautinut nutânut imertûtijaksauvok, tamarmik tâva asserorjuiᴋatigêkput.

³⁹ (Vainemik) nutaungitomik imilauktok ᴋilanângilak nutâmik, oᴋarame: Nutaungitok mamarnersauvok.