Lukase 4 - Labrador Inuttitut Heritage Bible

Kristûsib ôktortauninganik Sâtanasemut. Oᴋâlaninganik Nazareteme. Pijungaititsininganik Sâtanaselingmik Kapernaume, Pêtrusiblo sakkinganik, assinginiglo. Ingergarninganik Galilêame.

¹ Jêsusele Anernermik ajunginermik ilumilik, ama Jordanemit uterivok Anernerublo aitipâ inuᴋangitomut.

² Uvlullo 40 nâvlugit Sâtanasemut ôktortauvok. Uvlunelo tâpkonane nerringilak; tâpkoalo ᴋângermatta kâlerpok kingorngagut.

³ Sâtanasible oᴋautivâ: Gûdib Ernerikpatit, ujarak una oᴋautiuk ᴋakᴋôjangorᴋovlugo.

⁴ Jêsusible kiovâ, oᴋarlune: Aglaksimavok: ᴋakᴋôjatuinaᴋ inûb inôtigingilâ, Gûdible oᴋausingit tamaita (inôtigivait).

⁵ Sâtanasiblo aitipâ ᴋakᴋamut kingiktomut, silaksûblo ataniovingit tamaita tâpsomunga sikungilarnerme atautseme ᴋemergojautipait.

⁶ Oᴋautivlugolo: Makkoa ataniovît tamaita ânanauningillo ilingnut tunijomavakka; uvamnut tunijaungmatta, issumamniglo tunivakka pijomajamnut.

⁷ Mâna tuksiarvigijomagumga, tamaita piksariniarpatit.

⁸ Jêsusiblo kiovlune oᴋautivâ: Sâtanase, uvamnit aularit, aglaksimangmat: Gûdemik Nâlegarnik tuksiarveᴋartuksauvotit, kissiallo kivgartorlugo.

⁹ Jerusalemullo aularutivâ, âlâllo katimaviksûb nuvugusinganut, oᴋautivlugolo: Gûdib Ernerikpatit, katagit.

¹⁰ Aglaksimangmat: Pivlutit Engeline perᴋojomârpait, saputijauᴋovlutit.

¹¹ Erᴋisimiartauᴋovlutillo, itikatit aporᴋonagit ujarᴋamut.

¹² Jêsusib kiovâ oᴋarlunelo: Oᴋautigijaumavok: Gûdemik Nâlegarnik ôktortuksaungilatit.

¹³ Sâtanasiblo ôktorlungnine tamaita nâgamigit, ᴋemalerpâ utertormârniarmilune.

¹⁴ Jêsuselo Anernerub pitsartuninganut ama Galilêamut uterpok, tâpsomalo erᴋânêtut tussaumalerpât.

¹⁵ Katimavinginelo ajoᴋertuivok, nakorijauvlunelo ilûnainut.

¹⁶ Nazaretemullo pivok, inuguijauvingminut; ilutsimitullo sabbateongmat katimavingmut iterpok, nikoviporlo atuarsijomavlune.

¹⁷ Tagva tunitsiviolerpok nalautaijub Jesaiasib aglanginik. Makperamigillo, oᴋautsit ukkua nalaupait aglaksimajut:

¹⁸ Nâlekab Anerningata najorpânga, taimaimat mingoalaukpânga, tililarmalo oᴋautsinik tussarnertunik oᴋâlaᴋovlunga aklujunut, inûliklerᴋovângalo serᴋomisimajunik ômatilingnik, parngnanairsimavingmêtullo aniviksanginik ᴋaujitilugit, tautungitullo tautulerᴋovlugit, kappiasuktullo kappiasugungnairᴋovlugit ajorungnairᴋovlugillo,

¹⁹ Nâlekablo jâringanik tussarominartomik oᴋâlaᴋovlunga.

²⁰ Aglaillo patiktinamigit, kivgamullo tunigamigit, ingipok. Katimavingmêtullo ilûnatik takunârpât.

²¹ Oᴋarvigivaillo: Uvlome aglait ukkua nalautsilerput siutipsingnut.

²² Ilûnatiglo kigligiutjivut tâpsominga, oᴋausingillo tussarnertut ᴋaninganit anijut tataminiarivait, oᴋarlutiglo: Jôsefib tâmna erneringilaûk?

²³ Oᴋautivaillo: Oᴋausiovaktomik oᴋautiniaralloarpapsinga imaitomik: “Inûliklerte, ilingnik piulidlarit.” Angijunik Kapernaume tatamnartitarnik tussaumalaurapta, taimailiorit ovanetauk inugoijauvingne.

²⁴ Oᴋarporle: Âhamarik, oᴋautivapse: Nalautaijok ivlerijaungilak inugoijauvingmine.

²⁵ Nelâgulle oᴋautivapse: Israêlitine unuktunik uigarneᴋalaukpok Elîase inôtilugo, ᴋilak parngnanairsimatilugo jârinik pingasunik, takᴋiniglo pingasojortunik, kâᴋavaksoadlalaungmat nuname ilûnâne.

²⁶ Tâpkonangallo atausênarmut uigarnermut Sareptamiomut Sidonib nunanganêtomut Elîase tilijauvok.

²⁷ Unuktuniglo kalaᴋartokalaukpok Israêlitine taipsomane Elîase nelautaijok inôtilugo, Naêmanible Sîariamiub assianik kalagungnaititaujoᴋalaungilak.

²⁸ Katimavingmêtullo ilûnatik tamanna tussaramitsuk, ᴋaningaumajalerput.

²⁹ Nikovidlutiglo iglugasaksoarnit pingujarpât, ᴋakᴋablo iglugasaksoakarvingmik poktuninganut aularutivât, tagvangat ijukkartitsomavlugo.

³⁰ Akorngatigulle aularpok.

³¹ Kapernaumullo, iglogasaksoarnut Galilêamêtunut pivok; sabbateolerangallo ajoᴋertorpait.

³² Taipkoalo ajoᴋertûsingit tataminiarivait, kiblingnadlartomik oᴋarmat.

³³ Tagvanelo katimavingme inuᴋarpok, Sâtanasemik maᴋojungnartomik ilumiktomik; tâmna nipliadlarlune,

³⁴ Oᴋarpok: Adjai, suliniarpitâ ilingnut, Jêsuse Nazaremiôk? Asseroriartorpitigût? Kinaujotit ᴋaujimagapkit, Gûdib ivjornaitoᴋotigingmatit.

³⁵ Jêsusiblo inerterpâ oᴋarlune: Oᴋajuêrit, inungmit ômangat anît. Sâtanasiblo tagva ochotipâ akornganut, anilarmelo tâpsomangat, akᴋunarnagolo.

³⁶ Ilûnamatsiatiglo erᴋsilerput, oᴋaᴋatigêklutiglo, oᴋarpullo: Suna unâ? Anernerit maᴋojungnartut sôngodlarlune pitsartudlarlunelo perᴋungmagit, nâlekpât anilarmiglo.

³⁷ Nunablo tâpsoma erᴋânêtut ilûnatik piniarningit tussaumalerpait.

³⁸ Nikovidlunelo katimavingmit (anivok), Simoniblo iglunganut pivok. Simoniblo sakkia arnak ôlingnartoksoarmut ᴋanimavok, taimnalo pivlugo tuksiarvigivât.

³⁹ Kanilerpâlo, ôlingnartorlo inerterpâ; ᴋanimanartub tâva ᴋemakpâ. Tagvainarlo makipok kivgartorlugillo.

⁴⁰ Seᴋinerlo nipimalermat, ilûnatik ᴋanimajoᴋotilit âpait tâpsomunga sunatuinarnik ᴋanimasilit. Aggangminullo tamaita patingmivait, âᴋiklugillo.

⁴¹ Sâtanasitauk unuktunit anivut, nipliadlarlutiglo oᴋarput: Kristûseovotit, Gudib Erninga. Inerterlugillo oᴋarᴋongilait; Kristûseoninga nalungimatsuk.

⁴² ᴋaulermalle, aularpok inuᴋangitomut, inuillo ᴋenerpât, tikinamitsuglo nokᴋartipât ᴋemaktaujomanatik.

⁴³ Oᴋautivaille: Assingine iglugasaksoarne oᴋâlajuksaugivunga oᴋautsinik tussarnertunik Gûdib nâlegauvinganik; tamanna pivlugo tilijauvunga.

⁴⁴ Katimavingnelo Galilêamêtune ajoᴋertuivok.