Lukase 24 - Labrador Inuttitut Heritage Bible

Kristûsib makininganik. Sakᴋertininganik Emauseliartungnut, Jerusalemelo. ᴋilaliarninganik.

¹ Vogib uvlungita sivorlerpângane iluvermut pivut, mingoarutiksallo âᴋiksulauktatik neksarpait, assitiglo ilagivait.

² Ujaraksoarle aksakârtitavineᴋ iluvermit naipipât.

³ Iterpullo, Nâlekablo Jêsusib timinga neningilât.

⁴ Taimâk pivlugo siarklilermatta, ahâk angutik maggûk sanianut pivuk, ᴋeblertangnik ânnorâlîk.

⁵ Erksilerput tagva, kênangillo katalungavut. Tâpkoa oᴋautivait: Sôk ômartok ᴋenerpisiûk toᴋungajunê?

⁶ Tamânêngilak, makisimavok, Erᴋarsiuk, oᴋautilaungmase sulle Galilêamêdlune,

⁷ Oᴋarlunelo: Inûb Erninga inuit idluitulijut agganginut pititaujariaᴋarpok kikiaktortaulune, uvluglo pinajuangne makitsomârpok.

⁸ Oᴋausingillo tagva erᴋarpait.

⁹ Iluvermillo aularput, tamakkoninga tamainik 11 it assingillo oᴋautijartorlugit.

¹⁰ Mariale Magdalêna, Johannalo, Marialo Jâkobusib anânanga assingillo, tagva arnat tamattominga oᴋartut Apostelinut.

¹¹ Tâpkoale oᴋausingit unipkausetuinaunasugivait okperinagillo.

¹² Pêtrusele nikovidlune iluvermut aᴋpangerpok, iluanullo itsuarame, uvineruksajat kissêta takovait, aulardlunelo; tataminiarporlo, ᴋanok iliortoᴋalaungmat.

¹³ Ahâglo, ilâgik maggûk uvlorme tamattomane iglugasangnut aivuk, Emausemik atilingnut, Jerusalemit stundinik pingasunik (pisuklune)ᴋaningitigijunut.

¹⁴ Oᴋaᴋatigêkpuglo pijoᴋalauktut tamakkoa tamaita pitjutigilugit.

¹⁵ Taimâk oᴋartilugik, ingmingnut aperiᴋatautivlutik, Jêsusib anguvak ingergaᴋatigivlugiglo.

¹⁶ Ijîgigle tautungititauvuk, ilitarserᴋonagik tâpsominga.

¹⁷ Oᴋautivagle: ᴋanok oᴋâlavitîk iliptingnut ingergavlutik kiksalaptiglô?

¹⁸ Tagva aipangata kiova, Kleofasemik atiliub, oᴋaudlugolo: Tujormitjanit ilûnainit Jerusalemêtunit uvlune tamakkonane pijokalauktunikᴋaujimangitotôvêt?

¹⁹ Aperivaglo: Sumîk? Kiovâk: Jêsuse Nazaremiok pivlugo, nalautaijôlauktoᴋ pitsartudlarlune, piniarnernut oᴋautsinullo, Gûdemelo inungnelo tamaine.

²⁰ Tâmna ajoᴋertuijoksoapta angajoᴋâptalo unnertujutiginerpât toᴋotauᴋovlugo, kikiaktortauᴋovlugolo (saningajolingmut).

²¹ Uvagulle Israêlitit piulijauniarasugivavut tâpsomunga. Uvlomelo uvlut pingatserput, taimangat taimailiormatsuk.

²² Arnat ilapta ilangita iluvermut uvlârulauktut ᴋoaksârtilaukpâtiguttauk,

²³ Timinga neninginamitsugôk, oᴋariartorpullo Engelîngnik takolauramigôk, ômartomik oᴋartûngnik.

²⁴ Ilaptalo iluvek nalipsarpât, taimaglo naipipât, sorlo arnanut oᴋautaungmat, (Jêsusele) nagvângilât.

²⁵ Oᴋautivaglo: Ilisimaitotik, ômatiptikut erᴋeasuktotik tamakkoninga tamainik okperlutik, nelautaijut oᴋauserilauktanginik.

²⁶ Kristûse taimâk âniatitaksaulaungilâk ânanaunerminullo iterlunê?

²⁷ Môseselo nalautaijullo tamaita oᴋautigilerpait tâpkungnunga, aglangniglo tamainik aglaksimajunik tâpsominga tukkisititsiarlugik nalojungnaitipak.

²⁸ Iglugasaille aivigijatik ᴋaglileramigit, ᴋângiutiniarᴋôlaulerpok.

²⁹ Nokᴋarsarpâglo oᴋarlutik: Uvaptingnêlaurit, uvluklilermat unnulermallo. Iteᴋatigivaglo tâpkunangnênialerdlune.

³⁰ Iksivaᴋatigileramigik nerrivlutik, ᴋakᴋôjak tiguvâ, ᴋujalivlunelo avgorpâ tapkungnungalo tunivâ.

³¹ Ijîgik tagva uititaulerpuk illitarivâglo. Sâmingnelo nipaivâk.

³² Ingmingnullo tâpkoa oᴋalerpuk: Omativuk iluptingne ônarsilaungilâk, oᴋautingmatiguk apᴋome, aglangnik nalojungnaitingmatigûk?

³³ Stundemelo tamattomane nikovipuk, utermilutiglo Jerusalemut, 11 illo katimajut naipipait, najortingillo.

³⁴ Tapkoa oᴋarput: Nâlegak ilâ makisimavok, Simonemullo sakᴋilauktok.

³⁵ Tâpkoalo (maggûk) unipkârvigivait apᴋome iluserilauktamingnik, ᴋanorlo ilitarsijutigigamikko, ᴋakᴋôjak avgormago.

³⁶ Tamattomingale oᴋauseᴋartilugit, Jêsusib nangminek akornganut pivlune oᴋautivait: Ulapirsauteᴋaritse!

³⁷ ᴋoaksângalerpulle erᴋsililarmiglo, anernênak takonasugilugo.

³⁸ Oᴋautivaillo: Sôk ᴋoaksângavisê? Sôklo taimaitunik issumaᴋarᴋisê ômatipsingnê?

³⁹ Aggakka itigakkalo takulersigik, uvangauvunga nangminek; aktorlungalo takunârsinga: Anernek uvineᴋangilak sauneᴋaranelo, sorlo uvanga takogapsinga peᴋartunga.

⁴⁰ Taimaglo oᴋarame, aggane itiganelo ᴋemergojauᴋolerpait tâpkonunga.

⁴¹ ᴋuviasungnermulle sulle okpingimatta, tataminiarmattalo, oᴋautivait: Ovane nerᴋiksaᴋarᴋisê?

⁴² Mingeriablo jarrasimajub ilanganik igupsaujârtullo orᴋsuanik manijivut tâpsomunga.

⁴³ Tiguvaillo, nerrilarmelo takoane.

⁴⁴ Oᴋautivaillo: Tamadja oᴋausikka, oᴋauserilauktakka ilipsingnut, sulle najulaurapse; pivlunga aglaksimajut ilûnamatsiatik nalautsijuksaungmatta, Môsesib nelautaijullo aglangine, Dâvidiblo imgerutingine.

⁴⁵ Tagva nalojungnaitipait, aglangnik tukkisilerᴋovlugit.

⁴⁶ Oᴋautivaillo: Taimâk aglaksimavok, taimaglo Kristûse âniatitaksaulaukpok, makituksauvlunelo toᴋungajunit uvluk pingajuangne.

⁴⁷ Oᴋâlaᴋojilunelo atermine ᴋaᴋialernermik issumagijaujungnainermiglo ajornernit inuᴋatigênut tamainut, Jerusalemiut pigiarᴋârlugit.

⁴⁸ Ilipsele tamakkoninga tamainik kigligiutsijôvose.

⁴⁹ Ahâglo, atâtama oᴋautigilauktanga ilipsingnut tilijomavara. Ilipsele iglugasaksoarne Jerusalemêtuksauvose, pângat pitsartunermik tunitsivioᴋârase.

⁵⁰ Tagvangalle Betânianmut aitipait, agganelo ᴋolangiutitidlugit saimartipait.

⁵¹ Taimâglo saimartiᴋamigit ᴋemakpait, ᴋilangmullo ᴋongmuarpok.

⁵² Tâpkoale tuksiarvigivât, Jerusalemullo ᴋuviasuvaksoadlarlutik uterivut;

⁵³ Katimavingmêtsainarlutiglo Gûde nakoridlarpât ᴋujagidlarlâllo.