Lukase 22 - Labrador Inuttitut Heritage Bible

Ajoᴋertuijoksuit kajusininganik Jêsuse toᴋotsomavlugo. Komunionib ilijauninganik. Ilinniartit anginersautitsomaninginik. Jêsusib oᴋâlaninginik kingorlerpânik. Tuksiarninganik Getsêmaneme; pititauninganik Jûdasemut, pijauninganiglo. Misiarutauninganik Pêtrusemut. Toᴋotaksaunerartauninganik.

¹ Pudjusauteᴋangitunigle ᴋakᴋôjaktorviksak ᴋaglilerpok, aularviksiorvingmik taijaujok.

² Ajoᴋertuijoksuillo aglangniglo ilisimajut pinasuarput ᴋanok ilivlutik toᴋodlugo; inuille erᴋsigivait.

³ Sâtanasele Jûdasemut Iskâriotemik atelingmut, 12 it ilanganut, pulamajarêrpok.

⁴ Ajoᴋertuijoksoarnullo angajoᴋânullo aivok oᴋaᴋatigijomavlugit, ᴋanok ilivlune pititsomavlugo tâpkonunga.

⁵ ᴋuviasulerput tagva kênaujaniglo tunitsivigijomavlugo angerpât.

⁶ Angerporlo tagva, pitjutiksarsiorlunelo pititsomavlugo pikablâdlarneᴋarane.

⁷ Pudjusauteᴋangitunigle ᴋakᴋôjaktorviub uvlunga naliutingmat, saugârsub aularviksiorutiksab toᴋotaujuksauvia,

⁸ Pêtruselo Johanneselo tilivak, oᴋautivlugik: Aᴋiksuijartoritik saugârsungmik aularviksiorutiksamik nerᴋiksaptingnik.

⁹ Apersorpâgle: Nane âᴋiksortauᴋoviûk uvaptingnût?

¹⁰ Oᴋautivak: Ahâk, iglugasaksoarnut iteruptik, inuk iliptingnik pâksiniarpok imektartok; tâmna maliktiko iglomut taipsoma itervigijanganut.

¹¹ Iglublo inuanut oᴋaritik: Ajoᴋertuijub oᴋautjauᴋovâtit: Iglo nanêᴋâ, saugârsungmik aularviksiorutiksamik nerriviksara, ilinniartikka ilagilugît?

¹² Iglomiglo angijomik âᴋiksorsimatsiartomik iglub ᴋolâne unnertûtilârpâtik; tagvane âᴋiksortiko.

¹³ Aivuk tagva, sorlolo oᴋautingmagik naipipâk, saugârsuglo aularviksiorutiksak âᴋiksorpâk.

¹⁴ Neliutingmallo ingipok Apostelit 12 it ilagilugit.

¹⁵ Oᴋautivaillo: Kilanâdlalaukpunga, saugârsuk una aularviksiorutiksak nerrijomavlugo ilagiluse âniaᴋârnanga.

¹⁶ Oᴋaupapsele, kingorngagut mattominga nerriniarungnairpunga, Gûdib nâlegauvingane nâmakserᴋârtinago.

¹⁷ Ermgusiarsuglo tiguvâ, ᴋujalivlunelo oᴋarpok: Tâmna tigusiuk aviklugolo ilipsingnut.

¹⁸ Oᴋaupapse, imerniangilanga napârtub vaineliksab iptinganik, Gûdib nâlegauvia tikerᴋârtinago.

¹⁹ ᴋakᴋôjarlo tiguvâ, ᴋujalivlunelo avgorpâ tâpkonungalo tunivâ oᴋarlunelo: Tagva timiga tunijauniartok pivluse; taimailioritse erᴋaumajauniksamnut.

²⁰ Taimâktauk ermgusiarsuk tigugiva, nerrijarêramik, oᴋarlunelo: Tagva Testamentitâk aumne, tâmna kovijauniarpok pivluse.

²¹ Ahâgle, uvamnik pititsiniartub aggangit ilagivlunga nerrimârvimnêput.

²² Inûble Erninga aileralloarpok, sorlo issumasimautaungmat. Inugle tâmna kappianamêk tâpsominga pititsijok.

²³ Ingmingnullo apersôtilerput, kinaungmangât akunermingne taimailiorniartok.

²⁴ Akkerartûtilerputtauk ingmingnut, kina akunermingne anginerongmangât.

²⁵ Oᴋautivaille: Atanersuit nunamêtut ataniotivut, pitsartuneᴋadlartullo taijauvut atanernik saimajunik.

²⁶ Ilipsele taimailerniarase: ilasele angnek nukardlitunituksauvok, angajoᴋaunerojorlo kivgatut-idlune.

²⁷ Kina atanionersauvâ? Nerrimârvingme iksivajok, kivgartortorlônêt? Taimnaungitok, nerrimârvingme iksivajôᴋ? Uvangale akunapsingne kivgatun-ipunga.

²⁸ Ilipsele najutsainalaukpapsinga kappiasungnimne.

²⁹ Nâlegauviglo tunijomavara ilipsingnut, sorlo Atâtama ᴋailaungmago uvamnut.

³⁰ Nerriluselo imertuksauvose nerrimârvimne nâlegauvimnêtome, iksivaluselo iksivautane, Israêlib kinguvângit ᴋitorngarêt 12 it erᴋartorlugit.

³¹ Nâlegarle oᴋarpok: Simon, Simon, ahâk Sâtanasib pijomagalloarpâse sannêjaromavluse sorlo ᴋakᴋôjaksatitut.

³² Uvangale pivlutit tuksialaukpunga, okpernît sorairᴋonago. Kingorngagullo ama sâgiaruvit, ᴋatangutitit nakoᴋsitiniakit.

³³ Oᴋautivâle: Nâlegak, opalungairsimavunga aiparilutit, parngnanairsimavingmut toᴋomullo aiᴋatigijomavlutit.

³⁴ Kiovâle: Pêtruse, oᴋaupagit, angutaunek uvlomeni perniangilak, misiarᴋârtinak pingasuertorlutit, ilitarsigavit uvamnik.

³⁵ Oᴋautivaillo: Tilijaᴋattalaurapse pôᴋarase, ikpiârsoᴋaraselo, itigaguteᴋaraselo, taipsomane ajoksalauᴋisê? Kiovât: Aukak.

³⁶ Tagva oᴋautivait: Mânale pôᴋartub neksarliuk, taimâktauk ikpiârsuk. Taimaitoᴋangituble annorâne pisiniutigiliuk, saviksoarsiniarlunelo pile.

³⁷ Oᴋaupapsele: Nalautsijariaᴋarivut aglaksimajut uvamnik: Idluitulijut akornganut pititaujok. Aglait uvamnik aglaksimajut nâmaksiniarput.

³⁸ Kiovâlle: Nâlegak, ahâk, tagva saviksoâk maggûk. Oᴋautivaille: Nâmakpok.

³⁹ Ilusimitullo anivlunelo aularpok ᴋakᴋamut orᴋsoᴋtalingmut. Ilinniartingitalo malikpât tagvunga.

⁴⁰ Tagvungalo pigame, oᴋautivait: Tuksiaritse, ôktortaulungnermut perᴋonase.

⁴¹ ᴋemakpait tagva millûtib tupvingatun ᴋanitigijomut, sêrᴋortorlunelo tuksiarpok.

⁴² Oᴋarlunelo: Atâtak, pijomaguvit ermgusiarsuk una pêruk uvamnit; pijomajaraungitorle, pijomajat pile!

⁴³ Engelille ilangata ᴋilangmit sakᴋervigivâ nakoksilugolo.

⁴⁴ Toᴋomullo aulaumajartitaugame tuksialualerpok. Kiagungningille kutititut auktun-itut nunamut katalerput.

⁴⁵ Tuksiarnermille makiname, ilinniartine kiksarnermut siniktut naipipait;

⁴⁶ Oᴋautivlugillo: Sôk sinikkisê? Makititse tuksiarluselo, ôktortaulungnermut perᴋonase.

⁴⁷ Sulle taimâk oᴋartilugo, ahâk, inugasaksuit ᴋaglilerput; 12 illo ilangat, Jûdasemik atilik sivorlerivât; tâpsoma Jêsuse ᴋanilerpâ kunigomavlugo.

⁴⁸ Jêsusible oᴋautivâ: Jûdase, Inûb Erninga kuniklugo nalonailiviûk?

⁴⁹ Najortingitale, ᴋanok iliortoᴋalermat takogamik, oᴋautivât: Nâlegak saviksoarmik atortuksauvitâ?

⁵⁰ Ilangatalo, ajoᴋertuijoksûb kivganga ulimavlugo, siutâ talerpia nakappâ.

⁵¹ Jêsusible kiovait oᴋarlune: Issumamingnik pilit. Siutâlo aktorlugo mamitipâ.

⁵² Jêsusible ajoᴋertuijoksuit, angajoᴋaujullo katimavingme, angajoᴋaunerojullo, tigujartortine oᴋautivait: Sorlo inuartomut tikipose, saviksoalijarluse ajaupialijalapselo.

⁵³ Uvlut tamaita najortigilaukpapse katimavingme, aktulaungilapsingalo aggangmut atautsemullônêt; tamadjale stundise, tâktublo pitsartuninga.

⁵⁴ Tigulerpâlle, aularutivlugolo ajoᴋertuijoksûb igloᴋsoanganut pitipât. Pêtrusible alivasiklune malikpâ.

⁵⁵ Ikomamigle ikitsivut avalut iluata ᴋerᴋane, tagvanelo iksivalerput, Pêtruselo akornganut ingipok.

⁵⁶ Kivgallo arnat ilangata ikomab saniane iksivajok takogamiuk, takunâlerpâ oᴋarlune: Tâpsomatauk ilagilaukpâ.

⁵⁷ Misiarporle oᴋarlune: Arnak, ilitaringilara.

⁵⁸ Kingorniarsutuinangagut, assiata kivgab takogivâ oᴋarlune: Igvittauk taipkoa ilagivatit. Pêtrusible kiovâ: Inuk, taimnaungilanga.

⁵⁹ Ama Kingorngagugiagalak, stundeovaluktub atautsib kingorngagut, taipsoma assia oᴋarivok: Âhamarik, tâpsoma ilagilaurivâ: Galilêamiôgame.

⁶⁰ Pêtrusele oᴋarpok: Inuk oᴋautsitit nalovakka. Sulle taimâk oᴋartilugo angutaunek niplerpok.

⁶¹ Nâlekable ᴋeviarlune Pêtruse takusarpâ. Petrusiblo Nâlekab oᴋausinga erᴋarpâ, oᴋautilaungmago: Angutaunek niplerᴋârtinago misiarutigilârparma pingasuertorlutit.

⁶² Pêtruse tagva anivok ᴋeavlunelo kiksadlarlune.

⁶³ Angutille Jêsusemik tigusijut mitautigivât annaudlalâllo.

⁶⁴ Matuvlugolo, kênangagut erᴋsârdlugo aperivât oᴋarlutiglo: Nelautalertigut, kia erᴋsârpâtît?

⁶⁵ Assinginuttauk unuktunut oᴋausilungnut oᴋautigivât.

⁶⁶ ᴋaulermallo, inuit angajoᴋângit, ajoᴋertuijoksuillo aglangniglo ilisimajut ᴋaggimiolerput, kiglisiniarviksoamingnullo âpât.

⁶⁷ Oᴋarlutiglo: Kristûseoguvit oᴋautitigut. Oᴋautivaille: Oᴋautigupse, okperiniangilapsinga;

⁶⁸ Aperigupsele, kioniangilapsinga, aularᴋoniangilapsingalônêt.

⁶⁹ Tamanna pivlugo mattoma kingorngane Inûb Erninga iksivajomârpok Gûdib ajugaᴋangitub talerpiata tungâne.

⁷⁰ Tagva ilûnamatsiatik oᴋarput: Gûdib Ernerivâtît? Oᴋautivait: (Nalâgut) oᴋarpose, taimnauvunga.

⁷¹ Tâpkoalo oᴋarput: Kigligiutjuteᴋariaᴋarungnairpogut, nangminek ᴋaninganit tussaraptigo.