Lukase 21 - Labrador Inuttitut Heritage Bible

Uigarniub tunergutiksârsuanik. Katimaviksub serᴋomitaujomârninganik.

¹ Takonâramele, akluitut tautukpait tunergutimingnik ilijijut Gûdib iklervinganut.

² Uigarnermik aklujomik takogivok, kênaujârsungnik maggûngnik ilijingmijomik.

³ Oᴋarporlo: Âhamarik oᴋaupapse: Uigarnek una aklujok ununersanik ilijivok tâpkonangat tamainit.

⁴ Tâpkoa ilûnatik pimingnik atorniangitamingnik ilijivut, Gûdemut tunergutiksautidlugit; unale aklujok perᴋutituaminik ilijivok.

⁵ Katimaviksoarmiglo ilangit oᴋarmatta, ujarᴋanut maniktunut ivlernartunullo ânanausijaungmat, oᴋarpok:

⁶ Naliutijomârpok tamakkoa tamaita takojapse ᴋallerêktoᴋarungnaiviksangat ujarangnik maggûngniglônêt serᴋomitaujomângitungnik.

⁷ Apersorpâlle oᴋarlutik: Ajoᴋertuijok, ᴋanga pijuksat tamakkoa pijomârᴋât? Sunauniarᴋâlo taimaitsomârviub nalunaikutaksangâ?

⁸ Oᴋarporle: Kamatitse, uivêrijauᴋonase. Unuktut tikitsomârmatta atera aterivlugo, oᴋarlutiglo: Kristûseovunga, naliusimajomiglo (oᴋarmilutik). Taipkoa malingniarasigik.

⁹ Unatadlartunigle akkerartortoksoarniglo tussarupse, erᴋsiniarase: taimailiortoᴋariaᴋarmat; naggatiksarle naliutingilak sulle.

¹⁰ Tagva oᴋautivait; Inuᴋatigêt inuᴋatigênut assimingnut sorsugomârput, ataniovingmiullo ataniovingmiunut assimingnut.

¹¹ Nunallo sunatuinarne angijomik sajukpilugomârput, Kângnartoksoaᴋarlarmelo nusilingnartoᴋaromârpok; erᴋsinartuniglo nalunaikutaksoarnik sakᴋertoᴋaromârpok ᴋilangmit.

¹² Tamakkoale tamaita perᴋârtinagitk tiguluse unangmijomârpâse, ilinniarvingmingnullo parngnanairsimavingmingnullo pititsomârpâse, ataniojunullo angajoksoarnullo âtsomârpâse, atera pivlugo.

¹³ Taimailiorviojomârposele kigligiutjutiksamut (nalojungnairutiksamut).

¹⁴ Omamiuteᴋaritse, siaklerniarase sivorngagut, sumik kigusiksaᴋarniarmangâpse.

¹⁵ Uvanga ᴋanermik ilisimanermiglo tunitjivigijomavapse, ômigijise ilûnaita kionermik akkerartornermiglo ilipsingnut sapilertilugit.

¹⁶ Angajoᴋâpse aglât, ᴋâtangutipselo, ilapselo ilannârijipselo pititsomârpâse, ilapselo ilangit toᴋotsomârpait.

¹⁷ Inuillo ilûnatik ômigidlaromârpâse atera pivlugo.

¹⁸ Nujarlo atauserlônêt niaᴋupsingnit asserortauniatsangilak.

¹⁹ Soᴋoserlugase tarnise piulisigik.

²⁰ Jerusalemible avatâ sorsuktuksarsoarnik illumajok takogupsiuk, tagva ᴋaujimaniarpose asserortauniarvia naliutilermat.

²¹ Taimaipat, Jûdêamêtok ᴋemâlerle ᴋakᴋanut, tagvanêtorlo ᴋerᴋane aulalerle, assinêtorlo perorsêvingme iterniarane.

²² Tamakkoa kiglungniub uvloringmagit, aglaksimajut tamaita nalautserᴋovlugit.

²³ Kappianamêgle singaijut amâmaktitsijullo, tamanna naliutikpat; angijomik kappianartoᴋaromârmat nuname, inuᴋatigêllo ukkua ningarijaudlaromârput.

²⁴ Saviksoarnut ipiktunut toᴋotauniarput, nunalingnullo ilûnainut âtauniarput; Jerusalemelo asserortauniarpok nalojunut, nalojut naliuningat nâmakserᴋartinago.

²⁵ Seᴋinerlo, takᴋerlo, uvloritjallo nelunaikutaᴋaromârput; inuillo nunamêtut erᴋsinermut sivôradlaromârput; imarbiksoarlo malliksuavaksuillo iktulijâromârput.

²⁶ Inuillo erᴋsinermut utaᴋinermullo nukkingerutijomârput, nunamut pijomârtuksat pivlugit; ᴋilaub pitsartuningit aulataujomârmatta.

²⁷ Taimaipallo Inûb Erninga tagva takoniarpât nuvujatigut ᴋaijok, pitsartudlarlune ânanaudlartok.

²⁸ Tamakkoale pilerpatta, ârloritse takosarluselo, piulijauviksase ᴋaglilermat.

²⁹ Adsiujomiglo oᴋautivait: Napârtok paungatannaktaliksak, napârtullo tamaita takonârsigik.

³⁰ Siggilerangata, tukkisitigivase ᴋaujimalerluselo aujajaraklilermat.

³¹ Taimâktauk ilipse, makkoa tamaita pigiartut takogupsigik, Gûdib nâlegauvinga ᴋaglilermat, ᴋaujimaniarpase.

³² Âhamarik oᴋaupapse: Kinguvângoᴋatigêt ukkua nunguniatsangilat, makkoa ilûnatik nâmakserᴋârtinagit.

³³ ᴋilaglo nunalo nungujomârpuk, oᴋausikkale nungujomângilat.

³⁴ Ilipsele udjertoritse, ômatise oᴋumailerᴋonagit nerritunermut imertunermullo, nunab pinginik pinasuarnermullônêt, uvlormut taipsomunga opingartaukonase.

³⁵ Taipsoma nunamêtut tamaita tikitsomârmagit nigaktut.

³⁶ Taimâk pivlugo pigâtsainaritse tuksiarluselo, ᴋemâjuksauᴋovluse tamakkoninga pijomârtunik ilûnainik, Inûblo Erningata sângane nangerungnarᴋovluse.

³⁷ Uvlôjarangallo, ajoᴋertuivok katimaviksoarme; unnugangalle aularpok ᴋakᴋamut orᴋsoktalingmut, tagvanêlerdlunelo.

³⁸ Uvlâkullo inuit illûnatik tikipât, katimavingme nâlegiarlugo.