Lukase 20 - Labrador Inuttitut Heritage Bible

Jêsusib kigusinga piniarnine pivlugo. Adsiujomik perorsêvilerijinik vainiliksatalingmik. Kênaujanik nunaliksiutauᴋojaujunik. Toᴋungajut makitsomârninginik. Apersumik kia Kristûse erneringmangâgo. Ulloreasoᴋojinermik Farisêeirnik.

¹ Uvlullo taipkoa ilangane, inuit katimaviksoarme ajoᴋertormagit, oᴋautsit tussarnertut oᴋâlatigivlugit, ajoᴋertuijoksuit aglangniglo illisimajut tikipât inuit angajoᴋângit ilagilugit.

² Oᴋautivâllo oᴋarlutik: Oᴋautitigut, kimût perᴋojauvêt taimailiorlutît? Kialônêt pitsartunermik mattominga tunitsivigivâtît?

³ Jêsusible kiovlune oᴋautivait: Aperijomavapsetauk oᴋautsemik atautsemik kiogisinga:

⁴ Johannesib baptijutinga ᴋilangmit inungnillônêt pivâ?

⁵ Issumertuivulle ingmingne oᴋarlutiglo: ᴋilangmit pijok oᴋautigiguptigo, oᴋautinajarpâtigut: Sôk okperilaungipisiûk?

⁶ Inungnille pijok oᴋautigiguptigo, tagva inugasaksuit milorajarpâtigut ujarᴋanut, Johannese ilûnatik nalautaijônasugingmatsuk.

⁷ Kiovullo: Nakit pingmangât nalovavut.

⁸ Jêsusiblo oᴋautivait: Tamanna pivlugo oᴋautingilapsetauk kimit pitsartuneᴋarnimnik taimailiorlunga.

⁹ Inuille adsiujomuk mattominga oᴋautilerpait: Inuk perorsêviliorpok, vaineliksanik ilijivlune, perorsêvilerijunullo pimajauᴋovâ, nunablo assianut aularpok muludlarlunelo.

¹⁰ Paungallo inilervait naliutingmat, kivgame ilangat tilivâ perorsêvilerijunut, perorsêviub paunganginik pijartorᴋovlugo. Perorsêvilerijulle (kivgak tâmna) anaudlarpât mitautigivlugolo, naksartinagolo aulartipât.

¹¹ Ama kivgab aipanga tiligivâ; tâmnatauk anaudlarpât mitautigivlugolo, naksartinagolo aulartinivât.

¹² Ama kivgâk pingajuak tiligivâ; tâmnatauk ikilerpât, (perorsêvingmillo) pingujarpât.

¹³ Perorsêviub inua tagva oᴋarpok: ᴋanok piniartuksauvêk? Ernera nagligidlartara tilijomavara; tâmna takogunitsuk, ileraginiarpallukpât.

¹⁴ Perorsêvilerijulle erninga takogamitsuk, issumaksarsiolerput oᴋarlutiglo: Tagga kingormgujijuksak, ᴋaititse, toᴋolaulavut, kingormgutijaksangit uvagut pigilerdlugit.

¹⁵ Perorsêvingmillo pingujarlugo toᴋopâ. Perorsêviub inuata perorsêvilerijut ukkua ᴋanok piniarᴋagît?

¹⁶ Tikitsomârpok, ukkualo perorsêvilerijut toᴋodlugit, perorsêvinelo assinginut pimajauᴋolugo. Tamanna tussaramitsuk oᴋarput: Taimailiortoᴋarniarane!

¹⁷ Takosarpaille oᴋarlunelo: Sunauvât aglaksimajut: Ujarak, igloliortut egitangat; tâmna iglub tereᴋoa ujaraulernerpôk?

¹⁸ Ujarᴋamut ômunga kataktok serᴋominiarpok; katagvigijanele (ujarᴋab) serᴋaliniarpâ.

¹⁹ Ajoᴋertuijoksuillo aglangniglo ilisimajut pinasuarput tigujomagalloarlugo stundeme tamattomane; inuille erᴋsigivait; malugigamitsuk adsiujomut mattomunga oᴋautigingmagit.

²⁰ Udjertorpâllo, udjertortullo tâpsomunga tilivait, ajungitôjârlutik, oᴋausinginit oᴋausiksarsioromavlutik pititsomavlugo atanerusermut tâpsomalo pitsartuninganut.

²¹ Aperivâllo oᴋarlutik: Ajoᴋertuijok ᴋaujimavogut, nalâgôrlutit oᴋauseᴋaravit ajoᴋertuilarpillo, inuillo sivôraginginangne, Gûdemulle apᴋotiksamik ajoᴋertuitsiaravit.

²² Ataniviksoak kênaujanik nunaliksiutauᴋojaujunik tunitjivigilugo idluarᴋâ, idluangilarlônêt?

²³ Pingitsertorningille malugigamigit, oᴋautivait: Sôk ôktorpisingâ?

²⁴ Kênaujak takolago! Kia adsinga, kialo aglangit ᴋolâne? Kiovât oᴋarlutik: Ataniviksûb.

²⁵ Oᴋautivaille: Tagva ataniviksoarmut tunisiuk ataniviksûb pinga, Gûdemullo Gûdib pinga.

²⁶ Inuillo sângane tapsoma oᴋausingit idluigijungnangilait, kigusingalo tataminiarivlugo nipangerput.

²⁷ Tagva Saduzêerit ilangita tikipât, makiviksaᴋarasugiklingitut, aperivâllo,

²⁸ Oᴋarlutik: Ajoᴋertuijok, Môsesib aglagvigivâtigut: Angutib angajua nuliaᴋartok toᴋokpat, ᴋitorngaᴋarane angajua nuliaᴋartok toᴋokpat, ᴋitorngaᴋarane nukangata tagva uigarnek nuliarijaksarivâ, angajune kinguvâksarsivlugo.

²⁹ Nukarêᴋalaukpok 7 nik. Angajuklek nulianilauktok ᴋitornginane toᴋovok.

³⁰ Tugliata uigarnek nuliarilermigamiuk, tâmnatauk toᴋogivok ᴋitorngingminane.

³¹ Pingajuatalo pigigivâ. Taimâktauk 7 it ilûnatik ᴋitorngineᴋaratik toᴋovut.

³² Ilûnatik kingorngatigut arnaktauk toᴋogivok.

³³ Makivingmele naliata nuliarijomârpaûk? Ilûnatik tâpkoa 7 it nuliarilaungmatsuk.

³⁴ Jêsusiblo kiovlune oᴋautivait: Tamattoma silab ᴋitorngangit nulianijôngovut uinijôngovullo.

³⁵ Silable aipânut pijuksaujut, toᴋungajunillo makitsomârtut nulianingniangilat uiningniangilallo.

³⁶ Kingorngane toᴋojungnanginamik, Engelititut-ileramik, Gûdiblo ᴋitorngarivait, makiviub ᴋitorngaringmagit.

³⁷ Toᴋungajulle makitsomârmatta, Môsese tukkisititsigivok, napârtunêname, Nâlegak taigamiuk Abrahab Gûdinganik, Isaablo Gûdinganik, Jâkoblo Gûdinganik.

³⁸ Toᴋungajulle Gûde Gûdigingilât, inôjulle Gûdigivât: tâpsomunga ilûnatik inôvut.

³⁹ Tagva aglangnik ilisimajut ilangita kiovlutik oᴋautivât: Ajoᴋertuijok, oᴋarlorikpotit.

⁴⁰ Kingornganelo aperilugo saperpât.

⁴¹ Oᴋautivaille: Sôk Kristûse Dâvidib ernerijanga oᴋautigivatsûk?

⁴² Dâvide imgerutimine nangminek oᴋarmat: Nâlegak Nâlekamnut oᴋarpok: Talerpingma tungânut ingitit,

⁴³ Omigijingnik ilijerᴋârtinanga itikavît ikogganganut.

⁴⁴ Nâlekaminik Dâvidib taigamiuk, ᴋanok ernerivaûk?

⁴⁵ Inuille ilûnatik nâlektilugit, ilinniartine oᴋautivait:

⁴⁶ Aglangnik ilisimajunik ilimasugitse! Annorânik angijoktanik atoromadlarput, niuvervingmelo salutitaujomadlarput; katimavingmelo nerrimârvingmelo issukliolutik iksivajomadlarput.

⁴⁷ Uigarnerit pingit nungutipait, takijuniglo tuksiarutinik tuksiarutsomavlugit oᴋarput. Taimâk pivlugo pitlartaunersaujomârput.