Lukase 2 - Labrador Inuttitut Heritage Bible

Kristûsib inulerninganik Betleheme, kipijauninganiglo atinganiglo. Nutarârsub Jêsusib âtauninganik katimaviksoarmut Jerusalemêtomut. Jêsusib nukapiangovlune takpaungarᴋatauninganik Jerusalemut, katimaviksoarmêninganiglo.

¹ Taipsomane atanersûb Augustusib perᴋojivlune inuit ilûnaita ataniovingminêtut aglaktauᴋovait, (atingit perᴋutingillo).

² Aglaktaunek tamanna sivorlerpângovok pivorlo taipsomane Korîniuse atanerusiotilugo Sîriame.

³ Ilûnatiglo iglogasaksoarmingnut aivut, aglaktaujomavlutik.

⁴ Tagva Jôsefetauk aularivok Galilêamit, iglugasangnit Nazaretemit, Judêamut, Dâvidib iglugasanginut, Betlehemik atilingnut, Dâvidib iglunganit kinguvânginillo pigame,

⁵ Aglaktaujomavlune Marîa nuliane aiparilugo, tâmna singaijok.

⁶ Tagvanedlutiglo erniviksanga neliutivok.

⁷ Erniarerᴋârtaminiglo ernivok, imuserdlugolo annorâvinernik, nergjutit nerᴋevianut ilivâ, siniktarvingme iniksaᴋanginamik assianik.

⁸ Taipsomalo erᴋâne mianersijoᴋarpok natername, nergjutimingnik avalulingmêtunik mianersijunik, unnuangotilugo.

⁹ Ahâglo, Nâlekab Engelingata tikipait, Nâlekablo ᴋaumasingata ᴋaumartidlarpait; erᴋsidlalerpullo.

¹⁰ Engeliblo oᴋautivait: Erᴋsinase, ahâk, ᴋuvianartoksoarmik oᴋautivapse silaksoarmiunut tamainut pilârniartomik.

¹¹ Pivluse mâna piuliklerte Nâlegak Kristûse erniangongmat, Dâvidib iglugasangine.

¹² Tamannalo nalunaikutarisiuk, nutarârsuk annorâvinernik imusersimajok, nergjutillo nerᴋevianut ilimajok naipilârpase.

¹³ Tagvainarlo Engeleme ᴋilangmiugasaksoaᴋalaukpok; tâpkua Gûde nakoridlarpât oᴋarlutik:

¹⁴ Gûde ᴋotsingnermêtok nakoridlartaule, ullapirsauteᴋarle nuname, inungnelo ᴋuvianartoᴋarle!

¹⁵ Engelillo taipkonangat ᴋilaliarmatta, mianersijut ingmingnut oᴋalerput: Mâna Betlehemut ailaukta, pijoᴋalertomiglo tâvane takojartorluta, Nâlekab oᴋautigijanganik uvaptingnut.

¹⁶ Tuavilutiglo tagvunga pivut, Marîalo Jôsefelo tikipakit, taimâktauk nutarârsuk nergjutit nerᴋeviane ilimajok.

¹⁷ Takojarêramitsuk, oᴋautigijartorpât oᴋautijaunitik nutarârsuk tâmna pivlugo.

¹⁸ Tussartullo ilûnatik mianersijut oᴋausingit tataminiarivait.

¹⁹ Marîable oᴋautsit tamakkoa tamaita torᴋorpait, auladlugillo ômatimine.

²⁰ Mianersijullo uterivut, Gûdelo nakorivlugo ᴋujagidlarpât tussartatik takojatiglo pivlugit, taimâk oᴋautjaulauramik.

²¹ Uvlullo sitamaujortôlermatta, nutarârsuk kipijaungmat, ateᴋartipât Jêsusemik Engelib taimâk taingmago, sulle anâname timingata ilunanêlerᴋârtinago.

²² Uvlullo neliutingmatta, Marîab sujungaivinga Môsesib perᴋojangit maliklugit, nutarârsuk Jêsuse takpaunga Jerusalemut âpât, Nâlekamut pititsomavlugo;

²³ (Sorlo aglaksimangmat Nâlekab perᴋojangine: Angutiarsuit ᴋitorngingautit anânaminit anerᴋârtut tunijaksauvut Nâlekamut.)

²⁴ Tunergutiksatik tunilugit, sorlo Nâlekab perᴋojangine aglaksimangmat: akigijârtûngnik aᴋigiaraujarniglônêt maggûngnik.

²⁵ Ahâglo, anguteᴋalaukpok Jerusaleme Sîmeonemik atilingmik; angullo tamna idluarlunelo Gûdemik nâlekpok, Israêliblo manigortaujutiksanganik nerriukpok, Anernerublo ajunginerub inigivâ.

²⁶ Anernermullo ajunginermut nalojungnaititaulaukpok Toᴋonianginerminik Nâlekab Kristûsinganik takoᴋârane.

²⁷ Tâmna Anernerub ajunginerub kajungersaininganut katimaviksoarmut pivok. Jêsusiblo angajoᴋâᴋita nutarârsuk âmakko, piniarutigilugo, sorlo pivangmatta perᴋojat maliklugit,

²⁸ Sîmeonib tiguvâ erᴋisimiardlugo, Gûdelo nakorivâ oᴋarlunelo:

²⁹ Nâlegak mâna kivgat ullapirsauteᴋarlune angerarle, sorlo oᴋalauravit;

³⁰ Ijimnut piuliklertiksauᴋojat takogapko.

³¹ Tâmna inuit ilûnatik kênangita sângane pijarêrtinangne,

³² ᴋaumajok nalojunik ᴋaumarsaijuksak, inuᴋotivîllo Israelitit nakorijaksangat.

³³ Jôsefiblo atâtaksangata anânangatalo nutarârsûb oᴋautigijauninga tamanna tataminiarutigivâk.

³⁴ Sîmeoniblo saimartipak, anânanganullo Mariamut oᴋarpok: Ahâk, una ochojutiksaujomârpok makijutiksaujomârlarmelo unuktunut Israêlib kinguvânginut, nalunaikutaksaujomârlunelo akkerartugaksak;

³⁵ (Tarnikullo (Marîa pivâ) kibliktauᴋôromârpotit saviksoarmut,) unuktut ômatingita issumangit sagvartauᴋovlugit.

³⁶ Arnaktauk nalautaijok tagvanênivok Hannamik atilik, Fanuêlib pania, Aserib kinguvângita illangat, ningiungolertok, uigasôlauᴋârdlune uiᴋalauktok jârinik 7 nik;

³⁷ Mânale uigarniojok jâreᴋalerdlune 84 nik, katimavingmit nûlungimariktok, tuksiarnermullo nerritailinermullo Gûde kivgartorpâ uvlullo unnuallo tamaita.

³⁸ Tâpsomatauk stundeme taipsomane tikipait, Nâlegarlo nakoridlarpâ, oᴋautigilâllo piulijiksamik utaᴋijunut tamainut Jerusalemêtunut.

³⁹ Tamaitalo nâmaksitigamigit Nâlekab perᴋojangit maliklugit, ama Galilêamut uterivut iglugasangmingnut Nazaretemut.

⁴⁰ Nutarârsugle aglisikpok, pitsartudlarlunelo anernerme, silatuvaksoadlalarmelo, Gûdiblo saimaningata najorivâ.

⁴¹ Angajoᴋâgiglo jârine tamaine Jerusalemut aivakpuk aularviksiorviolerangat.

⁴² Jêsuselo jâreᴋalermat 12 nik, illagilugo takpaunga Jerusalemut aivuk, aularviksiorviub ilusinga maliklugo.

⁴³ Uvlullo taipkoa nângmatta angergarmingmaniglo, nukapiak Jêsuse Jerusalemit nûlungilak, angajoᴋâkitalo tamanna nelovâk.

⁴⁴ Illagilauktamingnulle illaunasugigamikko, uvlok atausek. Ingergaramik, ᴋeneriartorpâk ilamingne illitarijamingnelo.

⁴⁵ Neninginamikko, ama Jerusalemut uterivuk ᴋeneriardlugo.

⁴⁶ Uvlullo pingasôlermatta, naipipâk katimavingme iksivajok ajoᴋertuijut akorngane, tâpkoalo nâleklugit apersorpait.

⁴⁷ Nâlektullo ilûnatik, silatuninga kigusingillo tataminiarivait.

⁴⁸ Angajoᴋâkitalo takogamikko, ᴋoaksârpuk, anânangatalo oᴋautivâ: Ernîk, sôk taimailiorpitigûk? Ahâk, atâtavît uvangalo ᴋenilaukpaptigit kiksarlunuk.

⁴⁹ Jêsusiblo kiovak: Sôk ᴋenerpitingâ? Nalovitîk, atâtama pingit piniariaᴋarapᴋît?

⁵⁰ ᴋanorle oᴋautingmagik, oᴋausinganik tukkisingilak.

⁵¹ Illagivlugiglo tâva taununga Nazaretemut aivok nâleluarlugiglo. Anânangatalo oᴋausingit makkoa tamaita ômatimine torᴋorpait.

⁵² Jêsuselo silatulerpalliadlarpok, inumariolerpalliavlunelo, saimaneksivalliavlunelo Gûdeme inungnelo.