Lukase 19 - Labrador Inuttitut Heritage Bible

Pimaklertemik Zaᴋêusemik. Adsiujomik kenaujamik pimaklerutaujunik. Jêsusib iterninganik Jerusalemut. Nelautaininginik. Tempelib sujungaititauninganik.

¹ Iteriartorlarmelo, Jeriᴋolo apᴋotigivâ.

² Ahâglo, anguteᴋalaukpok tagvane Zaᴋêusemik atilingmik; tâmna angajoᴋaujok pimaklertunut akluitôvlunelo.

³ Jêsuselo takojomadlarpâ, kinaungmangât, inungnullo sapperpok, mikigame.

⁴ Sivorliovlunelo aᴋpangerpok, napârtomullo Mulbêreliksamut majoarpok, takojomavlugo, tamanna apᴋotiksaringmago.

⁵ Jêsusiblo tagvunga pigame, ᴋongmut ârlorlune takovâ oᴋautilâllo: Zaᴋêuse, akᴋarsârit; uvlome tujormiovigijaksarigapkit.

⁶ Tagva akᴋarsârpok ᴋuviasuklunelo ilaliorpâ.

⁷ Ilûnatiglo tamanna takogamitsuk, avamudlarput, angumut idluitulijomut tujormiojartormat.

⁸ Zaᴋêusible Nâlegak tikipâ oᴋautilâllo: Nâlegak, ahâk, perᴋutikka maggoilivlugit, aipangit tunivakka aklujunut, uivêrijaujoᴋarpallo uvamnut, sitamairtorpakka utertilugit.

⁹ Jêsusible oᴋautivâ: Uvlome iglomioᴋatigêt ukkoa piulijiksarsivut, angut una Abrahab erneringmagotauk.

¹⁰ Inûb Erninga tikisimangmat, tammarsimajut ᴋeneriartorlugit piulijartorlugillo.

¹¹ Nâlengmatsuglo, amalo adsiujomik oᴋautivait, Jerusalemut ᴋaglilerame, Gûdiblo nâlegauvia tuavidlune sakᴋerniarasugingmatsuk.

¹² Oᴋarporlo: Atanek nunamut ungasiktomêtomut aularpok, ataniovingmik pijartorlune, kingorngagullo uteromangmilune.

¹³ Kivganele tallimaujortut ᴋaiᴋovait, tunitjivigilaitalo kênaujanik tallimaujortunik, oᴋautivaillo: Niorvgotigisigik tikerᴋârtinanga.

¹⁴ Inuᴋatingitale ômigigamitsuk, oᴋautjaugartorᴋovât: tâmna atanioterᴋongilavut uvaptingnut.

¹⁵ Utermigamelo, ataniovik pilauramiuk, kivgane ipkoa ᴋaiᴋovait, kênaujanik tunitsivigijane, tussaromavlune atunit niorvgutigilauktangita pijanginik.

¹⁶ Sivorlek tagva sakᴋerpok oᴋarlunelo: Atanek, kênaujarnut kênaujaᴋsilaukpunga tallimaujortunik.

¹⁷ Oᴋautivâlo: Kivgartorloriktotit, ikitunik nertornardlutit atulauravit; iglugasaktalingnut tallimaujortunut ataniotitsomavagit.

¹⁸ Aipangatauk sakᴋerivok oᴋarlune: Atanek kênaujarnut kênaujaᴋsilaukpunga tallimanik.

¹⁹ Tâmnatauk oᴋautivâ: Igvittauk ataniojuksauvotit iglugasaktalingnut tallimanut.

²⁰ Pingajuaglo sakᴋerame, oᴋarpok: Atanek ahâk tagga kênaujaᴋotit, torᴋorsimajok kakkigumut.

²¹ Erᴋsigiluarapkit, angutauseravit; ililaungitatit tiguvatit, katitidlalaitalo karngasulaungitatit.

²² Oᴋautivâ: Kivgâlôjotit, oᴋausernit erᴋartorpagit. Angutausertunga ᴋaujimalauramga ililaungitakka tigugapkit, karngasulaungitakkalo katitikapkit:

²³ Sôk kênaujaᴋutiga kênaugarniarvingmut pitingipiûk? Tikikumalo, ᴋaiᴋonajalauktara ilaᴋartilugo.

²⁴ Tagva najortine oᴋautivait: Omangat kênaujak aᴋsârnigarisiuk tunilugolo tallimaujortunik kênaujalingmut.

²⁵ Oᴋautivâllo: Atanek, tâmna tallimaujortunik kênaujaᴋalerêrpok.

²⁶ Oᴋaupapsele: Peᴋartok sumik tunitjivioniarmat; peᴋangitorle aᴋsârtauniarpok pinganik.

²⁷ Ipkoale uvamnut akkerartortut, uvamnullo ataniotiviojomangitut ᴋaisigik toᴋosigiglo sakᴋamne.

²⁸ Taimâk oᴋarame, aularpok, takpaunga Jerusalemut ailerlune.

²⁹ Betfâgemullo Betâniamullo ᴋaglilerame, ᴋakᴋamut orᴋsoktalingmut tikilune, maggûngnik ilinniartiminit tiliklerpok,

³⁰ Oᴋarlunelo: Aileritik iglugasangnut neliptingnêtunut; iteruptiglo, noggak pituksimajok nenilârpatik; ᴋânganut sulle inungmik ingitoᴋalaungitok. Pitûdjârlugo ᴋaitikko.

³¹ Aperijauguptiglo, sôk pitûdjârmangâptikko, imâk kiogitik: Nâlekab atoromangmago.

³² Tilijaujuglo aivuk, sorlolo oᴋautingmagik naipipâk.

³³ Noggarmigle pitûdjârsitilugik, inungita oᴋautivakit: Sôk noggak pitûdjârpitikô?

³⁴ Kiovaille oᴋautivlugit: Nâlekab atoromangmago.

³⁵ Apâk tagva Jêsusemut, annorâtiglo noggaub ᴋemerdloanut ilivlugit, Jêsuselo ᴋânganut ingitipât.

³⁶ Ingergatilugolo annorâtik isivilerpait apᴋomut.

³⁷ Kaglilermallo, ᴋakᴋamit orᴋsoktalingmit atersâlermat, ilinniartingita ilûnatik ᴋuviasuvaksoadlarlutik nipperᴋortovlutiglo Gûde nakoridlarpât, tatamnadlartut tamaita takojatik pivlugit.

³⁸ Oᴋarlutiglo: Nertortaule tikitok, atanersoak Nâlekab atingane! Ullapirsauteᴋarle ᴋilangme, Nakudlartoᴋarle ᴋotsingnerme!

³⁹ Farisêerillo ilangita ilaungmijut oᴋautivât: Ajoᴋertuijok, ilinniartitit inertikit!

⁴⁰ Kiovlune oᴋautivait: Oᴋaupapse, ukkua nipangerpatta, tagva ujarᴋat niplerniarput.

⁴¹ Iglugasaksoarnullo ᴋaglilerame, takunârpait ᴋugviorutigilaitalo.

⁴² Oᴋarporlo: ᴋanoktôk ᴋaujimagupse ilipseluatsiak, naliunerme tamattomane ulapirᴋsartauniksapsingnut ilingajunik! Mânale ijipsingnut ijersimavok.

⁴³ Naliutuksamut tikitaujomârapse, akkerartortipse ilujomârpâse avatipsigut, ᴋitorngaselo illaliudlugit, illuluse anerᴋonase; nanêᴋupselo ilûnâne kappiasuktitsomârpâse,

⁴⁴ Nungutsomârpâselo, (igluselo) ujarᴋangnik maggûngniglônêt ᴋallerêktoᴋarungnairomârput, piulijiksapse naliuninga kamagilaunginapsiuk.

⁴⁵ Katimaviksoarmullo iterpok, pisiniartullo niuverniartullo ᴋamanêtut anitilerpait.

⁴⁶ Oᴋautivaillo: Aglaksimavok: igluga tuksiarviovok; ilipsele inuarviotilaukpase.

⁴⁷ Uvlullo tamaita katimaviksoarme ajoᴋertuivok. Ajoᴋertuijoksuille, aglangniglo ilisimajut, inuillo angajoᴋângit pinasuarput toᴋotsomavlugo.

⁴⁸ Nagvârnagolo ᴋanok ilijarianga, inuit ilûnatik ungagidlalâllo tussaromadlarmatsuk.