Lukase 18 - Labrador Inuttitut Heritage Bible

Adsiujomik erᴋartuijomik idluangitomik, Farisêeremiglo pimaklertemiglo. Sorusertut issumaᴋarnermik. Akluinerub agviarninganik assetârtauninganiglo. Nalautainermik Jêsusib ânianginik. Tautungitub âᴋiktauninganik Jerikome.

¹ Adsiujomigle oᴋautivait, soraijuitomik tuksiariaᴋarnivut pitjutigilugo, inertuinata.

² Oᴋarlunelo: Erᴋartuijoᴋalaukpok iglugasaksoarne; tâpsoma Gûde erᴋsigingilâ, sivôrananelo inungnik.

³ Iglugasaksoarnelo tagvane uigarneᴋarpok; tâpsoma oᴋautijartorpâ: Piulinga akkerartortimnit.

⁴ Akunille tussâjomangilâ. Kingornganele ilumigut issumalerpok: Gûde erᴋsigingiᴋalloarapko inuillo sivôraginagit,

⁵ Uigarneruble tâpsoma pagvisâlermanga, piulijomavara, sugaluksaromanginama kêta.

⁶ Tagva Nâlegak oᴋarpok: Ahâk idluangitub erᴋartuijub oᴋausinga tussarsiuk.

⁷ Gûdible anerijane piulinajangilagît, uvlut unanuallo nâvlugit nipliavigingmatsuk, unêt akunêralloarunê?

⁸ Oᴋaupapse: Piulisâromârpait. Inûble Erninga tikitsomârpat, nuname okpernermik nagvâromârasugiviûk?

⁹ Ilangille ajungitônasugijut, assimingniglo nachojut mattominga adsiujomik oᴋautivait:

¹⁰ Angutîk maggûk takpaunga katimaviksoarmut tuksiariatorpuk, aipâ Farisêereojok, aipanglo pimaklerteojok.

¹¹ Farisêere nangerdlunelo ilumigut tuksiarpok imâk: Gûde ᴋujagivagit, assiptut inuktut-inginama, arᴋtaijotut, idluitulijotullo, arnarniartotullo, pimaklertotullônêt ôtunak.

¹² Vogeme maggoertorlunga nerritailivakpunga, perᴋutimalo ilûnatik tallimaujoanik tunijivunga.

¹³ Pimaklertele ᴋaninane nangerpok, ᴋilangmullônêt ârloromangitok; sagvingminulle patiksimajok oᴋarlune: Gûde, nâpkigilaunga idluitoksôjunga.

¹⁴ Oᴋaupapse: tâmna aipaminit ajornerminit issumagijaujungnainersauvlune atersârpok iglominut. Ingminik angijorortitok miklilertitaujomârpok, ingminiglo miklilertitok angijorortitaujomârpok.

¹⁵ Nutakᴋaniktauk âtsivut tâpsomunga, patingmijauᴋovlugit. Ilinniartingitale âtsijut takogamigit suadlalerpait.

¹⁶ Jêsusible ᴋaiᴋovait, oᴋautivlugit: Nutakᴋat uvamnut pilit inerterasigiglo; tâpkoa Gûdib nâlegauvia pigingmatsuk.

¹⁷ Âhamarik oᴋaupapse: Nutakᴋatut Gûdib nâlegauvinganik pingitok, iterniangilak.

¹⁸ Angajoᴋâllo ilangata aperivâ: Ajungitotit ajoᴋertuijok, sumik piniartuksauvêk, inôtsemik nâksaungitomik kingormgujijomavlungâ?

¹⁹ Jêsusible oᴋautivâ: Sôk ajunginerarpingâ? Ajungitoᴋangilak Gûdetôjub assianik.

²⁰ Perᴋojat ᴋaujimagalloarpatit: Nuliarêngnermik asseroijuksaungilatit. Inuartuksaungilatit. Tigliktuksaungilatit. Inuᴋatitit saglotigivlugit oᴋartuksaungilatit. Atâtangnik anânangniglo nâlektuksauvotit.

²¹ Tâmnale oᴋarpok: Tamakkoa tamaita malilaukpakka sorusionimnit.

²² Jêsusible tamanna tussaramiuk, oᴋautivâ: Atausek sulle pingilat. Perᴋutitit tamaita niorvgutiginiakit, aklujunullo piliutigilugit, tagva perᴋuteᴋatsiarniarpotit ᴋilangme; ᴋailerillo maliklunga.

²³ Tamannale tussaramiuk, kiksalerpok; akluitoksôgame.

²⁴ Jêsusible kiksartitaumajok takogamiuk oᴋarpok: Akluitut nâlegauvingmut ᴋilangmêtomut pilutik Sappernaᴋasakpok.

²⁵ Ajornanginersauvok Kamêle merᴋutib ijingagut pilune, akluitub iterniarninganit Gûdib nâlegauvinganut.

²⁶ Tamattomingale tussartut oᴋarput: Kinale tagva piulijaujungnarniarᴋâ?

²⁷ Oᴋarporle: Inungnut ajornartok Gûdemut ajornangilak.

²⁸ Tagva Pêtrusib oᴋautivâ: Ahak, tamaita ᴋemalaukpavut malilarpillo.

²⁹ Oᴋautivâle: Âhamarik oᴋaupapse: ᴋemaijoᴋangilak iglomik, angajoᴋângniglônêt, ᴋatangutiniglônêt nuliamiglônêt, ᴋitornganiglônêt Gûdib nâlegauvinga pivlugo,

³⁰ Tunitjiviolungitomik unuktunik mattomanêdlune, silamelo pijomârtome inôtsemik nungusuitomik.

³¹ 12 ille ingminut pitipait oᴋautivlugillo: Ahâk takpaunga Jerusalemut aivogut, nelautaijullo aglangit ilûnatik nelautsilârput Inûb Erninga pivlugo.

³² Tâmna pititaulârpok nalojunut: mitautigilârpât, allêkutigilugolo, ᴋetserarlugolo;

³³ Issaᴋalârpâllo, toᴋodlugolo; uvluglo pingajuangne makitsomârivok.

³⁴ Tamakkoale tamaita tukkisingilait, oᴋausingillo nalonadlalaukput tâpkonunga, ᴋaujimanatiglo oᴋauserilauktanginik.

³⁵ Jêriᴋomulle ᴋaglilerame, tautungitok apᴋotâne iksivavok ᴋenuvlunelo.

³⁶ Inugasaksuit senerᴋotut tussaramigit apertsorpait mattominga.

³⁷ Jêsusemigle Nazaremiomik ᴋângiutijomik oᴋautingmatsuk,

³⁸ Niplialerpok oᴋarlune: Jêsuse Davidib erninga nâpkiginga!

³⁹ Sivorlertulle inerterpât nipangerᴋovlugo. Tâmnale niplialualerpok: Dâvidib erninga napkiginga!

⁴⁰ Jêsusible nokᴋalerdlune tessiortauᴋovâ ingminut. Alermatsugle, aperivâ,

⁴¹ Oᴋarlunelo; Sumîk uvamnut piniarviojomavêt? Kiovâ: Nâlegak, tautuleromavlunga.

⁴² Jêsusiblo oᴋautivâ: Tautulerit, okpernivît ikajorpâtit.

⁴³ Tagvainarlo tautulerpok, maliklugolo, Gûdelo nakoridlarpâ. Inuillo ilûnatik tamattominga tautuktut Gûde nertorpât.