Lukase 17 - Labrador Inuttitut Heritage Bible

Jêsuse ajoᴋertuivok, âᴋêvlunelo kalaktunik tallimaujortunik. Gudib nâlegauvianik tikiniartomik oᴋâlavok.

¹ Ilinniartinele oᴋautivait: Sinaungatitsineᴋanginek ajornarpok; kappianamêgle taimna sinaungatitsijok!

² Tâpsomunga idluarnersauvok, serᴋalitsiviub ujaraktanganik ᴋungasingagut nivingaiviogune, egitauvlunelo imarbingmut, ukkuararsuit ilangata sinaungatitauninganit.

³ Udsertoritse. ᴋatangutivît idluitulivigikpatit, inerteruk; idluitulijungnaipallo, idluiningit issumagijungnaikit.

⁴ Uvlormelo atautseme 7 ertorlune idluitulivigikpatit, uvloênarlo 7 ertorlune tikipatit, ᴋaᴋialerpungârdlune; issumagijungnairaksarivat.

⁵ Apostelillo Nâlekamut oᴋarput: Okpernivut nakoᴋsititsuk.

⁶ Nâlekagle oᴋautivait: Mustardib karngasûtiksatangatut okperneᴋarupse, napârtomullo paungaliksamut ômunga oᴋarluse: Tagvangat pêrit, imarbingmullo nukterit, tagva nâlengniarpâse.

⁷ Kia ilapse kivgaliub perorsêvingme sanajomik, nergjutiniglônêt mianersijomik, perorsêvingmit tikilerangat, oᴋautiniarpaûk: Tuavidlutit nerrimârvingmut ingitsartorît?

⁸ Imâk oᴋautiniangilaûk: Unnuksiumik nerᴋiksaliniaringa, sailitserlutillo kivgartoringa nerritilunga imertilungalo, kingunipkut nerrijuksauvotit imerlutillo?

⁹ Kivgak tâmna ᴋujaginiarpaûk, perᴋojaunerminik pilaungmât? Taimâk issumangilanga.

¹⁰ Taimâktauk ilipse, perᴋojaunise tamaita pinialaurupsigik oᴋaritse: Kivgakullôvogut; piniaraksavut kissêta pigaptigik.

¹¹ Jerusalemullo ingergarame, Samâria Galilêalo apᴋotigivak.

¹² Iglugasangnullo pingmat, angutit tallimaujortut kalaktut pâkpât; tâpkoa alivasiktome nangerput.

¹³ Nipperᴋortovlutiglo oᴋarput: Jêsuse, nagliktok ajoᴋertuijok, nâpkigitigut!

¹⁴ Takogamigillo, oᴋautivait: Ajoᴋertuijunut takotitsartoritse! Taingungalo aivlutik kalaᴋarungnailerput.

¹⁵ Tâpkoale illangat kalagungnainerminik takogame, uterivok, Gûdelo nakoridlarpâ nipperᴋortovlune;

¹⁶ Itiganginullo pâmakterpok, ᴋujagilâllo. Tâmnalo Samâriamiovok.

¹⁷ Jêsusible kiovâ oᴋarlune: Kalaᴋarungnailertut 10 ungilât? Nauk taipkoa 9 ît?

¹⁸ Assianik utertoᴋangilâk Gûde nakorilugo takorngartamit ômangât?

¹⁹ Oᴋautivâlo: Makilutillo aularit, okpernivît ikajulaukpâtit.

²⁰ Farisêerille aperingmatsuk: ᴋanga Gûdib nâlegauvinga pijomârᴋâ? Kiovait oᴋarlune: Gûdib nâlegauving takuksaulune piniangilak.

²¹ Oᴋartoᴋarniangilarlônêt: Ahâk, mânêpok ikanelônêt, Ahâk, Gûdib nâlegauvinga ilupsingnêpok.

²² Ilinniartiminulle oᴋarpok: Naliutsomârpok Inûb Erningata uvlungita ilanganik takojomaniksase, takonagolo.

²³ Oᴋautijomârpâselo: Ahâk tamânêpok, ikanelônêt. Taikunga ainiarase malingniaraselo.

²⁴ Sorlo ᴋaumalak pikangat ᴋilangmit ᴋaumaidlarmat, ᴋaumatilugit tamaita ᴋilaub atanêtut, taimâktauk Inûb Erninga itsomarivok uvluksamine.

²⁵ Taimnale naliuterᴋârtinago, âniatitaujariaᴋarpok, ajaktortaujariaᴋarlunelo kinguvângoᴋatingênut tamakkonunga.

²⁶ Sorlo Nôab neliunerilauktangane pijoᴋalaungmat, taimâktauk Inûb Erningata uvluksangane itsomârivok.

²⁷ Ipkoa nerrivut imilarmiglo, nulianikput uinilarmiglo, uvlok taimna tikidlugo Nôab itervia umiaksoarmut; ullitornivaksûb tâva tikipait, nungudlugillo tamaita.

²⁸ Taimâktauk, sorlo Lotib naliunerilauktangane Pijoᴋalaungmat. Nerrivlutiglo imerput, pisiniarlutiglo, niuverlarmiglo, perorsêviliorput, igluliorlarmiglo;

²⁹ Uvlormele taipsomane, Lote aularmat Sodomamit, silalulerpok ᴋilangmit ikomamik orᴋsoromiglo, tamaitalo nungupait.

³⁰ Taimâktauk itsomârivok Inûb Erningata uvluksangane, sakᴋerviksangane.

³¹ Uvlorme taipsomane iglub ᴋânganêtok akᴋarniarane, perᴋutine iglomêtut aijomavlugit. Taimâktauk perorsêvingmêtok uterniarane tunuminêtunut.

³² Lotib nulianga erᴋarisiuk.

³³ Inôserminik ivlersinasuartub assiojijomârpâ; inôserminiglo assiojijomârtub, piuliniarpâ.

³⁴ Oᴋaupapse: Unnuarme taipsomane angutîk maggûk sinigvingme atautseme innangaᴋatigêgomârpuk; aipanga illaliortaujomârpok, aipâle ᴋemaktaukjomârpok.

³⁵ Arnâk maggûk kaivititseᴋatigêgomârpuk; aipanga illaliortaujomârpok, aipâle ᴋemaktaujomârpok.

³⁶ Angutîk maggûk perorsêvingmêtsomârpuk; aipanga illaliortaujomârpok, aipâle ᴋemaktaujomârpok.

³⁷ Aperivâlle oᴋautivlugo: Nâlegak, nanê? Oᴋautivaille: Nane ᴋigdloᴋartome nektoralit kativakput.