Lukase 16 - Labrador Inuttitut Heritage Bible

Adsiujomik pimaklertomik idluangitomik. Jêsusib oᴋâlaninganik Farisêerinut. Angumik akluitomik Lazarusemiglo aklujomik.

¹ Ilinniartineletauk oᴋautivait: Akluitomik anguteᴋalaukpok pimajeᴋartomik perᴋutiminik; tâmna unneᴋsiornerlûtigivât tâpsomunga perᴋutinginik nungutsijok.

² Angajoᴋângatalo ᴋaiᴋovâ oᴋautivlugo: Tussartara ilingnik ᴋanok ilingavâ? Pimajatit katiniakit nalonaililugillo; mattoma kingorngane pimaklerungnaituksaugavit perᴋutimnik.

³ Pimaklertok ilumigut oᴋalerpok: ᴋanok piniartuksauvêk? Angajoᴋâma pimaklerᴋojungnairmanga; poagrejaromangilanga, ᴋenunermiglo kangusukpunga.

⁴ Suliaksamnik nalungikalloarpunga, ilaliortauᴋovlunga iglunginut, pimaklerᴋojaujungnairuma.

⁵ Tagva angajoᴋâminut akkiliksaᴋartut tamaita kingorlerêktilugit ᴋaiᴋovait, sivorlerlo aperivâ: ᴋapsinîk akkiliksaᴋarᴋêt angajoᴋâmnût?

⁶ Oᴋarpok: Orᴋsoktalingnik ᴋattaujanik 100 inik. Oᴋautivâlo: Akkiliksaᴋautitit tigukit, ingidlutillo aglaksârit 50 nik.

⁷ Ama aipanganut oᴋarpok: ᴋapsinik akkiliksaᴋarᴋêt? Oᴋarpok: Sanaugaksamik ôktut 100 ertorlugo. Oᴋautivâlo: Akkiliksaᴋautitit tigukit aglaklutillo: 80 ertorlugo.

⁸ Angajoᴋâblo pimaklertok tâmna idluitok nertorpâ, silatujotut piniarmat. Mattoma silaksûb ᴋitorngangit ilusimingnik silatunersaungmatta ᴋaumajub ᴋitornganginit.

⁹ Oᴋaupapselo: Ilannâksarsiniaritse nunab pinginut idluangitunut, ajoksarupse ilaliortauᴋovluse iglunginut nâksaungitunut.

¹⁰ Mikijomik nelâgôrtok, nelâgôrivok angijomik, mikijomiglo piniarnerluktok, angijomiktauk piniarnerlukᴋivok.

¹¹ Nunab pinginik idluangitunik nalâgôngikupse, kia pimaklerᴋojomavâsê pijarialingmîk?

¹² Pigingitapsingniglo nalâgôngikupse, kia tunitjivigijomârpâse nangminiksapsingnîk?

¹³ Angajoᴋângnut maggûngnut Kivgartortoᴋarungnangilak; aipâ ômigilârpâlônêt, aipâ nagligilugo; ubvalo aipâ ungagilârpâ, aipanga nachogilugo. Gûdelo nunab pingillo atautsikut kivgartorungnangilase.

¹⁴ Tamakkoa tamaita Farisêerit pijomatudlartut tussaramigit, mitautigivât.

¹⁵ Oᴋautivaillo: Ajungitôjomagalloarpose inuit sângane Gûdible ômatise ilitarivait; inungnut nertortaujomajut Gûdib maᴋojugivait.

¹⁶ Perᴋojat nalautaijullo nalautsivut Johannese tikidlugo: mattomalo kingorngane Gûdib nâlegauvia oᴋautaulerpok oᴋautsinut tussarnertunut, ilûnatiglo ᴋerdlâᴋaratik iterniarput.

¹⁷ ᴋilak nunalo nungunersauniarpuk, tittaub atautsib perᴋojanêtub pêrninganit.

¹⁸ Nuliaminik avitsijub, assianiglo nulianiklune, nuliarêngnek asserorpâ; avitamiglo nulianiktub nuliarêngnek asserorivâ.

¹⁹ Akluitomigle anguteᴋalaukpok, annorârpaktomik aupaloriktunik sâtuniglo pivianartovaksoarnik; uvlullo tamaita inûnatsoridlarlune ᴋuviasukpok.

²⁰ Aklujoᴋarivorlo tagvane, Lazarusemik atelingmik; tâmna itervingata kiglingane nalavok, ilûnâne ajuadlartok.

²¹ Nerrititaujomavorlo karnganerlukunik akluitub nerrimârvianit kataktunik; ᴋingmille aluktoriartorpait ajuangit.

²² Aklujorlo toᴋungmat, Engelit âpât Abrahab sânganut. Akluitorle toᴋogivok, iluvertauvorlo.

²³ Ânianartoksoarme kappianartovingmêdlune uitalerpok, Abrahalo takovâ ᴋaningitomit, Lazaruselo sarliartanga.

²⁴ ᴋaigarsulerpok oᴋarlune: Atâtak Abraha, nâpkiginga, Lazaruselo tiliuk, tikime nuvua imermut misuᴋârlugo, oᴋara nigliterliuk; mattomunga ikomaksoarmut âniadlarama.

²⁵ Abrahable oᴋautivâ: Ernîk, erᴋaumagit, inôtilutit ajungijutitit pilaurangne: Lazarusele kappiaktoadlalauktok mâna manigortauvok, igville âniatitauvotit.

²⁶ Tamannalo tappidlugo akunaptingne itersaksoaᴋarpok; tamângat ilipsingnut ikâromajut saperput, taimâktauk uvaptingnut ikâromajut ilipsingnit saperivut.

²⁷ Tagva oᴋarpok: Tamanna pivlugo tuksiarvigivagit, atâtaᴋ, tâpsominga tiliklerᴋovlutit atâtama iglunganut.

²⁸ Sulle ᴋatanguteᴋarama tallimanik; kigligiutserᴋovlugo tâpkonunga, ânianartovingmut tamattomunga perᴋonagittauk.

²⁹ Abrahab oᴋautivâ: Môsesib nalautaijullo aglanginik peᴋaramik; ipkoa nâlakligit!

³⁰ Oᴋautivâle: Aukak, atâtak Abraha, toᴋungajulle ilangata tikipagit, ᴋaᴋialerajarput.

³¹ Oᴋautivâ: Môsese nalautaijullo nâlengikunigit, okperajanginivuttauk, toᴋungajunit makitoᴋarpat.